Read koho II Samuel 6 Bible Online

II Samuel 6 - koho bible

II Samuel 6

¹Dabit pơjum tai jơh ală cau geh sac rwah Israel dê, pe jơt rbô nă.

²Dabit mơ jơh ală cau ơm bal mơ khai lik lòt bơh Baale gơrê mơ Juda nàng cèng brê Đài Bơta Ho Bal Yàng Tom Trồ dê bơh tềng hơ̆, la đài geh tơmoh jat sơnđan Yàng Jehôwa Gơnap Gơnoar Dờng Làm Jơh, la Bơtau nggui hơđang ceruƀim.

³Bol khai pơdiang Đài Yàng Tom Trồ dê hơđang dô nơm rơndeh kơnrồ pa lơh, mơ tơlik bơh hìu Abinadap ơm hơđang dòr. Uja mơ Ahiyô kòn klau Abinadap, bol khai tề rơndeh kơnrồ,

⁴Đài Yàng Tom Trồ dê, mơ Ahiyô lòt di đap đài.

⁵Dabit mơ jơh hìu Israel jơh nùs jơh pràn tòmya di đap Yàng Jehôwa bal mơ ală bơta đơs chò mơ kơñi pĕ, kơñi rơs, sơnggơr dềt, cing mơ mồng.

⁶Tòm tŭ bol khai neh tus di làn jă kòi Nakôn dê, gen Uja pò tê yò đo Đài Yàng Tom Trồ dê tài bơh ală kơnrồ gơcồt jơng.

⁷Bơta gơjrañ Yàng Jehôwa dê neh hìt tòmdră mơ Uja; mơ Yàng Tom Trồ lơh glài khai tài bơh khai neh ƀư tê khai di Đài; mơ khai chơt tềng hơ̆ di gah Đài Yàng Tom Trồ dê.

⁸Gen Dabit gơjrañ tài bơh bơta gơjrañ dờng Yàng Jehôwa dê neh dùh hơđang Uja, mơ cau neh sơnđan tiah hơ̆ la Peres Uja tus di ngai do.

⁹Tòm ngai hơ̆, Dabit rngòt di Yàng Jehôwa mơ đơs lah: “Mbe Đài Yàng Jehôwa dê rgơi ơm tòm bơta sền gàr añ jê taih?”

¹⁰Behơ̆ Dabit ò bài cèng Đài Yàng Jehôwa dê ơn tòm ƀòn dờng Dabit nàng khai sền gàr; mơya khai cèng ơn Đài Yàng Jehôwa tòm hìu Ôbet Edôm la cau Gat dê.

¹¹Đài Yàng Jehôwa dê ơm pe kơnhai tòm hìu Ôbet Edôm cau Gat; mơ Yàng Jehôwa ai lơngai khai in mơ jơh hìu nhă khai dê.

¹²Gơs cau yal bơtau Dabit in lah: “Yàng Jehôwa neh ai lơngai hìu nhă Ôbet Edôm in mơ jơh ală phan gơrê bal mơ khai, tài bơh Đài Yàng Tom Trồ dê.” Behơ̆ Dabit lòt rò Đài Yàng Tom Trồ dê bơh hìu Ôbet Edôm tus hơ ƀòn Dờng Dabit dô bă hòn chò ngan.

¹³Tòm tŭ ală cau tùng Đài Yàng Tom Trồ dê lòt prau cơnđòa gen Dabit ơn dô nơm kơnrồ dam mơ dô nơm kơnrồ lơmă.

¹⁴Dabit tòmya di đap Yàng Jehôwa jơh nùs jơh pràn; Dabit soh dô nơm ephot mơ bài che dơmài lơbơn.

¹⁵Behơ̆ Dabit mơ jơh hìu Israel cèng Đài Yàng Jehôwa dê bal mơ jơnau driau dờng hòn chò mơ ntas kơlwòk.

¹⁶Tòm tŭ Đài Yàng Jehôwa dê neh mut tus tòm Ƀòn Dờng Dabit, Mikal kòn ùr Sol dê, tơnggòr sền bơh di mpồng dềt, mơ gŏ Dabit sơnđoh tòmya di đap Yàng Jehôwa, gen tòm nùs khai sền òsơp di Dabit.

¹⁷Bol khai cèng tơmut Đài Yàng Jehôwa dê mơ ơn gơ di tiah gơ dê tòm dơlam sàl mơ Dabit neh bơtào gơ in; mơ Dabit neh ơn ală phan ơn chu pơrguc mơ ală phan ơn bơta ring lơngai di đap Yàng Jehôwa

¹⁸Tơnơ̆ mơ tŭ Dabit neh sir ơn ală phan ơn chu pơrguc mơ ală phan ơn bơta ring lơngai gen khai ai lơngai làng bol in tòm sơnđan Yàng Jehôwa At Bồ Hơđang Rlau Jơh.

¹⁹Lồc behơ̆ khai tòmpà phan sa jơh mpồl làng bol Israel in, cau klau mơ cau ùr, kòp nă dô nơm piang lă, dô pơnai poac, dô nơm ƀañ plai gòl, mơ dô nơm ƀañ plai ño. Mơ jơh tơl nă rê wơl hơ hìu bol khai dê.

²⁰Gen Dabit rê wơl nàng ai lơngai hìu nhă khai in. Mơya Mikal kòn ùr Sol dê, lik rò khai mơ đơs lah: “Mbe lơi bơtau Israel dê lơh să tòm khai in geh màng ryŭ tòm ngai do, ơm să kuh di đap mat ală dĭ ùr cau duh broă khai dê, lơh kung be dô nă cau làng òs, ơm să kuh ò git ƀàssìl!”

²¹Dabit đơs mơ Mikal lah: “Hơ̆ la di đap Yàng Jehôwa, la Bơtau neh sac rwah añ ơm tòm tiah bèp ai mơ jơh hìu nhă khai dê, bơtào añ lơh gơs bơtau at bồ hơđang Israel la làng bol Yàng Jehôwa dê; añ neh tòmya jòng ro di đap Yàng Jehôwa.

²²Añ rơp tơnliah să añ rlau mơ do tai, mơ añ rơp sền să tòm añ òsơp òso; mơya bơh ală cau dĭ ùr mơ ai neh đơs hơ̆ añ rơp geh ki ngàm.”

²³Mơ Mikal kòn ùr Sol dê ò deh kòn jơl tus di ngai khai chơt.