Read koho Sơnròp Gơlik Gơs 16 Bible Online

Sơnròp Gơlik Gơs 16 - koho bible

Sơnròp Gơlik Gơs 16

¹Sarai, bau Abram dê, ò deh kòn; khai gơs dô nă dĭ ùr Ejiptơ, sơnđan la Agar.

²Sarai đơs mơ Abram lah: “Do, Yàng Jehôwa neh lơh añ in kơnền, behơ̆ dan mê ơm bal mơ dĭ ùr añ jê, digơlan bơh khai añ rơp geh kòn.” Gen Abram iat jơnau Sarai dê.

³Tơnơ̆ mơ tŭ Abram neh ơm jơt nam tòm lơgar Kanaan, Sarai, bau khai, ai Agar, dĭ ùr Ejiptơ khai dê, ai khai in bau.

⁴Khai ơm bal mơ Agar, gen Agar bun. Tŭ khai gŏ khai neh bun, gen khai sền òsơp dê cau gơnoar tòm khai dê.

⁵Sarai đơs mơ Abram lah: “Bơta ƀàssìl mơ añ kong tuh wơl di să mê. Añ neh ai dĭ ùr añ ơm tòm ntơh mê, mơ bơh tŭ khai neh bun khai sền òsơp dê añ. Dan Yàng Jehôwa cahrña digùl añ mơ mê.”

⁶Abram đơs mơ Sarai lah: “Do dĭ ùr hơ̆ ơm tòm tê ai, lơh tĕ di khai be lơi khat gơboh nùs ai dê.” Gen Sarai lơh bòl glar Agar in, gen Agar dô pleh bơh di mat khai.

⁷Mơya cau gơnrơh Yàng Jehôwa dê gŏ khai ơm rềp dê gah croh dà tòm ƀlàng ngềt ngơt, dà croh tòm gùng lòt hơ Sur,

⁸gen lùp lah: “Ơ Agar, dĭ ùr Sarai, mbơh đah ai tus? Mơ ntềng đah ai rơp lòt taih?” Cau ùr ho lah: “Añ dô bơh di mat Sarai, cau tòm añ.”

⁹Cau gơnrơh Yàng Jehôwa sồr khai lah: “Ai rê wơl tĕ mơ cau tòm ai dê mơ dòn duh khai.”

¹⁰Cau gơnrơh Yàng Jehôwa dê đơs tai lah: “Añ rơp bơtơl oă jơi bơtiàn ai in; bol khai rơp gơlik gơs oă tian gơs cau ò jai kòp.”

¹¹Cau gơnrơh Yàng Jehôwa đơs mơ khai lah: “Do, ai gơs bun, rơp deh dô nă kòn klau, tơmoh tĕ sơnđan khai la Ismael, bơh Yàng Jehôwa neh kơno bơta bòl glar ai dê.

¹²Kòn dềt hơ̆ rơp be dô nơm alàng brê, tê khai rơp tòmsò mơ jơh ală cau, mơ tê jơh ală cau hơ̆ tòmsò wơl dê khai. Khai rơp ơm tòm bơta rcang sir nàng tòmdră mơ jơh ală oh mi khai dê.”

¹³Cau ùr sơnđan Yàng Jehôwa neh đơs mơ khai la “Yàng Tom Trồ sền gŏ,” bơh khai neh đơs lah: “Ngan tềng do ò di añ neh gŏ Bơtau sền gŏ añ sơl ơ?”

¹⁴Tài bơh hơ̆, cau ai sơnđan tơrlung do la Lacairoi, gơ ơm digùl Kades mơ Beret.

¹⁵Gen Agar deh dô nă kòn klau Abram in, Abram sơnđan kòn klau hơ̆ la Ismael.

¹⁶Mơ tŭ Agar deh Ismael Abram in rau, gen Abram neh tơl phàm jơt prau nam.