Read koho Sơnròp Gơlik Gơs 39 Bible Online

Sơnròp Gơlik Gơs 39 - koho bible

Sơnròp Gơlik Gơs 39

¹Cau cèng Jôsep tus hơ lơgar Ejiptơ, gen Pôtiphar cau kwang Pharaôn dê, cau kwang ling, la cau Ejiptơ, blơi khai bơh di ală cau Ismael neh lam khai tus.

²Jôsep ơm tòm hìu cau tòm khai dê la cau Ejiptơ. Yàng Jehôwa ơm bal mơ khai, gen khai gơlik gơs cồng nha sùm.

³Cau tòm khai dê gŏ Yàng Jehôwa ơm bal mơ khai mơ Kơnràñ lơh jơh ală broă bơh tê Jôsep di gơlik cồng nha.

⁴Behơ̆, Jôsep geh bơta nđàc di đap cau tòm khai dê; khai lơh broă cau tòm in. Cau tòm ai khai in gơnoar at bồ hìu, mơ jơh ală phan cau tòm ai khai in sền gàr.

⁵Behơ̆, di tŭ khai ai Jôsep in at bồ hìu mơ jơh ală phan khai dê rau, gen Yàng Jehôwa ai lơngai lơngò hìu nhă khai in tài bơh Jôsep; bơta lơngai lơngò Yàng Jehôwa ơm hơđang jơh ală phan khai dê, bulah tòm hìu hala tòm ƀlàng.

⁶Khai jào jơh ală phan mơna Jôsep in sền gàr; khai ò kơlôi broă lơi tai, mìng ală phan sa khai dê lơm. Mơ Jôsep la hàng mơnĕ, mơ sền khai mơnĕ mơnài.

⁷Tơnơ̆ mơ ală broă do, bau ùr cau tòm sền Jôsep mơ đơs lah: “Lòt tĕ bic mơ añ.”

⁸Jôsep ò bài mơ đơs lah: “Cau tòm añ neh ai jơh ală phan khai dê añ in sền gàr, mơ do khai ò git broă lơi tòm hìu tai.

⁹Tòm hìu do ò gơs cau lơi dờng rlau mơ añ, mơ khai kung ò bơkơ̆u añ bơta lơi, mìng dô nă ai bơh ai la bau cau tòm añ jê. Mbe lơh añ khin lơh bơta iơh bơsak behơ̆, mơ gơs glài mơ Yàng Jehôwa taih?”

¹⁰Khai ơniai Jôsep kòp ngai, mơ Jôsep ò bài jat jơnau khai dê nàng bic hala ơm bal mơ khai dô êt lơi.

¹¹Gơs dô ngai, Jôsep mut tòm hìu nàng lơh broă mơ tŭ hơ̆ ò gơs dô nă cau lơi ơm tòm hìu hơ̆,

¹²gen khai sơmbat di ào Jôsep mơ đơs lah: “Bic tĕ mơ añ!” Mơya Jôsep lòi ào tòm tê cau ùr hơ̆ mơ dô lik di tiah.

¹³Tòm tŭ cau ùr gŏ ào gam di tê khai, mơ Jôsep neh dô lik di tiah,

¹⁴gen khai hòi ală cau tòm hìu nhă khai dê mơ đơs lah: “Sền do! Bau klau añ neh cèng tòm hìu dô nă cau Hebrơ nàng khai bơrcek añ. Khai lòt rềp kòñ bic mơ añ, mơya añ driau dờng.

¹⁵Dơ̆ khai kơno añ nggà driau, gen khai lòi ào di añ, mơ dô lik hơ bơdìh.”

¹⁶Gen khai lòi ào Jôsep di gah khai mơ gơn tus di tŭ cau tòm rê.

¹⁷Khai yal wơl mơ cau tòm be jơnau lài lah: “Cau dĭ Hebrơ mơ mê neh cèng tòm hìu, neh tus rềp nàng bơrcek añ,

¹⁸mơya dơ̆ añ nggà driau, khai lòi ào khai di añ mơ dô lik hơ bơdìh.”

¹⁹Dơ̆ cau tòm Jôsep dê kơno jơnau bau he neh yal lah: “Hơ̆ la cau dĭ mê lơh bơta hơ̆,” gen khai gơhào gơjrañ,

²⁰mơ khai kup Jôsep tơmut tòm hìu jàm, la tiah jàm ală cau tìs glài mơ cau bơtau. Behơ̆, khai ơm jàm tềng hơ̆.

²¹Mơya Yàng Jehôwa ơm bal mơ Jôsep, mơ Kơnràñ yal tơlik bơta kòñ gơboh kơ̆ dơn Kơnràñ dê, mơ ai khai in geh bơta nđàc di đap cau at bồ hìu jàm.

²²Cau at bồ hìu jàm jào jơh ală cau jàm tòm tê Jôsep, ală broă lơi lơh la Jôsep lam lơh.

²³Cau gơnoar at bồ hìu jàm ò sền sơwì tai ală broă lơh neh jào tòm tê Jôsep, tài bơh Yàng Jehôwa ơm bal mơ khai, mơ ai broă lơi khai in lơh gen gơlik gơs cồng nha.