Read koho Sơnròp Gơlik Gơs 22 Bible Online

Sơnròp Gơlik Gơs 22 - koho bible

Sơnròp Gơlik Gơs 22

¹Tòm tŭ ală broă hơ̆ neh sir rau, gen Yàng Tom Trồ lòng Abraham. Kơnràñ đơs lah: “Ơ Abraham!” Khai ho lah: “Do añ.”

²Yàng Tom Trồ đơs lah: “Kup tĕ kòn klau dùl mê kòñ gơboh la Isak mơ lòt tus hơ tiah Môria, tềng hơ̆ ơn tĕ kòn lơh gơs phan chu duh khoai hơđang dô nơm mơnơm Añ rơp sơnio mê in.”

³Abraham guh bơh drim, kơt ừn di alàng, cèng bàr nă cau dĭ mơ kòn klau khai la Isak mơ lòt. Khai kung koh lòng nàng chu phan duh khoai, gen lòt tus hơ tiah mơ Yàng Tom Trồ neh sồr.

⁴Tus dê ngai pe, Abraham pò mat mpòl tiah hơ̆ bơh ngài.

⁵Gen Abraham sồr bàr nă cau dĭ lah: “Ơm tĕ tềng do bal mơ alàng, añ mơ oh rơp lòt tus hơ đah ne nàng duh khoai, gen bol hi rơp rê wơl hơ bol mê.”

⁶Abraham ai lòng chu phan duh khoai ơn Isak in tui, ai khai at ồs mơ pềs tòm tê, gen bàr nă bol khai lòt bal.

⁷Isak đơs mơ Abraham bèp khai lah: “Ơ bèp!” Khai ho lah: “Ơ kòn, do añ!” Isak đơs: “Do lòng mơ do ồs, mơya ntềng đah kòn belàt nàng lơh phan chu duh khoai taih?”

⁸Abraham ho lah: “Ơ kòn, să tòm Yàng Tom Trồ rơp rcang lòi he in kòn belàt nàng ngui lơh phan chu duh khoai.” Gen bàr nă kư̆ lòt bal.

⁹Bol khai tus di tiah Yàng Tom Trồ neh sồr, tềng hơ̆ Abraham lơh cơnòng duh khoai, dap lòng hơđang, cap Isak kòn khai, mơ ơn hơđang lòng di cơnòng duh khoai.

¹⁰Gen Abraham pò tê ai pềs nàng hàl kòn khai.

¹¹Gen cau gơnrơh Yàng Jehôwa hòi bơh hơđang trồ lah: “Ơ Abraham! Abraham!” Khai ho lah: “Do añ.”

¹²Cau gơnrơh đơs lah: “Bañ ƀư tê di să oh hơ̆ mơ bañ lơh bơta lơi di khai, bơh tŭ do Añ git mê duh rngòt di Yàng Tom Trồ, tài bơh mê ò pơlai mơ Añ kòn klau mê dê, hơ̆ la kòn dùl mê dê.”

¹³Abraham pò mat, sền gŏ bơh ngkòi khai dô nơm belàt dam, kòl ngke tòm rlau chi, gen kup belàt dam hơ̆ lơh phan chu duh khoai ala kòn khai.

¹⁴Abraham sơnđan tiah hơ̆ la Jehôwa Jire. Tài bơh hơ̆ gơs jơnau đơs lah: “Hơđang mơnơm Yàng Jehôwa dê rơp geh rcang lòi.”

¹⁵Cau gơnrơh Yàng Jehôwa dê bơh hơđang trồ hòi Abraham dơ̆ bàr.

¹⁶Yàng Jehôwa đơs lah: “Bơh mê neh lơh bơta hơ̆, ò pơlai kòn klau mê, hơ̆ la kòn dùl mê dê, gen Añ ai să tòm Añ mơ ho bal lah:

¹⁷Añ rơp ai lơngai lơngò mê in, bơtơl jơi bơtiàn mê gơlik gơs oă be sơmañ hơđang trồ, mơ gal be bràs di gah dàlềng, jơi bơtiàn mê rơp pìt geh ală mpồng ală cau sò tơm bol khai dê.

¹⁸Bơh mê neh lơh jat jơnau Añ, gen ală làng bol tòm lơgar dunnia rơp kơnòm di jơi bơtiàn mê mơ geh bơta lơngai.”

¹⁹Gen Abraham rê wơl tus hơ bàr nă cau dĭ, bol khai rê wơl mơ gơp hơ Beerseba. Mơ Abraham kư̆ ơm tòm Beerseba.

²⁰Tơnơ̆ mơ ală broă hơ̆, gơs cau yal mơ Abraham lah: “Do, Milka kung deh kòn Nakôr in la oh mê dê.”

²¹Kòn tơnhoa la Us, oh klau khai la Bus, mơ Kemuel, bèp Aram dê,

²²Keset, Haso, Pildas, Jitlap, mơ Bethuel.

²³Bethuel la cau tơnggơs Rebeka. Milka deh phàm nă kòn klau Nakôr in, oh klau Abraham dê.

²⁴Mơ bau cồng khai, sơnđan Reuma, kung deh kòn sơnđan la Thebah, Gaham, Tahas, mơ Maaka.