Read koho Sơnròp Gơlik Gơs 27 Bible Online

Sơnròp Gơlik Gơs 27 - koho bible

Sơnròp Gơlik Gơs 27

¹Tòm tŭ Isak neh kra jơngo mat ò gŏ tai, gen khai hòi Esau, kòn tơnhoa khai dê mơ đơs lah: “Ơ kòn!” Esau ho lah: “Do añ.”

²Isak đơs lah: “Do, añ neh kra rau, ò git tŭ lơi añ rơp chơt.

³Behơ̆ tŭ do añ dan mê ai tĕ pềs tà, ding kam mơ àtak lik lòt tòm ƀlàng jòi añ in poac phan brê,

⁴lơh phan sa bơkah jat be añ kòñ sa, gen yò añ in sa, nàng hwềng soàn añ ai lơngai mê in lài mơ tŭ añ chơt.”

⁵Tòm tŭ Isak đơs mơ Esau kòn klau khai, gen Rebeka kơno. Mơ Esau lik lòt tòm ƀlàng mòc poac brê nàng cèng bèp in.

⁶Rebeka đơs mơ Jakôp kòn klau khai lah: “Do, añ neh kơno bèp mê sồr Esau, bi mê lah:

⁷‘Cèng añ in poac phan brê, yò phan sa bơkah añ in sa, nàng lài mơ tŭ añ chơt, añ rơp ai lơngai mê in di đap Yàng Jehôwa.’

⁸Behơ̆, ơ kòn, tŭ do iat tĕ añ mơ lơh jat jơnau añ sồr:

⁹Lòt tus hơ mpồl, kup bàr nơm kòn be niam, gen añ rơp lơh phan sa bơkah bèp mê in jat be khai kòñ.

¹⁰Mê rơp yò bèp mê in sa nàng khai ai lơngai mê in lài mơ tŭ khai chơt.”

¹¹Jakôp đơs mơ khai lah: “Ơ mè! Esau, bi añ, gơs sơnò mơya añ ò gơs.

¹²Digơlan bèp rơp ƀư dê añ mơ đal git añ be cau pơrlồm gen añ rơp àñ bơta srat rma, ò di la geh bơta lơngai ò.”

¹³Mè đơs lah: “Ơ kòn, bơta srat rma hơ̆ lòi añ kong, kư̆ iat tĕ jơnau añ, lòt kup tĕ bàr nơm kòn be.”

¹⁴Behơ̆, Jakôp lòt kup bàr nơm kòn be cèng mè in lơh phan sa bơkah jat be bèp khai kòñ.

¹⁵Mơ Rebeka ai ào srồmpha niam rlau Esau dê, kòn tơnhoa khai neh gơs tòm hìu, mơ tơnsoh Jakôp in, kòn put khai dê.

¹⁶Gen khai ai gơltau kòn be pùt tê mơ ngko, bơh tê mơ ngko Jakôp ò gơs sơnò.

¹⁷Gen Rebeka ai phan sa bơkah mơ piang lă khai neh lơh ơn di tê kòn put khai dê.

¹⁸Jakôp yò cèng bèp khai in mơ đơs lah: “Ơ bèp!” Isak ho lah: “Do añ, ơ kòn, mê la ñcau taih?”

¹⁹Jakôp ho lah: “Añ la Esau, kòn tơnhoa bèp dê. Añ neh jat jơnau bèp neh sồr, dan bèp guh, nggui sa poac phan brê añ jê, nàng hwềng soàn bèp rơp ai lơngai añ in.”

²⁰Isak lùp lah: “Mbe lơh mê lòt mòc mhar behơ̆ taih?” Khai ho lah: “Bơh Jehôwa Yàng Tom Trồ bèp dê neh sơnio añ tìp mhar behơ̆.”

²¹Isak đơs mơ Jakôp lah: “Ơ kòn! Lòt tus rềp nàng añ ƀư tồ git mê ngan la Esau kòn añ hala ò.”

²²Gen Jakôp lòt rềp di Isak, khai ƀư mơ đơs lah: “Sap đơs la Jakôp dê, ai bàr đah tê la Esau dê.”

²³Isak ò git khai bơh bàr đah tê kung gơs sơnò be bi khai la Esau. Behơ̆ Isak ai lơngai lơngò khai in.

²⁴Khai lùp lah: “Mê ngan la Esau kòn klau añ hala ò?” Jakôp ho: “Di, ngan la añ.”

²⁵Gen Isak đơs lah: “Yò tĕ poac phan brê mê dê añ in sa nàng hwềng soàn añ ai lơngai mê in.” Jakôp yò khai in sa, kung cèng tơrnòm khai in ñô sơl.

²⁶Isak bèp khai đơs lah: “Ơ kòn, tus rềp mơ cum añ.”

