Read kiswahili Filemoni 1 Bible Online

Filemoni 1 - kiswahili bible

Filemoni 1

¹ Paulo, mfungwa wa Kristo Yesu, na Timotheo aliye ndugu yetu, kwa Filemoni mpendwa wetu, mtenda kazi pamoja nasi,

² na kwa Afia, dada yetu, na kwa Arkipo askari mwenzetu, na kwa kanisa lililo katika nyumba yako.

³ Neema na iwe kwenu, na amani, zitokazo kwa Mungu, Baba yetu, na kwa Bwana Yesu Kristo.

⁴Namshukuru Mungu wangu sikuzote, nikikukumbuka katika maombi yangu;

⁵nikisikia habari za upendo wako na imani uliyo nayo kwa Bwana Yesu na kwa watakatifu wote;

⁶ naomba ili kwamba ushirika wa imani yako ufanye kazi yake, katika ujuzi wa kila kitu chema kilicho kwetu, katika Kristo.

⁷ Maana nilikuwa na furaha nyingi na faraja kwa sababu ya upendo wako, kwa kuwa mioyo ya watakatifu imeburudishwa nawe, ndugu yangu.

⁸Kwa sababu hiyo, nijapokuwa nina ujasiri katika Kristo kukuagiza likupasalo;

⁹lakini, kwa ajili ya upendo nakusihi, kwa kuwa ndimi, Paulo mzee, na sasa mfungwa wa Kristo Yesu pia.

¹⁰ Nakusihi kwa ajili ya mtoto wangu niliyemzaa nikiwa kifungoni mwangu, yaani, Onesimo;

¹¹ambaye zamani alikuwa hakufai, bali sasa akufaa sana, wewe na mimi pia;

¹²niliyemtuma kwako, yeye mwenyewe, maana ni moyo wangu hasa;

¹³ ambaye mimi nilitaka akae kwangu, apate kunitumikia badala yako, niwapo katika kifungo kwa ajili ya Injili.

¹⁴ Lakini sikutaka kutenda neno lolote isipokuwa kwa ushauri wako, ili kwamba wema wako usiwe kama kwa lazima, bali kwa hiari.

¹⁵Maana, labda ndiyo sababu alitengwa nawe kwa muda, ili uwe naye tena milele;

¹⁶ tokea sasa, si kama mtumwa, bali zaidi ya mtumwa, ndugu mpendwa; kwangu mimi sana, na kwako wewe zaidi sana, katika mwili na katika Bwana.

¹⁷Basi ikiwa waniona mimi kuwa mshirika nawe, mpokee huyu kama ambavyo ungenipokea mimi mwenyewe.

¹⁸Na kama amekudhulumu, au unamdai kitu, ukiandike hicho juu yangu.

¹⁹ Mimi Paulo nimeandika kwa mkono wangu mwenyewe, mimi nitalipa. Sikuambii kwamba nakudai hata nafsi yako.

²⁰Naam, ndugu yangu, nifaidi kwa hili katika Bwana; uniburudishe moyo wangu katika Kristo.

²¹Kwa kuwa nakuamini kutii kwako ndiyo maana nimekuandikia, nikijua ya kuwa utafanya zaidi ya hayo nisemayo.

²² Na pamoja na hayo uniwekee tayari mahali pa kukaa; maana natumaini ya kwamba kwa maombi yenu nitarejeshwa kwenu.

²³ Epafra, aliyefungwa pamoja nami katika Kristo Yesu, akusalimu;

²⁴ na Marko, na Aristarko, na Dema, na Luka, watendao kazi pamoja nami.

²⁵Neema ya Bwana Yesu Kristo na iwe pamoja na roho zenu.