Read koho II Samuel 12 Bible Online

II Samuel 12 - koho bible

II Samuel 12

¹Yàng Jehôwa sồr Nathan lòt tus hơ Dabit. Khai tus hơ Dabit gen đơs lah: “Tòm dô nơm ƀòn dờng ne gơs bàr nă cau, dô nă pas mơ dô nă rƀah.

²Cau pas gơs oă ngan belàt mơ kơnrồ,

³mơya cau rƀah ò gơs phan lơi rlau mơ dô nơm belàt dra dềt mơ khai neh blơi. Khai ròng siam gơ; gơ rhòi dờng bal mơ khai mơ ală kòn khai dê. Gơ sa phan khai sa, hùc phan khai hùc, tian gơs gơ bic tòm tơwòr tê khai dê. Gơ gơlơh kung be kòn ùr khai dê.

⁴Tŭ hơ̆, gơs dô nă cau nac neh tus hơ cau pas, mơya cau pas ò bài kup dô nơm tòm mpồl belàt khai dê nàng rcang phan sa yò cau nac in neh tus hơ khai. Sơlơ̆u wơl, cau pas neh kup belàt dra gơrê bal mơ cau rƀah nàng rcang phan sa yò cau nac in neh tus hơ khai.”

⁵Dabit gơhào gơjrañ ngan di cau hơ̆, mơ đơs mơ Nathan lah: “Di ngan kung be Yàng Jehôwa kis, cau neh lơh bơta hơ̆ pal kong chơt!

⁶Khai pal tơm wơl poan dơ̆ rlau mơ khà priă blơi belàt kòn tài bơh khai neh lơh bơta hơ̆ mơ ò gơs nùs nđàc sơngit.”

⁷Nathan đơs mơ Dabit lah: “Bơtau la cau hơ̆! Jehôwa Yàng Tom Trồ Israel dê neh đơs be do: ‘Añ neh bong mơñà mê in gơs bơtau Israel mơ neh dong tă mê klàs bơh di tê Sol.

⁸Añ neh ai mê in hìu cau tòm mê dê, jào tòm tê mê ală bau ùr cau tòm mê dê. Añ ai mê in hìu Israel mơ hìu Juda. Mơ dilah jơh ală bơta hơ̆ gam ò tơl, Añ rơp ai mê in oă rlau tai.

⁹Ñchi bơh tài mê sền òsơp di jơnau đơs Yàng Jehôwa dê mơ lơh bơta iơh di đap mat Kơnràñ taih? Mê neh ngui đào tơnchơt Uria cau Hetit mơ kup bau ùr khai lơh gơs bau ùr mê dê. Mê neh tơnchơt khai bơh đào cau Ammôn dê.

¹⁰Gen tàng tŭ do, đào rơp ò tŭ lơi lik ngài bơh di hìu mê, tài bơh mê neh sền òsơp di Añ, neh kup bau ùr Uria cau Hetit lơh gơs bau ùr mê dê.’

¹¹Yàng Jehôwa đơs be do: ‘Añ rơp tơngguh bơta rung rài tòmdră mơ mê bơh dơlam hìu nhă mê dê. Añ rơp kup ală bau ùr mê dê bơh di đap mê, mơ ai cau ơm rềp mê in, mơ khai rơp bic mơ ală bau ùr mê dê tòm trồ ngai.

¹²Mê neh lơh bơta hơ̆ dô bă ndơp ndơr, mơya Añ rơp lơh bơta do di đap Israel tòm trồ ngai.’”

¹³Dabit đơs mơ Nathan lah: “Añ neh tìs glài mơ Yàng Jehôwa.” Nathan ho lah: “Yàng Jehôwa neh sang tồi glài bơtau dê; bơtau rơp ò chơt.

¹⁴Bulah behơ̆, bơta do bơtau neh lơh kai nàng ală cau sò tơm di Yàng Jehôwa đơs tràl sơrbil di Kơnràñ, gen tàng kòn klau neh deh bơtau in rơp chơt.”

¹⁵Gen Nathan rê hìu. Yàng Jehôwa lơh kòn dềt mơ bau ùr Uria neh deh Dabit in, mơ khai gơs kòp jê kơnjơ̆.

¹⁶Dabit hòi dan mơ Yàng Tom Trồ kòn dềt hơ̆ in. Khai ơt sào, mut tòm hìu mơ bic tòm ù mang àng.

