Read koho Sơnròp Gơlik Gơs 34 Bible Online

Sơnròp Gơlik Gơs 34 - koho bible

Sơnròp Gơlik Gơs 34

¹Dina, kòn ùr Lea neh deh Jakôp in, lik lòt nàng còp ală cau ơruh tòm lơgar hơ̆.

²Sicem, kòn klau Hamor, cau Hebit, kwang lơgar hơ̆, gŏ Dina, gen kup, bic bơklơn mơ khai.

³Nùs nhơm khai gơđềt mơ Dina, kòn ơruh Jakôp; khai kòñ gơboh di cau ơruh hơ̆, mơ ai jơnau niam đơs mơ khai.

⁴Sicem đơs mơ Hamor, bèp khai lah: “Ai tĕ añ in cau ơruh do nàng bau.”

⁵Tŭ hơ̆ Jakôp git lah cau klau neh lơh roh pơnro niam Dina, kòn ơruh khai dê, mơ ală kòn klau khai gam ơm tòm ƀlàng bal mơ phan poan jơng gen khai ơm mŏ mŏ tus di tŭ bol khai rê.

⁶Tòm tŭ hơ̆, Hamor bèp Sicem, tus mơ Jakôp nàng tòmbơhbơr mơ khai.

⁷Ală kòn klau Jakôp rê bơh tòm ƀlàng. Dơ̆ bol khai neh kơno bơh broă hơ̆ gen jê nùs mơ gơjrañ ngan, bơh broă iơh rmơh Sicem neh lơh cau Israel in, bic mơ kòn ơruh Jakôp dê la broă ò di lơh.

⁸Hamor đơs mơ bol khai lah: “Nùs nhơm Sicem, kòn klau añ, neh đềt mềr mơ cau ơruh ală ồng, dan ai tĕ cau ơruh hơ̆ khai in bau.

⁹Tòmbau tĕ nàng gơs gơp bơtiàn bal, ală ồng ai ală cau ơruh bol hi in, gen ală ồng bau mơ ală cau ơruh bol hi dê.

¹⁰Ơm tĕ mơ bol hi, lơgar neh rcang sir ală ồng in, ơm tĕ kă bro mơ lơh gơlik gơs phan mơna tềng hơ̆.”

¹¹Sicem đơs mơ bèp mơ ală lŏ klau cau ơruh dê lah: “Dan ai añ in geh bơta nđàc di đap ală ồng, mơ ñchi bơta ală ồng dan añ rơp ai.

¹²Dan tĕ oă phan kơt lap, mơ phan pà gòi, gen añ rơp ai be jơnau ală ồng dan, mơya ai tĕ cau ơruh hơ̆ añ in nàng bau.”

¹³Ală kòn klau Jakôp ho Sicem mơ Hamor, bèp khai, mơ ai jơnau đơs pơrlồm bol khai, tài bơh Sicem neh lơh roh pơnro niam Dina, oh ùr bol khai dê.

¹⁴Ală bol hơ̆ đơs lah: “Ai oh ùr hi dê cau lơi òhềt siat gơltau in bau, hơ̆ la dô nơm broă ò di pal lơh, tài bơh hơ̆ la dô bơta lơh ƀàssìl ƀàsso bol hi in.

¹⁵Bol hi rơp lơh jat jơnau ală ồng tŭ lơi ală ồng lơh gơlik be bol hi, hơ̆ la kòp nă cau klau pal siat gơltau.

¹⁶Behơ̆, bol hi rơp ai ală cau ơruh bol hi dê ală ồng in, mơ bol hi rơp bau mơ ală cau ơruh ală ồng sơl; gen bol he rơp ơm bal mơ gơlik gơs dô nơm làng bol lơm.

¹⁷Mơ dilah ală ồng ò bài lơh jat jơnau bol hi mơ ò bài siat gơltau, gen bol hi ai wơl cau ơruh mơ lòt ơm tiah ndai.”

¹⁸Ală jơnau bol khai đơs niam nùs Hamor mơ Sicem, kòn klau khai.

¹⁹Cau pơnu hơ̆ ò gơn rlĕ adàr broă hơ̆, bơh kòn ơruh Jakôp niam nùs khai. Cau pơnu do la dô nă kòn geh sền dờng màng rlau jơh tòm hìu bèp khai dê.

²⁰Behơ̆, Hamor mơ Sicem, kòn klau khai, lòt tus di mpồng ƀòn khai dê, mơ đơs be do mơ làng bol tòm ƀòn:

²¹“Ală bol hơ̆ ơm ring lơngai digùl bol he, behơ̆ ai bol khai in ơm tòm lơgar nàng kă bro. Do lơgar kung ơnàng bol khai in ơm, bol he rơp bau mơ cau ơruh bol khai, mơ ai wơl ală kòn ơruh he dê bol khai in,

²²Mơya bol khai kòñ ơm bal mơ bol he nàng gơlik gơs dô nơm làng bol, la tŭ lơi ală cau klau tòm bol he siat gơltau kung be kòp nă cau klau bol khai dê.

²³Gen behơ̆, ală phan poan jơng, ală phan mơna mơ ală phan ròng ndai bol khai dê rơp gơrê bal mơ bol he ò ơ? Bol he lơh jat tĕ bol khai tòm bơta hơ̆ nàng bol khai ơm bal mơ bol he.”

²⁴Kòp nă lik hơ bơdìh mpồng ƀòn he nàng iat Hamor mơ Sicem, kòn klau khai, mơ jơh ală cau klau lik hơ bơdìh mpồng ƀòn kong siat gơltau.

²⁵Tus di ngai pe, tòm tŭ kòp nă jê sồt, gen bàr nă kòn klau Jakôp la Simeôn mơ Lebi, ală bi Dina, bol khai at đào he dê, mut tòm ƀòn tòm tŭ ală cau ơm lơngai mơ sreh jơh ală cau klau.

²⁶Bàr nă bol khai ai đào sreh chơt Hamor mơ Sicem, kòn klau khai dê, ai Dina lik bơh hìu Sicem mơ lòt.

²⁷Bơh bol hơ̆ neh lơh tơnroh pơnro niam oh ơruh bol khai dê; behơ̆, ală kòn klau Jakôp lòt tus jă hơđang ală cau chơt mơ phà kơñau ƀòn hơ̆.

²⁸Bol khai kup ală mpồl belàt kơnrồ, alàng, ală phan tòm ƀòn mơ tòm ƀlàng,

²⁹mơ kup ai jơh phan mơna, ală kơnòm bal mơ cau ùr, kung ai jơh ală phan lơi tòm hìu sơl.

³⁰Gen Jakôp đơs mơ Simeôn mơ Lebi lah: “Bol mê neh lơh añ in ò suk ơm, lơh làng bol tòm lơgar do, la cau Kanaan mơ cau Pherijit, gơlik gơjrañ di añ behơ̆. Añ do gơs dô êt cau lơm. Dilah bol khai pơjum bal mơ lơh añ, gen ngan añ mơ hìu nhă añ rơp gơkòl roh rui.”

³¹Bol khai ho lah: “Bol hi kong jai cau lơh di oh ùr hi be cau dri ơ?”