Read koho Sơnròp Gơlik Gơs 8 Bible Online

Sơnròp Gơlik Gơs 8 - koho bible

Sơnròp Gơlik Gơs 8

¹Mơya Yàng Tom Trồ kah wơl Nôe mơ jơh ală phan poan jơng tòm brê, mơ ală phan poan jơng tòm hìu ơm bal mơ khai tòm ơhò, gen Yàng Tom Trồ lơh dô nơm càl khồm rbơt hơđang ù gen dà gơ mù.

²Ală dà cat bơh cìr mơnồng mơ ală tơrnil dà hơđang trồ til wơl, mìu bơh trồ ò dùh tai.

³Dà rhòi rhòi soat bơh dê ù mơ tơnơ̆ mơ tŭ dô rhiang pram jơt ngai dà gơ soat.

⁴Tòm ngai jơt poh, kơnhai poh hơ̆ ơhò ơm hơđang ală mơnơm Ararat dê.

⁵Mơ dà soat rhòi rhòi tus dê kơnhai jơt, tòm ngai dùl kơnhai hơ̆, mpòl ală bồ mơnơm.

⁶Tơnơ̆ poan jơt ngai, Nôe pò mpồng dềt khai neh lơh dê ơhò,

⁷mơ tơlik dô nơm kơnđà, mơ gơ par ma kiau tus dê tŭ dà soat hơđang ù.

⁸Mơ khai kung tơlik dô nơm ntòp sơl nàng lòng sền dà soat tòm ù hala òhềt.

⁹Mơya ntòp jòi ò gơs tiah lơi nàng rơp gen gơ par rê wơl mơ khai tòm ơhò, tài bơh dà gam bềng làm hơđang ù. Nôe pò tê kup wơl ntòp mơ tơmut wơl tòm ơhò bal mơ khai.

¹⁰Khai gơn poh ngai tai, gen tơlik wơl ntòp bơh ơhò;

¹¹tus dê mho ntòp rê wơl mơ khai, mơ do, tòm sơmoar gơ gơs dô nơm nha ôlibe tơlir, gen Nôe git dà mòr soat bơh dê ù.

¹²Khai gơn poh ngai tai, gen tơlik ntòp, mơ gơ ò tai rê wơl mơ khai.

¹³Tòm ngai dùl, kơnhai dùl, nam prau rhiang mơ dùl rài Nôe dê, dà neh soat bơh dê ù, gen Nôe pò rkàng ơhò mơ sền; ne, ù neh rañ.

¹⁴Tòm ngai bàr jơt poh kơnhai bàr, ù neh rañ rsơh rau.

¹⁵Gen Yàng Tom Trồ đơs mơ Nôe lah:

¹⁶“Lik tĕ bơh ơhò, mê, bau mê, ală kòn mơ ală ƀan mê dê.

¹⁷Lam lik tĕ bal mơ mê jơh ală phan kis neh ơm bal mơ mê: sềm, phan poan jơng tòm hìu, phan wìn nsròng hơđang ù, tồ bol gơ in ơm làm hơđang ù, mơ tơnggơs mơ bơtơl oă hơđang ù.”

¹⁸Behơ̆, Nôe mơ bau khai, ală kòn klau mơ ală ƀan khai lik bơh dê ơhò.

¹⁹Jơh ală phan poan jơng, jơh ală phan wìn nsròng, jơh ală sềm mơ jơh ală phan wañ hơđang ù pơnjat be jơi gơ gen lik bơh dê ơhò.

²⁰Nôe lơh dô nơm cơnòng duh khoai Yàng Jehôwa in. Khai kup ală phan poan jơng goh, ală sềm goh, ơn phan chu duh khoai hơđang cơnòng duh khoai.

²¹Yàng Tom Trồ ƀô kơnhồl bơlhu mơ đơs tòm nùs Kơnràñ lah: “Añ ò srat sơntơm ù bơh kòn mơnus tai, bơh ală bơta kơlôi tòm nùs kòn mơnus la iơh bơsak bơh tòm tŭ gam kơnòm, Añ rơp ò tơnroh tai ală phan kis be Añ neh lơh.

²²Tòm tŭ plai ù gam gơs, gen kơnhai sih mơ kơnhai toès, mrềt mơ duh, kơnhai duh mơ kơnhai noat, ngai mơ mang, rơp ò gơs tŭ lơi jơh.”