¹⁷Ală cau kwang kra tòm hìu nhă khai dê ntào di gah khai nàng yò tơngguh khai bơh di ù, mơya khai ò bài, mơ kung ò sa phan sa lơi bal mơ bol khai.

¹⁸Tòm ngai dơ̆ poh kòn dềt chơt. Ală cau duh broă Dabit ò khin yal khai in git bơh kòn dềt neh chơt, bơh bol khai kơlôi lah: “Tŭ kòn dềt gam kis, bol he neh đơs mơ bơtau mơya bơtau ò bài iat bol he. Mbe bol he rgơi khin yal mơ bơtau lah kòn dềt neh chơt taih? Rngòt bơtau lơh bơta lơi ò niam khai in đa!”

¹⁹Mơya Dabit gŏ ală cau duh broă khai dê đơs chều mơ gơp mơ khai đal git lah kòn dềt neh chơt, gen lùp lah: “Kòn dềt neh chơt rau sơl?” Bol khai ho lah: “Ơi, khai neh chơt rau.”

²⁰Gen Dabit guh bơh ù. Tơnơ̆ mơ tŭ khai neh um dà, bong mơñà ƀô, mơ tòmgơl ồi ào; khai lòt tus tòm hìu Yàng Jehôwa dê nàng duh khoai. Gen khai rê wơl hìu khai dê mơ sồr cau yò sa khai in, mơ khai neh sa.

²¹Ală cau dĭ duh broă khai dê lùp khai lah: “Ñchi bơh tài bơtau lơh behơ̆ taih? Tòm tŭ kòn dềt gam kis, bơtau ơt sa mơ ñìm, mơya tŭ do kòn dềt neh chơt rau gen bơtau guh wơl mơ sa!”

²²Bơtau ho lah: “Tòm tŭ kòn dềt gam kis, añ neh ơt sa mơ ñìm. Añ kơlôi lah: ‘Ñcau rgơi git taih? Digơlan Yàng Jehôwa nđàc sơngit di añ mơ lòi kòn dềt in kis.’

²³Mơya tŭ do khai neh chơt rau, ñchi bơh tài añ pal ơt sa taih? Añ rgơi cèng khai rê wơl sơl ơ? Añ rơp lòt tus hơ khai, mơya khai ò rê wơl mơ añ ò.”

²⁴Gen Dabit pơndòm pơniang Batseba, bau ùr khai dê, mơ tus bic mơ khai. Khai tơnggơs dô nă kòn klau, mơ bol khai tơmoh sơnđan kòn klau hơ̆ la Salômôn. Yàng Jehôwa kòñ gơboh di Salômôn,

²⁵mơ tài bơh Yàng Jehôwa kòñ gơboh di khai, Kơnràñ sồr cau gơnoar hwơr Nathan tus tơmoh sơnđan khai la Jedidia.

²⁶Tŭ hơ̆ Jôap tòmlơh mơ Rapba cau Ammôn dê, mơ neh tòmpìt ai ƀòn dờng cau bơtau dê.

²⁷Gen khai sồr cau kong sồr tus hơ Dabit mơ đơs lah: “Añ neh tòmlơh mơ Rapba mơ neh tòmpìt ai ƀòn dờng di gah hiòng rau.

²⁸Tŭ do, bơtau pơjum tơrgòm tĕ ală mpồl ling gam wơl, gơrwàng ƀòn dờng mơ kup ai gơ. Dilah ò gen añ rơp tòmpìt ai gơ mơ gơ rơp geh sơnđan jat sơnđan añ.”

²⁹Behơ̆ Dabit pơjum tơrgòm jơh dô mpồl ling mơ lòt tus lơh Rapba, brồ lơh mơ tòmpìt ai gơ.

³⁰Khai tă sơgơn bơtau bơh di bồ rùp yàng Milkom dê, sơgơn hơ̆ kơnjơ̆ dô talơng màh, gơs bơka ală lŭ màng, Dabit ndau gơ hơđang bồ khai dê. Khai tòmpìt ai oă ngan phan mơna bơh di ƀòn dờng,

³¹khai cèng tơlik làng bol neh ơm tềng hơ̆, mơ sồr bol khai duh broă kơnjơ̆ mơ rơnđòt, jơlèng mơ sùng lòs, mơ sồr lơh gac. Khai lơh behơ̆ tòm jơh ală ƀòn dờng cau Ammôn sơl. Gen Dabit mơ jơh dô mpồl ling khai dê rê wơl hơ Jerusalem.