²⁷Gen Jakôp tus rềp mơ cum khai. Isak rhềp ƀô ào kòn klau khai dê, gen ai lơngai khai in mơ đơs lah: “Do, ƀô nhơm kòn klau añ, Kung be ƀô bơh ƀlàng mơ Yàng Jehôwa neh ai lơngai;

²⁸Dan Yàng Tom Trồ ai mê in dà mơryuh bơh trồ. Ù gơs bơkah tiah lơngồt. Kòi mơ tơrnòm gơs tơngkah tơngkañ.

²⁹Ală làng bol rơp dòn duh mê, ală lơgar pal cùn gơltang di đap mê. At bồ tĕ ală oh mi mê dê, Ală kòn klau mè mê pal cùn gơltang di đap mê. Cau lơi srat rma mê rơp kong srat rma wơl, Cau lơi ai lơngai mê in rơp geh lơngai wơl.”

³⁰Tơnơ̆ mơ tŭ Isak ai lơngai Jakôp in rau mơ Jakôp pa lik bơh di bèp khai, gen Esau, bi khai rê bơh mòc.

³¹Khai kung lơh dô bơta sa bơkah yò bèp in mơ đơs lah: “Dan guh, nggui sa poac phan brê kòn klau bèp dê nàng hwềng soàn bèp ai lơngai añ in.”

³²Isak bèp khai lùp lah: “Mê la ñcau taih?” Khai ho lah: “Añ la Esau, kòn tơnhoa bèp dê.”

³³Isak rơm să oă mơ đơs lah: “Gen ñcau neh pañ poac phan brê mơ neh ai añ in sa taih? Lài mơ tŭ mê rê, añ neh sa jơh rau, mơ neh ai lơngai khai in, mơ ngan khai rơp geh lơngai hơ̆.”

³⁴Dơ̆ Esau kơno jơnau bèp khai dê, gen khai driau dô jơnau dờng jê nùs tồr ngan mơ đơs mơ bèp lah: “Ơ bèp, ai lơngai añ in tai!”

³⁵Mơya Isak đơs lah: “Oh mê dê neh tus ai bơta pơrlồm mơ neh kơñau bơta lơngai mê dê.”

³⁶Esau đơs lah: “Bơh cau sơnđan khai la Jakôp gen khai neh tòmpìt gơnoar añ jê bàr dơ̆ do rau. Khai neh kơñau gơnoar kòn tơnhoa añ, mơ tai tŭ do kung tòmpìt bơta lơngai lơngò añ jê sơl. Bèp ò lòi bơta lơngai añ in ò ơ?

³⁷Isak ho lah: Do, añ neh bơtào khai at bồ mê, mơ neh ai oh mi khai dê lơh gơs dĭ gơna khai, mơ añ neh rcang gàr kòi mơ tơrnòm khai in. Behơ̆, ñchi bơta añ kòñ lơh mê in taih?”

³⁸Esau lùp Lah: “Ơ bèp! Bèp mìng gơs dô bơta lơngai hơ̆ lơm ơ? Ơ bèp! Dan ai lơngai añ in tai!” Mơ Esau nggà ñìm.

³⁹Isak bèp khai, đơs lah: “Do, di tiah mê ơm ò gơs ù bơkah tiah lơngồt, Mơ ò tơl dà mơryuh bơh đang trồ.

⁴⁰Mê rơp kơnòm di đào sồng kis, Mơ rơp duh broă oh mê in; Mơ tòm tŭ mê lòt nrah nring tềng do tềng dă, Mê rơp dơrpă yô oh mê dê bơh di ngko mê.”

⁴¹Esau gơjrañ kơuềng di Jakôp tài bơh bèp khai ai lơngai Jakôp in, gen đơs tòm nùs lah: “Ală ngai moat bèp dê mòr di, behơ̆ añ rơp tơnchơt Jakôp, oh añ.”

⁴²Cau yal mơ Rebeka ală jơnau Esau đơs, gen Rebeka hòi Jakôp kòn put khai dê mơ đơs lah: “Do, Esau bi mê, kòñ tơnchơt mê nàng sal tê.

⁴³Behơ̆, ơ kòn, tŭ do iat tĕ jơnau añ, ñă dô pồn tòm hìu Laban, bi añ, tòm Caran,

⁴⁴mơ ơm mơ khai tòm dô êt ngai, tus di tŭ lơi jơh bơta gơjrañ bi mê dê.

⁴⁵Tòm tŭ bơta gơjrañ bi mê neh jơh rau, mơ khai hŭi broă mê neh lơh di khai, gen añ rơp sồr mê rê. Mbe lơh añ pal kong roh jơh bàr nă tòm dô ngai ơ?”

⁴⁶Rebeka đơs mơ Isak lah: “Añ neh bòl glar, ò bài kis tai, bơh ală kòn ùr cau Het dê. Dilah Jakôp kòñ bau mơ dô nă tòm ală kòn ùr cau Het dê, hơ̆ la dô nă cau ùr tòm lơgar be ală cau do, gen mbe añ kòñ kis tai taih?”