Read koho Sơnròp Gơlik Gơs 14 Bible Online

Sơnròp Gơlik Gơs 14 - koho bible

Sơnròp Gơlik Gơs 14

¹Tòm rài Amraphel, bơtau Sinear dê, Ariôk bơtau Elasar dê, Kedorlaomer, bơtau Elam dê mơ Tidal, bơtau Gôim dê.

²Bol khai dô bă bal tòmlơh mơ Bera bơtau Sôdôm dê, Birsa bơtau Gômôrơ dê, Sineap bơtau Atma dê, Semeber bơtau Sebôim dê, mơ bơtau Bela hơ̆ la Soar.

³Ală bơtau do pơjum bal tòm thòng Sidim, tŭ do la Dàlềng Chơt.

⁴Tòm jơt bàr nam ală bơtau do duh bơtau Kedorlaomer, mơ tòm nam jơt pe, gen bol khai ò bài duh tai.

⁵Tòm nam jơt poan, Kedorlaomer mơ ală bơtau bal mơ khai lòt tòmlơh pha rlau mơ cau Rephaim tòm Asterôt Kanaim, mơ cau Susim tòm Ham mơ cau Emim tòm ƀlàng Kiriathaim,

⁶mơ cau Hôrit tòm mơnơm Seir, tus dê tòm cha Paran rềp dê ƀlàng bràs.

⁷Mơ bol khai rê wơl, tus hơ En Misphat, hơ̆ la Kades, mơ gen pha rlau mơ lơgar cau Amalek dê mơ cau Amôrit ơm tòm Hatsatsôn Thamar.

⁸Bơtau Sôdôm dê, bơtau Gômôrơ dê, bơtau Atma dê, bơtau Sebôim dê mơ bơtau Bela dê, hơ̆ la Soar, lik lòt tus tòm thòng Sidim mơ rcang tòmlơh,

⁹nàng tòmlơh mơ Kedorlaomer, bơtau Elam dê mơ Tidal, bơtau Gôim dê, mơ Amraphel, bơtau Sinear dê, mơ Ariôk bơtau Elasar dê, poan bơtau tòmlơh mơ pram bơtau.

¹⁰Mơ tòm thòng Sidim gơs oă tơnau cài; bơtau Sôdôm mơ bơtau Gômôrơ alah mơ dô, mơ dùh tềng hơ̆ mơ cau lơi klàs gen dô tòm mơnơm.

¹¹Poan nă cau bơtau hơ̆ ai jơh ală phan mơna mơ phan ngui sa Sôdôm mơ Gômôrơ dê, gen lòt.

¹²Bol khai kung kup Lot, kòn cau oh Abram, tòm Sôdôm mơ jơh ală phan mơna khai dê mơ cèng lòt.

¹³Dô nă cau klàs tus yal bơta hơ̆ mơ Abram cau Hebrơ. Abram ơm rềp dê tiah tòm cha Mamre, cau Amôrit, bi Eskôl mơ Aner dê; pe nă cau do gơs dô bă bal mơ Abram.

¹⁴Dơ̆ Abram git kòn cau oh khai dê neh cau kơlìn kup, gen khai lam lòt pe rhiang jơt phàm nă cau khin cha ngan, neh deh tòm hìu khai, mơ ting jat ală bơtau hơ̆, tus hơ ƀòn Dan.

¹⁵Gen khai cah mpồl ală cau dĭ, brồ lơh geh pha mơ bol hơ̆ tòm trồ mang mơ ting jat tus dê Hôba đah kiau Damas.

¹⁶Khai cèng wơl tơl jơh ală phan, mơ kung lam kòn cau oh khai la Lot mơ jơh ală phan khai dê, ală cau ùr mơ làng bol rê wơl.

¹⁷Tơnơ̆ mơ tŭ Abram neh lơh alah Kedorlaomer mơ ală bơtau dô bă bal mơ khai, gen bơtau Sôdôm lòt kơp rò khai tòm thòng Sabe, hơ̆ la thòng bơtau dê.

¹⁸Melchijedek, bơtau Salem dê, cèng piang lă mơ tơrnòm. Mơ tai, bơtau do la cau gơnoar ơn phan duh khoai Yàng Tom Trồ Hơđang Rlau Jơh dê.

¹⁹Khai ai lơngai Abram in mơ đơs lah: “Dan Yàng Tom Trồ Hơđang Rlau Jơh, la Bơtau crơng gơs trồ mơ tiah, ai lơngai Abram in!

²⁰Pal jòng ro Yàng Tom Trồ Hơđang Rlau Jơh, Bơtau neh jào ală cau sò tơm tòm tê mê dê!” Tòm jơh ală phan Abram neh ai wơl, Abram ơn dô pơnah jơt khai in.

²¹Bơtau Sôdôm đơs mơ Abram lah: “Ai tĕ wơl añ in ală cau, ai ală phan mơna gen lòi mê in.”

²²Abram ho wơl lah: “Añ pò tê di đap Jehôwa Yàng Tom Trồ Hơđang Rlau Jơh, Bơtau crơng gơs trồ mơ tiah, mơ ho lah:

²³Tòm phan lơi bơtau dê, bulah dô dang che brài, hala dô dang che kơt khŏ, añ ò ai dô êt lơi, rngòt bơtau đơs lah: ‘Añ neh lơh Abram in pas mòn!’

²⁴Añ rơp ò ai phan lơi mìng pơnah phan ală cau pơnu neh sa, mơ pơnah phan ală cau neh lòt bal mơ añ, la Aner, Eskôl mơ Mamre, bol khai pal ai tĕ pơnah phan bol khai dê.”