Read koho II Samuel 9 Bible Online

II Samuel 9 - koho bible

II Samuel 9

¹Dabit lùp lah: “Gơs cau lơi tòm hìu Sol gam kis nàng añ rgơi yal tơlik bơta nđàc khai in, tài bơh Jônathan sơl?”

²Tŭ hơ̆, gơs dô nă cau duh broă hìu nhă Sol dê sơnđan la Jiba, mơ khai geh hòi tus hơ Dabit, mơ bơtau đơs mơ khai lah: “Mê la Jiba ngan sơl.” Khai ho lah: “Ơ bơtau, ngan la añ, cau duh broă bơtau dê.”

³Bơtau lùp lah: “Gơs cau lơi gam wơl bơh hìu Sol dê nàng añ rgơi yal tơlik bơta nđàc Yàng Tom Trồ dê khai in sơl ơ?” Jiba ho cau bơtau lah: “Gam gơs dô nă kòn klau Jônathan dê; khai gơlte bàr đah jơng.”

⁴Bơtau lùp lah: “Ntềng đah khai ơm taih?” Jiba ho lah: “Khai ơm tòm hìu Maki, kòn klau Amiel tòm Lôdebar.”

⁵Behơ̆ bơtau Dabit sồr cèng khai bơh di hìu Makir kòn klau Amiel tòm Lôdebar.

⁶Mephibôset kòn klau Jônathan, sau Sol dê neh tus hơ Dabit gen drup mat tòm ù mơ khoai khai. Dabit đơs lah: “Ơ Mephibôset!” Khai ho lah: “Gơs añ do la cau duh broă bơtau dê.”

⁷Dabit đơs mơ khai lah: “Bañ rngòt, bơh añ rơp yal tơlik bơta nđàc mê in, tài bơh Jônathan bèp mê dê. Añ rơp ai wơl mê in jơh ală ù tiah Sol, ồng mê dê, mơ să tòm mê rơp sa di cơnòng sa bal mơ añ sùm.”

⁸Mephibôset cùn khoai mơ đơs lah: “Cau duh broă bơtau dê la ñcau mơ bơtau pal wèt sền di dô nơm so chơt be añ do taih?”

⁹Gen bơtau hòi Jiba, cau duh broă Sol dê, mơ đơs mơ khai lah: “Jơh ală phan lơi gơrê mơ Sol mơ gơrê mơ jơh hìu nhă khai dê, añ neh ai sau klau cau tòm mê in.

¹⁰Mê bal mơ ală kòn klau mơ ală cau duh broă mê dê pal troă lơòr ù tiah hơ̆ khai in, mơ toès prap plai đo nàng sau klau cau tòm mê dê geh phan sa. Mơ Mephibôset, sau klau cau tòm mê, rơp sa di cơnòng añ jê sùm.” (Mơ tai, Jiba gơs jơt pram nă kòn klau mơ bàr jơt nă cau duh broă.)

¹¹Gen Jiba đơs mơ bơtau lah: “Cau duh broă bơtau dê rơp lơh jơh ală bơta bơtau la cau tòm añ jê neh sồr añ lơh.” Mephibôset sa di cơnòng Dabit dê kung be dô nă kòn klau bơtau dê.

¹²Mephibôset gơs dô nă kòn pơnu sơnđan la Mika; mơ jơh ală cau tòm hìu nhă Jiba la ală cau duh broă Mephibôset dê.

¹³Mephibôset ơm tòm Jerusalem tài bơh khai sa di cơnòng bơtau dê sùm, mơ khai gơlte jơh bàr đah jơng.