Read koho Sơnròp Gơlik Gơs 4 Bible Online

Sơnròp Gơlik Gơs 4 - koho bible

Sơnròp Gơlik Gơs 4

¹Adam ơm bal mơ Eba, bau ùr khai, Eba bun deh Kain mơ đơs lah: “Kơnòm dê Yàng Jehôwa dong añ gen tàng añ deh dô nă cau klau.”

²Eba deh tai oh Kain, la Abel, la cau ê sền gàr belàt, mơ Kain la cau lơh sre.

³Mơ ơm dô êt jŏ, Kain ai plai bơh ù mơ lơh phan ơn Yàng Jehôwa in.

⁴Abel kung ơn tòm ală belàt tơnhoa tòm mpồl belàt khai dê mơ dơngi gơ dê. Yàng Jehôwa sền gŏ Abel mơ dòp phan ơn khai dê,

⁵mơya ò bài sền Kain mơ kung ò dòp phan ơn khai dê, behơ̆ Kain gơjrañ ngan mơ tun mat.

⁶Yàng Jehôwa lùp Kain lah: “Ñchi bơh tài mê gơjrañ mơ ñchi bơh tài mê tun mat taih?

⁷Dilah mê lơh niam gen mê ò di pò mat sơl ơ? Mơ dilah mê lơh ò niam gen bơta tồi glài kơp brồ tơm bơh bơdìh mpồng, gơboh mê ngan mơya mê pal at bồ gơ.”

⁸Kain đơs mơ Abel oh khai dê. Mơ tòm tŭ bàr nă bol khai ơm tòm ƀlàng, Kain brồ lơh Abel oh khai mơ tơnchơt khai.

⁹Yàng Jehôwa lùp Kain lah: “Ntềng đah Abel oh mê taih?” Khai ho lah: “Añ ò git, añ la cau ê sền gàr oh añ ơ?”

¹⁰Yàng Jehôwa lùp: “Ñchi bơta mê neh lơh taih? Jơnau mhàm oh mê dê bơh tòm ù hòi tus hơ Añ.

¹¹Tŭ do mê rơp kong ù srat sơntơm la ù neh ha bơr hùc mhàm oh mê dê bơh tê mê mơ gơtuh.

¹²Tòm tŭ mê tùc tam phan, ù ò hòn niam mê in; mê rơp dô lòt nrah nring tòm ù.”

¹³Kain đơs mơ Yàng Jehôwa lah: “Bơta lơh glài do kơnjơ̆ ngan, añ kong ò jai.

¹⁴Do, ngai do Yàng neh bơtrơh tơlik añ bơh dê ù do, añ rơp ò gŏ mat Yàng tai. Añ rơp dô lòt nrah nring tòm ù: behơ̆ rơp gơs cau lơi tìp mơ añ, khai rơp tơnchơt añ.”

¹⁵Yàng Jehôwa đơs lah: “Tài bơh hơ̆ dilah gơs cau lơi tơnchơt Kain gen khai kong sal tê tòm poh dơ̆.” Gen Yàng Jehôwa lơh tềl dê să Kain, tồ cau lơi tìp mơ Kain rơp ò tơnchơt khai.

¹⁶Kain lik bơh di đap Yàng Jehôwa, mơ ơm tòm lơgar Not, tòm đah mattơngai lik Eden dê.

¹⁷Mơ Kain ơm bal mơ bau khai, khai bun mơ deh Enôk. Kain bơt bơtào dô nơm ƀòn dờng mơ tơmoh sơnđan la Enôk pơnjat be sơnđan kòn klau khai.

¹⁸Enôk tơnggơs Irat, Irat tơnggơs Mehujael, Mehujael tơnggơs Metusael, Metusael tơnggơs Lemek.

¹⁹Lemek bau bàr nă ùr, dô nă sơnđan la Ada, dô nă sơnđan la Sila.

²⁰Ada deh Jabal, Jabal la ồng pàng ală cau ơm tòm sàl mơ ròng ală mpồl phan poan jơng.

²¹Oh khai la Jubal, ồng pàng ală cau lip kơñi mơ uh kơwào.

²²Mơ Sila kung deh Tubal Kain la cau chài tiar tơl ală phan sồt mơ kòng mơ lòs. Lŏ ùr Tubal Kain la Naama.

²³Mơ Lemek đơs mơ bàr nă bau khai lah: “Ơ Ada mơ Sila! Iat jơnau añ, Do, ală bau ùr Lemek dê ai tồr mơ iat jơnau añ. Añ neh tơnchơt dô nă cau, tài bơh khai lơh jê sồt añ; Mơ dô nă cau pơnu tài bơh pù ur să añ.

²⁴Dilah Kain geh sal tê poh dơ̆, gen Lemek rơp geh sal tê poh jơt poh dơ̆.”

²⁵Adam ơm bal tai mơ bau khai, mơ khai deh dô nă kòn klau sơnđan la Set; bau ùr đơs lah: “Tài bơh Yàng Tom Trồ neh ai añ in dô nă kòn klau ndai ala Abel mơ Kain neh tơnchơt rau.”

²⁶Set kung tơnggơs dô nă kòn klau sơnđan la Enôs. Bơh tŭ hơ̆, kòn mơnus rơp sơntòm hòi dê sơnđan Yàng Jehôwa.