Read koho II Samuel 10 Bible Online

II Samuel 10 - koho bible

II Samuel 10

¹Tơnơ̆ mơ hơ̆, bơtau cau Ammôn sang rài, mơ Hanun kòn klau khai dê pơrdòn sơbàn.

²Dabit đơs lah: “Añ rơp yal tơlik bơta dòn song gơwèt mơ Hanun kòn klau Nahas, kung be bèp khai neh dòn song mơ añ.” Behơ̆ Dabit sồr ală cau ala mat khai lòt tus nàng pơndòm pơniang khai bơh bơta chơt bèp khai dê. Tòm tŭ ală cau ala mat Dabit dê neh tus tòm lơgar Ammôn,

³ală kwang at bồ cau Ammôn đơs mơ Hanun, cau tòm bol khai dê lah: “Ồng kơlôi ngan lah Dabit sồr ală cau tus mơ ồng nàng tòmpà bơta moat jrùng la tài bơh khai ki ngàm di bèp ồng dê ơ? Dabit ò di neh sồr bol khai tus hơ ồng nàng sền sơwì ƀòn dờng mơ rwang còp gơ nàng phà tơnroh gơ ò ơ?”

⁴Behơ̆ Hanun kup ală cau Dabit dê, koah nggùl sơnò tềp kòp nă bol khai, koh digùl ală ồi ào bol khai tus di bơnô bol khai dê mơ bơtrơh bol khai rê wơl.

⁵Tòm tŭ cau yal wơl bơta hơ̆ Dabit in, khai sồr ală cau kong sồr lòt rò ală cau hơ̆, bơh bol khai ƀàssìl ƀàsso dờng ngan. Bơtau đơs lah: “Ơm tĕ tòm Jerikô jơl tus di tŭ sơnò tềp bol mê neh gơcat gen sồng rê wơl.”

⁶Tòm tŭ cau Ammôn gŏ bol khai neh gơlik gơs bơta cù kìr gơwèt mơ Dabit, gen cau Ammôn sồr cau lòt ơpah cau Aram tòm Bet Rehôp mơ Jôba bàr jơt rbô ling lòt jơng, kung bơh bơtau Maaka dô rbô nă, bơh lơgar Top jơt bàr rbô nă.

⁷Tòm tŭ Dabit kơno bơh bơta hơ̆ gen sồr Jôap mơ jơh mpồl ling bal mơ jơh ală cau ling jak tòmlơh.

⁸Cau Ammôn lik lòt mơ guh tòm tiah tòmlơh rơndap di mpồng mut tòm ƀòn dờng, mơya cau Aram bơh Jôba mơ bơh Rehôp mơ ală cau bơh Top mơ bơh Maaka bol khai ơm is tòm ƀlàng bơdìh ƀòn dờng.

⁹Tòm tŭ Jôap gŏ gơs bơta rơndap tòmlơh tòmdră mơ khai kơp brồ bơh đah hơđap mơ đah ngkòi, gen khai sac ală cau jak tòmlơh tòm mpồl ling Israel dê, mơ sồr bol khai rcang tòmlơh mơ cau Aram.

¹⁰Mpồl ling gam wơl khai ơn tòm gơnoar at bồ Abisai oh khai dê, mơ khai rơndap bol khai lòt tòmlơh mơ cau Ammôn.

¹¹Khai đơs mơ Abisai lah: “Dilah cau Aram pràn rlau mơ añ gen mê pal tus dong añ, mơya dilah cau Ammôn pràn rlau mơ mê gen añ rơp tus nàng dong mê.

¹²Lơh tĕ pràn kơldang mơ bol he khin cha tĕ tòmlơh tài bơh làng bol bol he dê mơ ală ƀòn dờng Yàng Tom Trồ bol he dê; mơ dan Yàng Jehôwa lơh bơta lơi niam nùs Kơnràñ.”

¹³Behơ̆, Jôap bal mơ mpồl ling lòt bal mơ khai lòt tus hơđap nàng tòmlơh mơ cau Aram; mơ cau Aram ntoat dô bơh di đap khai.

¹⁴Tòm tŭ cau Ammôn gŏ cau Aram neh dô, gen bol khai kung ntoat dô bơh di đap Abisai mơ dô mut tòm ƀòn dờng. Gen Jôap rê wơl bơh bơta tòmlơh mơ cau Ammôn mơ tus hơ Jerusalem.

¹⁵Mơya tòm tŭ cau Aram gŏ bol khai neh kong lơh alah bơh cau Israel, gen bol khai pơjum tơrgòm wơl.

¹⁶Hadadejer sồr cèng cau Aram bơh đah ne hiòng Ơphrat; bol khai tus hơ Helam, gơs Sôbak la cau kwang at bồ jơh mpồl ling Hadadejer dê at bồ bol khai.

¹⁷Tòm tŭ Dabit kơno bơh bơta hơ̆ gen khai pơjum jơh ală cau Israel, lòt gan hiòng Jordan, mơ lòt tus hơ Helam. Cau Aram rơndap mpồl ling bol khai dê tòmlơh mơ Dabit.

¹⁸Cau Aram ntoat dô di đap cau Israel, mơ Dabit tơnchơt poh rhiang nă cau ling at rơndeh tòmlơh cau Aram dê mơ poan jơt rbô nă cau ling hào ơseh. Mơ Sôbak cau kwang at bồ jơh mpồl ling bol khai dê gơkòl jê sồt mơ chơt tềng hơ̆.

¹⁹Tòm tŭ jơh ală cau bơtau la cau duh broă Hadadejer dê gŏ bol khai neh kong Israel lơh alah, gen bol khai bơtào bơta ho bal ơm ring lơngai mơ cau Israel mơ kong duh broă bol khai. Behơ̆ cau Aram rngòt ò dong cau Ammôn tai.