Read koho Sơnròp Gơlik Gơs 11 Bible Online

Sơnròp Gơlik Gơs 11 - koho bible

Sơnròp Gơlik Gơs 11

¹Tŭ hơ̆ jơh lơgar dunnia gơs dô jơnau đơs bal mơ ngui bal dô jơnau đơs.

²Bơh đah mattơngai lik, bol khai lik lòt mơ gŏ dô nơm ƀlàng tòm lơgar Sinear, gen ơm tềng hơ̆.

³Mơ bol do đơs mơ bol ne lah: “Heh, bol he lơh tĕ gac mơ buh niam tòm ồs.” Mơ bol khai gơs gac ala lŭ, mơ cài ala simang.

⁴Bol khai đơs tai lah: “Behơ̆ bol he bơt tĕ dô nơm ƀòn, mơ bơt dô nơm gơlang jơnhoa tus hơ trồ, bol he lơh tĕ gơs pơnro sơnđan bol he in, rngòt bol he lòt gơprah gơpring tòm ù mòn!”

⁵Chòp Yàng Jehôwa mù nàng sền gŏ ƀòn mơ gơlang jơnhoa mơ kòn sau kòn mơnus dê neh bơt.

⁶Yàng Jehôwa đơs lah: “Do, bol khai gơs mìng dô làng bol, mơ tơl nă gơs dô jơnau đơs bal mơ ne broă bol khai rơp lơh, tŭ do ò gơs bơta lơi kơryan bol khai lơh gơs ală bơta bol khai neh kơlôi nền.

⁷Behơ̆, Bol He mù lă, nàng lơh sơlồng sơlàng jơnau đơs bol khai dê, nàng bol khai in ò tòm wă jơnau đơs cau do mơ cau ne.”

⁸Lồc behơ̆, Yàng Jehôwa lơh kòn mơnus in lòt gơprah gơpring làm ù tiah, mơ bol khai sang lòi ò bơt ƀòn tai.

⁹Tài bơh hơ̆ sơnđan ƀòn hơ̆ la Babel, bơh Yàng Jehôwa neh lơh sơlồng sơlàng jơnau đơs làm ù dê, mơ bơh tềng hơ̆ Kơnràñ lơh kòn mơnus in lòt gơprah gơpring làm ù tiah.

¹⁰Do la jơi bơtiàn Sem dê: bàr nam tơnơ̆ mơ dà kŏ, Sem neh tơl dô rhiang nam mơ tơnggơs Arpaksat.

¹¹Tơnơ̆ mơ tŭ Sem tơnggơs Arpaksat rau, khai gam kis pram rhiang nam tơnggơs kòn klau kòn ùr.

¹²Arpaksat neh tơl pe jơt pram nam tơnggơs Selah.

¹³Tơnơ̆ mơ tŭ Arpaksat tơnggơs Selah rau, gam kis poan rhiang pe nam tơnggơs kòn klau kòn ùr.

¹⁴Selah neh tơl pe jơt nam tơnggơs Heber.

¹⁵Tơnơ̆ mơ tŭ Selah tơnggơs Heber rau, gam kis poan rhiang pe nam tơnggơs kòn klau kòn ùr.

¹⁶Heber neh tơl pe jơt poan nam tơnggơs Pelek.

¹⁷Tơnơ̆ mơ tŭ Heber tơnggơs Pelek rau, khai gam kis poan rhiang pe jơt nam tơnggơs kòn klau kòn ùr.

¹⁸Pelek neh tơl pe jơt nam tơnggơs Rehu.

¹⁹Tơnơ̆ mơ tŭ Pelek tơnggơs Rehu rau, gam kis bàr rhiang sin nam tơnggơs kòn klau kòn ùr.

²⁰Rehu neh tơl pe jơt bàr nam tơnggơs Seruk.

²¹Tơnơ̆ mơ tŭ Rehu tơnggơs Seruk rau, gam kis bàr rhiang poh nam tơnggơs kòn klau kòn ùr.

²²Seruk neh pe jơt nam tơnggơs Nakôr.

²³Tơnơ̆ mơ tŭ Seruk tơnggơs Nakôr, gam kis bàr rhiang nam tơnggơs kòn klau kòn ùr.

²⁴Nakôr neh tơl bàr jơt sin nam tơnggơs Terah.

²⁵Tơnơ̆ mơ tŭ Nakôr tơnggơs Terah rau gam kis dô rhiang jơt sin nam tơnggơs kòn klau kòn ùr.

²⁶Terah neh poh jơt nam tơnggơs Abram, Nakôr mơ Haran.

²⁷Do la jơi bơtiàn Terah dê: Terah tơnggơs Abram, Nakôr mơ Haran; Haran tơnggơs Lot.

²⁸Haran chơt di đap Terah la bèp khai dê, tòm lơgar khai dê, tòm Ur, lơgar Kalde dê.

²⁹Abram mơ Nakôr gơs bau, bau ùr Abram dê sơnđan la Sarai, mơ bau ùr Nakôr dê sơnđan la Milka kòn Haran, Haran bèp Milka mơ bèp Jisda.

³⁰Mơ tai, Sarai la cau kơnền, gen khai ò gơs kòn.

³¹Mơ Terah lam Abram, kòn klau khai dê, Lot, sau khai la kòn klau Haran dê, mơ Sarai, bau ùr Abram dê lik bơh dê Ur, lơgar Kalde dê nàng mut tòm lơgar Kanaan. Bol khai lòt tus hơ Caran gen ơm tơn tềng hơ̆.

³²Rài kis Terah la bàr rhiang pram nam, mơ Terhah chơt tòm Caran.