Read koho Sơnròp Gơlik Gơs 6 Bible Online

Sơnròp Gơlik Gơs 6 - koho bible

Sơnròp Gơlik Gơs 6

¹Tòm tŭ kòn mơnus neh bơtơl oă hơđang ù mơ kòn mơnus neh tơnggơs oă kòn ùr,

²ală kòn klau Yàng Tom Trồ dê gŏ kòn ùr kòn mơnus dê la hàng mơnĕ gen bau mơ cau lơi di nùs bol khai.

³Yàng Jehôwa đơs lah: “Hwềng Añ rơp ò ơm sùm tòm kòn mơnus, bơh kòn mơnus la poac să lơm, rài kòn mơnus rơp la dô rhiang bàr jơt nam dang.”

⁴Rài hơ̆ mơ rài tơnơ̆, gơs cau dờng jơnhoa hơđang ù tài bơh kòn klau Yàng Tom Trồ dê ơm bal mơ kòn ùr kòn mơnus mơ deh kòn; hơ̆ la ală cau pràn kơldang tòm rài yau, cau gơs tiơng pơnro.

⁵Yàng Jehôwa gŏ bơta iơh bơsak kòn mơnus dê tòm ù la oă ngan, mơ ală bơta kơlôi sơnơng tòm nùs cau dê mìng la iơh sùm lơm.

⁶Gen Yàng Jehôwa tòmgơl nùs Kơnràñ neh crơng gơs kòn mơnus hơđang ù mơ moat jrùng tòm nùs.

⁷Yàng Jehôwa đơs lah: “Añ rơp tơnroh bơh di ù kòn mơnus mơ Añ neh crơng gơs tus dê phan poan jơng, phan wìn nsròng, sềm hơđang trồ bơh Añ tòmgơl nùs neh crơng gơs ală jơi hơ̆.”

⁸Mơya Nôe geh bơta nđàc di đap Yàng Jehôwa.

⁹Do la jơi bơtiàn Nôe dê. Nôe tòm rài khai la dô nă cau song ring mơ wil tơl ngan, mơ khai lòt bal mơ Yàng Tom Trồ.

¹⁰Nôe tơnggơs pe nă kòn klau la Sem, Cam mơ Japhet.

¹¹Tòm tŭ hơ̆ lơgar dunnia la ngkòr ngkàc di đap Yàng Tom Trồ mơ bềng lìu bơta jàñ bơsak.

¹²Mơ Yàng Tom Trồ sền lơgar dunnia, gŏ bơta ngkòr ngkàc tài bơh jơh ală poac să lơh ngkòr ngkàc gùng he tòm ù.

¹³Gen Yàng Tom Trồ đơs mơ Nôe lah: “Bơta lồi dut jơh poac să dê neh tus di đap Añ, tài bơh kòn mơnus lơh ù tiah bềng lìu bơta jàñ bơsak, behơ̆ Añ rơp tơnroh bol khai bal mơ ù sơl.

¹⁴Mê lơh tĕ dô nơm ơhò mơ chi gôphe, lơh gơs ală ơdŭ, gen lềr mơ cài tòm dơlam mơ đah bơdìh.

¹⁵Behơ̆ lơh tĕ jat be do: jòng ròt ơhò pe rhiang tal, ơnàng dra pram jơt tal jơnhoa pe jơt tal.

¹⁶Hơđang ơhò mê rơp lơh dô nơm mpồng dềt, jơnhoa dô tal mơ lơh gơs dô nơm mpồng dềt di gah ơhò; mê rơp lơh dô tap tòm tiah, dô tap digùl mơ dô tap hơđang.

¹⁷Mơ Añ, Añ rơp lam dà kŏ làm jơh hơđang ù nàng tơnroh ală poac să gơs nhơm kis tòm tiah trồ; jơh ală phan ơm hơđang ù gơ rơp chơt jơh.

¹⁸Mơya Añ rơp lơh bơta ho bal mơ mê, gen mê mơ bau mê, ală kòn mơ ală ƀan mê dê rơp mut tòm ơhò.

¹⁹Mơ ală phan kis, mê rơp lam gơ mut tòm ơhò kòp jơi dô yô, gơs dam gơs me nàng ơm bal mơ mê tồ mê in sền gàr bơta kis gơ dê.

²⁰Sềm pơnjat be jơi gơ, phan poan jơng tòm hìu pơnjat be jơi gơ, phan wìn nsròng pơnjat be jơi gơ, kòp bơta gơs bàr nơm rơp lòt tus mơ mê nàng mê in sền gàr bơta kis gơ.

²¹Mơ tai, mê ai tĕ ală bơta phan sa mơ cèng bal nàng ngui lơh phan sa bol mê in mơ ală phan hơ̆ in.”

²²Nôe lơh ală broă do be jơnau Yàng Tom Trồ neh sồr.