Read koho Sơnròp Gơlik Gơs 13 Bible Online

Sơnròp Gơlik Gơs 13 - koho bible

Sơnròp Gơlik Gơs 13

¹Abram lam bau, ală phan khai dê, mơ Lot bơh Ejiptơ guh hơ Negep.

²Abram pas gơs ngan phan poan jơng, priă mơ màh.

³Bơh Negep, khai lòt rhòi rhòi tus hơ Betel, tus dê tiah khai neh lơh sàl sơnròp ngan, digùl Betel mơ Ahi,

⁴la tiah khai neh lơh dô nơm cơnòng duh khoai bơh sơnròp. Tềng hơ̆, Abram hòi dan dê sơnđan Yàng Jehôwa.

⁵Mơ tai, Lot lòt bal mơ Abram, kung gơs belàt, kơnrồ mơ sàl sơl.

⁶Ù hơ̆ ò tơl nàng bàr nă bol khai in ơm bal, bơh ală phan khai dê oă ngan gen tàng bol khai ơm bal ò diơng.

⁷Cau ê Abram dê pơndang tòmpìt bal mơ cau ê Lot dê, tòm tŭ hơ̆ gơs cau Kanaan mơ cau Pherijit ơm tòm lơgar hơ̆.

⁸Abram đơs mơ Lot lah: “Dan bañ gơs bơta pơndang tòmpìt digùl añ mơ mê mơ digùl cau ê añ mơ cau ê mê, bơh bol he la poac mhàm bal,

⁹Ò di jơh ù tiah ơm di đap mê ò ơ? Behơ̆ mê cah is tĕ bơh añ, dilah mê ai đah kiau, gen añ rơp lòt đah ma, dilah mê đah ma gen añ rơp lòt đah kiau.”

¹⁰Gen Lot tơnggòr, sền gŏ làm jơh ƀlàng hiòng Jordan, la tiah gơs dà hòr làm tus hơ Soar, lài mơ tŭ Yàng Jehôwa òhềt tơnroh Sôdôm mơ Gômôrơ, ƀlàng hơ̆ kung be suơn Yàng Jehôwa dê mơ be lơgar Ejiptơ.

¹¹Gen Lot sac rwah làm jơh ƀlàng Jordan dê mơ khai lòt hơ đah mattơngai lik. Behơ̆ bàr nă tòmcah is.

¹²Abram ơm tòm lơgar Kanaan, mơ Lot ơm tòm ală ƀòn tòm ƀlàng mơ cèng sàl khai dê tus hơ Sôdôm.

¹³Mơ tai, làng bol Sôdôm la iơh bơsak mơ gơs glài dờng ngan tòmdră mơ Yàng Jehôwa.

¹⁴Tơnơ̆ mơ tŭ Lot neh cah is mơ Abram rau, Yàng Jehôwa đơs mơ Abram lah: “Pò mat tĕ tơnggòr, sền bơh dê tiah mê ơm tus hơ đah đang, đah đơm, đah mattơngai lik mơ đah mattơngai mut.

¹⁵Bơh ù lơi mê gŏ Añ rơp ai mê mơ jơi bơtiàn mê in sùm sùm kòp rài.

¹⁶Añ rơp lơh jơi bơtiàn mê dê be kơmbuh hơđang ù, behơ̆ dilah cau lơi rgơi kòp kơmbuh hơđang ù, gen sồng rgơi kòp jơi bơtiàn mê dê.

¹⁷Ñă lòt tĕ làm tòm ù hơ̆, lòt tòm ròt jòng mơ ròt ơnàng gơ dê tài bơh Añ ai mê in ù do.”

¹⁸Lồc behơ̆, Abram cèng sàl khai dê tus ơm di tiah ală tòm cha Mamre dê, tòm Hebrôn, mơ tềng hơ̆ khai lơh dô nơm cơnòng duh khoai Yàng Jehôwa in.