Read koho Sơnròp Gơlik Gơs 15 Bible Online

Sơnròp Gơlik Gơs 15 - koho bible

Sơnròp Gơlik Gơs 15

¹Tơnơ̆ mơ ală broă hơ̆, tòm dô bơta gơtơnggŏ gơs jơnau Yàng Jehôwa đơs mơ Abram lah: “Ơ Abram, bañ rngòt! Añ la khèl đo mê dê, phan ƀàn mê rơp dờng ngan.”

²Abram đơs lah: “Ơ Yàng Jehôwa, ñchi phan Yàng rơp ai añ in taih? Añ chơt tơn ò gơs kòn, cau pal pơrdòn tòm hìu nhă añ la Eliese cau Damas.”

³Abram đơs tai lah: “Do, Yàng lơh añ in tồc lồi, dô nă cau dĭ añ, deh tòm hìu añ, rơp la cau pơrdòn añ jê.”

⁴Yàng Jehôwa đơs mơ Abram lah: “Cau hơ̆ ò di la cau pơrdòn mê ò, mơya cau lik bơh pròc tòm mê dê, rơp la cau pơrdòn mê.”

⁵Gen Kơnràñ lam khai lik dê bơdìh mơ đơs lah: “Mê tơnggòr sền tĕ hơđang trồ, mơ dilah mê rgơi kòp jơh ală sơmañ gen kòp tĕ.” Kơnràñ đơs tai lah: “Jơi bơtiàn mê kung rơp behơ̆ sơl.”

⁶Abram dòn Yàng Jehôwa, gen Kơnràñ sơnđan bơta hơ̆ la song ring khai in.

⁷Yàng Jehôwa đơs mơ Abram lah: “Añ la Yàng Jehôwa neh lam mê lik bơh dê Ur, lơgar Kalde dê nàng ai mê in lơgar do tồ lơh gơs sre brê.”

⁸Abram ho lah: “Ơ Yàng Jehôwa, tài bơh ñchi añ git lah añ rơp geh lơgar do gơs sre brê taih?”

⁹Yàng Jehôwa đơs mơ khai lah: “Mê kup tĕ cèng Añ in dô nơm kơnrồ me pe nam, dô nơm be me pe nam, dô nơm belàt dam pe nam, dô nơm ntòp mơ dô nơm ntòp hui”

¹⁰Abram kup tơl ală phan hơ̆, blah bàr pơnah mơ ơn sơrplàng kòp nơm bàr đah, mơya khai ò blah ală sềm.

¹¹Ală sềm sa poac mù dê ală phan chơt hơ̆, mơ Abram ting bơtrơh gơ.

¹²Tŭ mattơngai mut, gen Abram bic lơhă ngan, dô bơta klam jơngo cik mơ rngòt rngơt ngan tus jơm gòm khai.

¹³Yàng Jehôwa đơs mơ Abram lah: “Mê git tĕ nền lah jơi bơtiàn mê rơp ơm ing tòm dô nơm lơgar ò di bal mơ bol khai, lơh dĭ làng bol hơ̆ in mơ kong bol khai rồn bơklơn tòm poan rhiang nam.

¹⁴Mơya Añ rơp cahrña ală cau mơ jơi bơtiàn mê lơh dĭ, tơnơ̆ wơl bol khai rơp lik klàs bal mơ ală phan mơna lìu làc.

¹⁵Mê rơp rê lơngap lơngai tus hơ mò pàng mê dê, mê rơp kis jŏ ngan sồng mê chơt tơp tòm ù.

¹⁶Tus dê rài poan, gen jơi bơtiàn mê rơp rê wơl hơ do, tài bơh tồi glài cau Amôrit dê òhềt bềng lìu.”

¹⁷Tŭ mattơngai neh mut, gơs bơta jơngo ngan, ne, gơs dô nơm bơnhă ồs mơ gơlik ñhŭ, mơ dô nơm lơmpiat ồs lòt gan digùl ală poac neh blah.

¹⁸Tòm ngai hơ̆ Yàng Jehôwa lơh bơta ho bal mơ Abram, mơ đơs lah: “Añ ai jơi bơtiàn mê in lơgar do, bơh hiòng Ejiptơ tus di hiòng dờng, hơ̆ la hiòng Ơphrat,

¹⁹la lơgar ală cau Kenit, Kenesit, Katmônit,

²⁰Hetit, Pherijit, Rephaim,

²¹Amôrit, Kanaan, Gergasit, mơ Jebusit dê.”