Read koho II Samuel 1 Bible Online

II Samuel 1 - koho bible

II Samuel 1

¹Tơnơ̆ mơ tŭ Sol neh chơt mơ Dabit neh pha rlau mơ cau Amalek rau, gen khai rê wơl mơ ơm tòm Jiklak tòm bàr ngai.

²Tòm ngai dơ̆ pe, gơs dô nă cau tus bơh sàl ling Sol dê, ồi ào neh sèt mơ bồ bềng thul. Tòm tŭ khai tus di đap Dabit gen khai tơmbic să di ù mơ khoai.

³Dabit lùp khai lah: “Mbơh mê tus taih?” Khai ho lah: “Añ neh dô klàs bơh di sàl ling Israel.”

⁴Dabit đơs mơ khai lah: “Mbe broă neh gơlik gơs? Yal tĕ añ in git!” Khai yal lah: “Ală cau ling neh dô bơh tiah tòmlơh, mơ kung gơs oă cau neh gơpừ chơt. Sol mơ Jônathan kòn klau khai dê kung neh chơt sơl.”

⁵Gen Dabit đơs mơ cau pơnu neh cèng jơnau yal hơ̆ lah: “Mbe mê rgơi git Sol mơ kòn klau khai dê neh chơt taih?”

⁶Cau pơnu ho lah: “Tòm tŭ añ ơm hơđang mơnơm Gilbôa, tŭ hơ̆ añ gŏ Sol sơnđìng să khai di ngkơr tà khai dê, gơs ală rơndeh lòs tòmlơh mơ ală cau ling hào ơseh ting jat mòr bàn khai.

⁷Khai wơlke gŏ añ gen hòi añ. Añ ho lah: ‘Gơs añ do.’

⁸Khai lùp añ: ‘Mê la ñcau?’ Añ ho lah: ‘Añ la cau Amalek.’

⁹Khai đơs tai: ‘Tus rềp tĕ tơnchơt añ, bơh añ jơngoài mat mơ gam kis.’

¹⁰Behơ̆, añ tus hơđang khai mơ tơnchơt khai, tài bơh añ git khai neh kong sồt mơ ò rgơi kis tai. Gen añ tă sơgơn bơtau hơđang bồ khai mơ kòng màh di tơwòr tê khai mơ cèng jơh tềng do cau tòm añ in.”

¹¹Gen Dabit mơ jơh ală cau bal mơ khai crè ồi ào he dê.

¹²Bol khai pơt wòl ñìm rac, mơ ơt sa jơl tus di trồ mho bơh Sol, bơh Jônathan kòn klau khai, bơh làng bol Yàng Jehôwa dê, mơ bơh hìu Israel, tài bơh bol khai neh kong sreh tơnchơt bơh đào.

¹³Dabit đơs mơ cau pơnu neh cèng jơnau yal do lah: “Mbơh mê tus taih?” Khai ho lah: “Añ la kòn klau dô nă cau làng bol bơdìh, dô nă cau Amalek.”

¹⁴Dabit lùp khai lah: “Ñchi bơh tài mê ò rngòt pò tê tơnchơt cau geh bong mơñà Yàng Jehôwa dê taih?”

¹⁵Gen Dabit hòi dô nă cau bal mơ khai mơ đơs lah: “Tus tĕ rềp, tơnchơt khai!” Behơ̆ cau Dabit dê brồ lơh cau hơ̆ mơ khai chơt.

¹⁶Dabit đơs mơ khai lah: “Mhàm mê dê tuh wơl hơđang bồ mê! Bơr tòm mê dê neh lơh cơng tòmdră mơ mê, bơh mê neh đơs lah: ‘Añ neh tơnchơt cau geh bong mơñà Yàng Jehôwa dê.’”

¹⁷Dabit đơs jơnau ñìm rac do bơh Sol mơ bơh Jônathan kòn klau Sol dê.

¹⁸Mơ sồr bơto ală cau Juda in jơnau ñìm rac do jat sap đơs sơnđan la àtak mơ geh cih tòm sră Jasar lah:

¹⁹“Ơ Israel, bơta gơklŏ mê dê gơkòl sreh tơnchơt hơđang ală tiah jơnhoa mê dê. Mbe gơlơh ală cau gơnoar pràn neh kong gơpừ taih?

²⁰Bañ yal jơnau do tòm Gat, bañ yal jơnau hơ̆ tòm ală gùng Askalôn dê, rngòt ală kòn ùr cau Philistin dê chò hòp, rngòt ală kòn ùr cau ò kong siat gơltau dê hòn chò.

²¹Ơ ală mơnơm Gilbôa dê, Dan dà mơryuh mơ dà mìu bañ dùh hơđang bol mê, kung bañ gơs ƀlàng sre tơnggơs gar lơh gơs phan ơn duh khoai. Bơh tềng hơ̆ khèl cau gơnoar pràn dê neh kong dơñŏ tơnhial, hơ̆ la khèl Sol dê, rơp ò tai geh bong mơñà ò.

²²Àtak Jônathan dê ò tŭ lơi rê wơl, mơ ò gơđềt mhàm cau gơkòl kong sreh chơt; mơ đào Sol dê ò rê wơl, mơ ò gơđềt dơngi cau gơnoar pràn dê.

²³Sol mơ Jônathan kòñ gơboh mơ đềt mềr; Tòm tŭ gam kis mơ tòm tŭ chơt bol khai ò cah is. Bol khai sơrbac sơrbang rlau mơ ală klàng bung, Bol khai pràn kơldang rlau mơ ală klìu triă!

²⁴Ơ ală kòn ùr Israel dê, ñìm tĕ bơh Sol, Khai neh tơnsoh bol ai in ồi ào dà phồng màng ryŭ. Khai bơka ồi ào bol ai dê mơ màh.

²⁵Mbe cau gơnoar pràn neh gơpừ tòm tiah tòmlơh taih? Jônathan gơkòl sreh tơnchơt hơđang ală tiah jơnhoa bol ai dê taih?

²⁶Ơ Jônathan bi añ, añ jê nùs ngan tài bơh bi. Bi neh kòñ gơboh đềt mềr mơ añ. Bơta kòñ gơboh bi dê gơwèt mơ añ la krơi is crih crài, krơi is crih crài rlau mơ bơta kòñ gơboh di cau ùr.

²⁷Mbe gơlơh ală cau gơnoar pràn neh gơpừ taih? Mbe gơlơh ală phan tòmlơh neh roh rui taih?”