Read koho Sơnròp Gơlik Gơs 45 Bible Online

Sơnròp Gơlik Gơs 45 - koho bible

Sơnròp Gơlik Gơs 45

¹Tŭ hơ̆, Jôsep ò jai ơt di đap ală cau gùt dar gen driau lah: “Tơlik tĕ jơh ală cau!” Dơ̆ Jôsep yal loh să khai oh mi khai in gen ò gơs dô nă cau ndai ơm tềng hơ̆.

²Khai nggà ñìm, làng bol Ejiptơ kơno mơ hìu nhă Pharaôn kung kơno sơl.

³Jôsep yal mơ oh mi khai lah: “Añ la Jôsep. Bèp añ gam kis sơl?” Mơya di đap khai ală oh mi ò suk ơm, ò rgơi ho dô êt lơi.

⁴Mơ khai đơs lah: “Ală oh mi tus rềp tĕ mơ añ.” Gen bol khai tus rềp. Khai đơs lah: “Añ la Jôsep, oh mơ ală bi neh tac lam tus hơ lơgar Ejiptơ.

⁵Tŭ do, bañ kơlôi moat jrùng, mơ kung bañ gơjrañ di să tòm ală bi bơh ală bi neh tac añ tus hơ lơgar do, bơh Yàng Tom Trồ neh sồr añ lòt tus tềng do lài mơ ală bi nàng sền gàr bơta kis ală bi dê.

⁶Ne, neh bàr nam rau gơs jơgloh rung tòm lơgar mơ gam pram nam tai ò gơs lơòr mơ ò gơs toès bơta lơi.

⁷Yàng Tom Trồ neh pơyoa añ lòt tus lài nàng lơh ală bi in gam gơtơrbŏ jơi hơđang ù, bơh dô bơta dong klàs dờng nàng sền gàr bơta kis oh mi in.

⁸Ò di la ală bi neh pơyoa añ tus hơ do ò, hơ̆ la Yàng Tom Trồ. Kơnràñ neh ai añ in gơs bèp Pharaôn dê, at bồ jơh hìu nhă khai, mơ at bồ làm jơh lơgar Ejiptơ.

⁹Ală bi rê mhar tĕ hơ bèp añ mơ yal khai in lah: ‘Jôsep kòn bèp dê neh đơs be do: Yàng Tom Trồ neh ai añ in gơs bơtau tòm làm lơgar Ejiptơ, bèp mù tĕ tus hơ añ, dan bañ òbat nyà.

¹⁰Bèp, ală kòn, ală sau, ală belàt, ală kơnrồ mơ jơh ală phan bèp dê rơp ơm tòm lơgar Gôsen rềp mơ añ.

¹¹Tềng hơ̆ añ rơp ròng bèp, tài bơh gam pram nam jơgloh rung tai, rngòt bèp, hìu nhă bèp, mơ jơh ală phan bèp dê gơkòl jơgloh rƀah.’

¹²Do ală bi mơ Benjamin neh gŏ añ tòm toh mat mơ bơr tòm añ neh tòmbơh mơ oh mi.

¹³Behơ̆ yal tĕ wơl bèp in ală bơta gơklŏ añ jê tòm lơgar Ejiptơ mơ kòp broă oh mi neh gŏ, mơ lam bèp mù tĕ mhar hơ do.”

¹⁴Chòp, khai koar di ngko Benjamin oh khai mơ ñìm, Benjamin kung koar di ngko khai mơ ñìm sơl.

¹⁵Khai kung cum ală bi khai mơ ñìm. Gen oh mi khai tòmbơhbơr mơ khai.

¹⁶Mơ jơnau pơnro tus hơ hìu Pharaôn lah: “Oh mi Jôsep neh tus.” Bơta hơ̆ niam nùs Pharaôn mơ ală cau duh broă khai dê.

¹⁷Gen Pharaôn đơs mơ Jôsep lah: “Sồr tĕ oh mi mê lah: ‘Ơn tĕ phan di alàng mơ rê hơ lơgar Kanaan,

¹⁸rò bèp mơ ală hìu nhă oh mi mê dê mù tus hơ añ. Añ rơp ai oh mi mê in phan mơna màng tòm lơgar Ejiptơ, mơ ală oh mi mê rơp sa phan bơkah lơgar dê.’

¹⁹Ai añ sồr mê yal tĕ wơl mơ bol khai be do: ‘Cèng tĕ rơndeh bơh lơgar Ejiptơ nàng pơdiang ală kòn dềt mơ ală bau bol mê dê, mơ lam bèp ală bol mê mù hơ do.

²⁰Bañ pơlai phan mơna he dê bơh ală phan màng niam rlau jơh tòm lơgar Ejiptơ rơp la phan ală bol mê dê.’”

²¹Ală kòn klau Israel dê lơh jat behơ̆, Jôsep jat jơnau sồr Pharaôn dê, ai oh mi khai in rơndeh mơ phan sa ngui rò gùng.

²²Khai kung ai kòp nă in ào bơsoh mơ khai ai Benjamin in pe rhiang pet priă mơ pram nơm ào bơsoh.

²³Khai kung pơyoa bèp khai in jơt nơm alàng pơdiang ală phan màng tòm lơgar Ejiptơ, mơ jơt nơm alàng me pơdiang kòi, piang lă mơ ală phan nàng bèp khai ai sa rò gùng.

²⁴Behơ̆ Jôsep sồr oh mi khai rê. Mơ khai nting bơr mơ bol khai lah: “Oh mi bañ pơndang bal rò gùng.”

²⁵Ală oh mi bơh lơgar Ejiptơ rê tus lơgar Kanaan, tiah Jakôp bèp bol khai ơm.

²⁶Bol khai yal wơl mơ bèp lah: “Jôsep gam kis, mơ să tòm khai at bồ jơh lơgar Ejiptơ.” Mơ nùs Jakôp ò gơjal bơh khai ò dòn jơnau bol khai yal wơl.

²⁷Bol khai yal wơl jơh ală jơnau Jôsep neh đơs. Dơ̆ Jakôp gŏ ală rơndeh Jôsep neh pơyoa nàng rò khai gen sồng nùs tồr khai kah rngal wơl.

²⁸Gen Israel đơs lah: “Di, añ git rau, Jôsep, kòn klau añ gam kis, añ rơp lòt nàng tìp mơ khai lài mơ tŭ añ chơt.”