Read koho II Samuel 5 Bible Online

II Samuel 5 - koho bible

II Samuel 5

¹Gen jơh ală jơi bơtiàn Israel tus hơ Dabit tòm Hebrôn, mơ đơs lah: “Sền do, bol hi la poac mhàm tòm bơtau dê.

²Bơh lài òr, tòm tŭ Sol gam at bồ bol hi, bơtau la cau neh lam Israel tòm ală bơta tòmlơh. Yàng Jehôwa neh đơs mơ bơtau lah: Mê rơp ê gàr làng bol Israel Añ jê, mơ mê rơp gơlik gơs cau at bồ hơđang Israel.”

³Behơ̆ jơh ală cau kwang kra Israel neh tus mơ bơtau tòm Hebrôn; mơ bơtau Dabit lơh dô bơta ho bal mơ bol khai tòm Hebrôn di đap Yàng Jehôwa, mơ bol khai bong mơñà Dabit in lơh bơtau hơđang Israel.

⁴Dabit tơl pe jơt nam tòm tŭ khai sơntòm at bồ, mơ khai at bồ poan jơt nam.

⁵Tòm Hebrôn, Dabit at bồ hơđang Juda poh nam mơ prau kơnhai; mơ tòm Jerusalem khai at bồ hơđang jơh Israel mơ Juda pe jơt pe nam.

⁶Dabit mơ ală cau khai dê lòt tus hơ Jerusalem nàng brồ lơh cau Jebusit. Cau Jebusit đơs mơ Dabit lah: “Mê rơp ò geh mut tòm do; mìng cau jơngo mat mơ cau kwet gơlte kung rgơi lơh tơrwơl mê!” Kơlôi lah: “Dabit ò rgơi mut tòm do.”

⁷Bulah behơ̆ Dabit tòmpìt ai theng kơ̆ cê Siôn la ƀòn dờng Dabit dê.

⁸Tòm ngai hơ̆ Dabit neh đơs lah: “Cau lơi lơh pha mơ cau Jebusit gen lòi khai guh jat gùng lòt ai dà nàng brồ lơh ală cau kwet mơ cau jơngo mat la ală cau sò tơm Dabit dê.” Gen tàng bol khai đơs lah: “Cau jơngo mat mơ cau kwet gơlte rơp ò mut tòm hìu.”

⁹Gen Dabit tòmpìt mơ mut ơm tòm theng kơ̆ cê mơ tơmoh sơnđan gơ la ƀòn dờng Dabit. Khai bơt dơrñang gùt dar bơh Milô tus di tiah dơlam.

¹⁰Mơ Dabit sơlo ơm sơlo pràn rlau, tài bơh Jehôwa la Yàng Tom Trồ Gơnap Gơnoar Hơđang Jơh ơm bal mơ khai.

¹¹Hiram bơtau Tirơ, sồr cau kong sồr lòt tus hơ Dabit, cèng bal chi nho rề, ală cau chài lơh chi, cau chài bơt lŭ nàng bơt dô nơm gơlang Dabit in.

¹²Gen Dabit đal git lah Yàng Jehôwa neh bơtào kơ̆ khai lơh gơs bơtau at bồ hơđang Israel, mơ Kơnràñ neh yò tơngguh lơgar bơtau khai dê, tài bơh làng bol Israel Kơnràñ dê.

¹³Tòm Jerusalem, tơnơ̆ mơ tŭ Dabit lòt bơh Hebrôn, khai jòi bơtơl tai ală bau cồng mơ bau ùr; tơnggơs ală kòn klau mơ ală kòn ùr bơtơl tai khai in.

¹⁴Do la sơnđan ală kòn klau neh deh khai in tòm Jerusalem: Samua, Sôbap, Nathan, Salômôn,

¹⁵Ibhar, Elisua, Nephek, Japhia,

¹⁶Elisama, Eliada, mơ Eliphelet.

¹⁷Tòm tŭ cau Philistin kơno lah Dabit geh bong mơñà lơh bơtau hơđang Israel, jơh ală cau Philistin guh jòi Dabit, mơya Dabit neh kơno bơta hơ̆ mơ khai mù tus hơ theng kơ̆ cê.

¹⁸Cau Philistin neh tus mơ ơm làm tòm thòng Rephaim.

¹⁹Dabit hòi lùp Yàng Jehôwa lah: “Añ pal guh mơ brồ lơh cau Philistin sơl? Kơnràñ rơp jào phi bol khai tòm tê añ sơl?” Yàng Jehôwa ho khai lah: “Lòt tĕ, bơh Añ rơp jào phi cau Philistin tòm tê mê.”

²⁰Behơ̆ Dabit lòt tus hơ Baal Perajim, mơ Dabit lơh alah bol khai. Khai đơs lah: “Yàng Jehôwa neh brồ lơh ală cau sò tơm añ di đap añ ò gơkrơi kung be dà tih ngŏ lìu làc.” Gen tàng tiah hơ̆ sơnđan la Baal Perajim.

²¹Cau Philistin sang lòi ală rùp ràk bol khai dê tềng hơ̆, Dabit mơ ală cau kwang ling khai dê ai cèng jơh.

²²Dô dơ̆ tai cau Philistin tus ơm làm tòm thòng Rephaim.

²³Behơ̆ Dabit hòi lùp Yàng Jehôwa mơ Kơnràñ ho lah: “Mê bañ guh song di đap bol khai, mơya lòt dar tĕ đah ngkòi bol khai, di đap ală tòm chi bơñàng.

²⁴Tŭ lơi mê kơno ntas jơng cơnđòa lòt hơđang cồng ală tòm chi bơñàng, gen bol mê pal rcang; bơh tŭ hơ̆ Yàng Jehôwa neh lik lòt di đap bol mê nàng brồ lơh mpồl ling Philistin dê.”

²⁵Dabit neh lơh jat tòm toh be jơnau Yàng Jehôwa neh sồr khai, mơ khai lơh gơprah jơh cau Philistin bơh Geba jơh rò gùng tus hơ Gejer.