Read koho Sơnròp Gơlik Gơs 25 Bible Online

Sơnròp Gơlik Gơs 25 - koho bible

Sơnròp Gơlik Gơs 25

¹Abraham bau mơ dô nă cau ùr ndai, sơnđan la Ketura.

²Khai deh Abraham in Simran, Jôksan, Medan, Midian, Isbak mơ Sua.

³Jôksan deh Seba mơ Dedan, kòn sau Dedan dê la làng bol Asurim, làng bol Letusim mơ làng bol Leummim.

⁴Ală kòn klau Midian dê la Epha, Epher, Henok, Abida mơ Eldaa. Ală cau do la kòn sau Ketura dê.

⁵Abraham ai Isak in jơh ală phan mơna khai dê.

⁶Mơ ai ală phan kòn ală bau cồng khai dê, gen tòm tŭ gam kis, khai sồr bol hơ̆ lòt ơm hơ đah mattơngai lik, ngài bơh Isak kòn klau khai.

⁷Rài kis Abraham la dô rhiang poh jơt pram nam.

⁸Mơ Abraham tac nhơm chơt tòm tŭ khai să kra sơnam jòng mơ geh cèng tus hơ mò pàng khai dê.

⁹Bàr nă kòn klau khai la Isak mơ Ismael tơp khai tòm trồm lŭ Makpela tòm sre Eprôn, kòn klau Sôhar dê, cau Hetit, tòm toh mơ Mamre.

¹⁰Hơ̆ la sre bơh lài Abraham neh blơi mơ kòn sau Het, tềng hơ̆ bol khai tơp Abraham bal mơ Sara bau khai.

¹¹Tơnơ̆ mơ tŭ Abraham chơt, Yàng Jehôwa ai lơngai Isak kòn klau khai in. Isak ơm rềp mơ tơrlung Lacairoi.

¹²Do la jơi bơtiàn Ismael dê, kòn klau Abraham mơ Agar, cau dĭ ùr Sara dê neh deh.

¹³Mơ do la ală sơnđan kòn klau Ismael dê, pơnjat mơ ngai deh: kòn tơnhoa Ismael la Nebayôt, cau tơnơ̆ la Kedar, Atbeel, Mipsam,

¹⁴Misma, Duma, Masa,

¹⁵Hadat, Thema, Jethur, Naphis, mơ Kedema.

¹⁶Hơ̆ la ală kòn klau Ismael dê mơ sơnđan bol khai pơnjat mơ ƀòn mơ tiah bơtào sàl. Hơ̆ la jơt bàr bơtau tòm làng bol bol khai dê.

¹⁷Rài kis Ismael la dô rhiang pe jơt poh nam, tac nhơm mơ chơt, geh cèng tus hơ mò pàng khai dê.

¹⁸Ală kòn sau khai ơm bơh Habila tus hơ Sur di gah nhàr Ejiptơ, tiah gùng lòt tus hơ Asiri. Ơm cah is bơh ală oh mi khai dê.

¹⁹Do la jơi bơtiàn Isak kòn klau Abraham dê. Abraham tơnggơs Isak.

²⁰Mơ tòm tŭ Isak neh tơl poan jơt nam gen bau mơ Rebeka, kòn ùr Bethuel dê la oh ùr Laban dê, la cau Aram, ơm tòm lơgar Padan Aram.

²¹Isak hòi dan mơ Yàng Jehôwa bau khai in bơh khai kơnền. Yàng Jehôwa kơno jơnau hòi dan hơ̆ gen ai Rebeka in bun.

²²Bơh bàr nă kòn tòm tup bal tòm kơndul, gen khai đơs lah: “Dilah ngan behơ̆, ñchi bơh tài gơlik gơs añ in be do taih?” Khai lòt lùp Yàng Jehôwa.

²³Yàng Jehôwa ho lah: “Bàr nơm lơgar ơm tòm kơndul ai, mơ bàr làng bol rơp lik bơh kơndul ai, làng bol do pràn rlau mơ làng bol ne, mơ cau bi rơp kong duh broă cau oh.”

²⁴Tus dê ngai khai deh, ngan gơs kòn bàr tòm kơndul khai.

²⁵Kòn lik lài la pơrhê, sơnò làm să be dô nơm ào sơnò, sơnđan la Esau.

²⁶Oh khai lik tơnơ̆, tê khai at dê kơndòl jơng Esau, behơ̆, sơnđan khai la Jakôp. Tŭ Rebeka neh deh bàr nă kòn do gen Isak neh prau jơt nam.

²⁷Tŭ bàr nă kòn klau do dờng rau gen Esau la dô nă cau jak mòc, òs ơm tòm ƀlàng sre, ai Jakôp la cau ring ngềt, kư̆ ơm tòm sàl.

²⁸Isak kòñ gơboh Esau, bơh khai kòñ sa poac phan brê, mơ Rebeka kòñ gơboh Jakôp.

²⁹Dô ngai ne Jakôp gơm biap mơ Esau rê bơh tòm ƀlàng bòl glar ngan.

³⁰Gen Esau đơs mơ Jakôp lah: “Mê ai añ in sa biap pơrhê hơ̆ bơh añ bòl glar ngan.” Tài bơh hơ̆ cau sơnđan Esau la Edôm.

³¹Jakôp đơs lah: “Ngai do mê tac tĕ gơnoar kòn tơnhoa mê dê añ in.”

³²Esau đơs lah: “Do añ mòr chơt, ñchi kwơ añ lòi gơnoar kòn tơnhoa taih?”

³³Jakôp ho lah: “Mê ho bal tĕ lài.” Gen khai ho bal, behơ̆, khai tac gơnoar kòn tơnhoa mơ Jakôp.

³⁴Gen Jakôp ai Esau in sa piang lă mơ biap khoah pơrhê. Neh sa mơ hùc sir rau gen khai ñă lòt. Behơ̆ Esau sền òsơp dê gơnoar kòn tơnhoa khai dê.