Read koho I Ală Bơtau 1 Bible Online

I Ală Bơtau 1 - koho bible

I Ală Bơtau 1

¹Tòm tŭ bơtau Dabit neh kra să mơ sơnam jòng; gen bulah cau tơntơ̆ oă ồi khai in, khai kung ò rgơi gơs ram.

²Behơ̆, ală cau duh broă khai dê đơs mơ khai lah: “Dan lòi bol hi jòi bơtau in dô nă cau ơruh dềt gam tơrmo nàng duh broă mơ sền gàr bơtau. Khai rơp bic di ntơh bơtau nàng cau tòm bol hi la bơtau rgơi geh ram.”

³Behơ̆ bol khai jòi tòm làm jơh Israel dô nă cau ơruh dềt hàng mơnĕ, mơ bàn Abisak cau Sunem, mơ cèng khai tus hơ bơtau.

⁴Cau ơruh dềt do hàng mơnĕ ngan. Khai gơlik gơs cau sền gàr mơ duh broă bơtau; mơya cau bơtau ò gơwèt mơ khai be ùr klau.

⁵Mơ tai, Adônija kòn klau Hagit yò tơngguh is să khai mơ đơs lah: “Añ rơp lơh gơs bơtau”; khai neh rcang sir ală rơndeh lòs tòmlơh mơ mpồl ling hào ơseh, bal mơ pram jơt nă cau klau ntoat di đap khai.

⁶Bèp khai ò tŭ lơi kơryan hala lùp khai lah: “Ñchi bơh tài mê lơh bơta be do taih?” Mơ tai, Adônija kung hàng klau ngan, deh tơnơ̆ mơ Apsalôm.

⁷Khai kơlôi bơyai mơ Jôap kòn klau Jeruya bal mơ Abiatha cau gơnoar ơn phan duh khoai, mơ bol hơ̆ dô nùs dong kòl khai.

⁸Mơya Jadôk cau gơnoar ơn phan duh khoai mơ Benayah kòn klau Jehôyada, Nathan cau gơnoar hwơr, Simei, Rei, mơ ală cau ling gàr să Dabit, ò jat đah Adônija.

⁹Gen Adônija ơn ală belàt, kơnrồ, mơ kơnrồ dam lơmă lơh gơs phan ơn hơđang Pơnai lŭ Jôhelet, rềp di hiòng En Rôgel. Khai jà jơh ală oh mi khai, la ală kòn klau bơtau dê, mơ jơh ală cau Juda duh broă bơtau.

¹⁰Mơya khai ò jà Nathan cau gơnoar hwơr, Benayah, hala ală cau ling gàr să bơtau, mơ Salômôn oh khai.

¹¹Gen Nathan lùp Batseba mè Salômôn dê mơ lah: “Mò neh ò kơno lah Adônija, kòn klau Hagrit neh gơlik gơs bơtau, mơ bơtau la cau tòm bol he dê la Dabit ò git bơta hơ̆ ò ơ?

¹²Behơ̆ tŭ do, lòi añ ai mò in jơnau cri bơyai nàng dong gàr bơta kis mò dê bal mơ bơta kis Salômôn kòn klau mò dê.

¹³Lòt tơlik mat tĕ mơ bơtau Dabit mơ đơs lah: ‘Ơ cau tòm añ jê la bơtau! Ò di bơtau neh srat să ho nền mơ añ la cau duh broă bơtau dê mơ lah: Nền cê ngan la Salômôn kòn klau ai rơp gơs bơtau pơrdòn añ, mơ khai rơp nggui hơđang sơbàn añ jê ò ơ? Behơ̆ gen ñchi bơh tài Adônija lơh gơs bơtau taih?’

¹⁴Tòm tŭ mò gam ơm tềng hơ̆ tòmbơhbơr mơ bơtau, gen añ rơp mut tơnơ̆ mò mơ lơh nền ală jơnau mò neh đơs hơ̆.”

¹⁵Behơ̆, Batseba lòt tus hơ bơtau tòm ơdŭ bic khai dê. Bơtau neh kra lơbơn lơño ngan; gơs Abisak cau Sunem, duh broă khai.

¹⁶Batseba cùn khoai di đap cau bơtau. Bơtau lùp lah: “Ñchi bơta ai kòñ taih?”

¹⁷Mò ho lah: “Ơ cau tòm añ jê! Să tòm bơtau neh ai sơnđan Jehôwa Yàng Tom Trồ bơtau dê mơ neh srat să mơ añ cau duh broă bơtau dê lah: ‘Salômôn kòn klau ai dê rơp gơs bơtau pơrdòn añ, mơ khai rơp nggui hơđang sơbàn añ jê.’

¹⁸Mơya tŭ do, Adônija nisơna neh gơlik gơs bơtau, mơ bơtau, cau tòm añ jê la bơtau ò git bơta hơ̆.

¹⁹Khai neh ơn pơdơng duh khoai oă ngan kơnrồ, kơnrồ dam lơmă mơ belàt, kung neh jà jơh ală kòn klau bơtau dê bal mơ Abiatha cau gơnoar ơn phan duh khoai, mơ Jôap cau kwang dờng at bồ ling; mơya khai ò jà Salômôn, cau duh broă bơtau dê.

²⁰Mơya ơ kơnràñ cau tòm añ jê la bơtau, jơh Israel wèt mat hơ bơtau, ơm gơn bơtau ai bol khai in git ñcau la cau rơp pơrdòn bơtau mơ nggui hơđang sơbàn cau tòm añ jê tơnơ̆ bơtau.

²¹Ò di mìng behơ̆ lơm ò, tòm tŭ cau tòm añ jê la bơtau neh bic bal mơ ală ồng pàng rau, gen añ mơ kòn klau añ la Salômôn rơp kong lơh glài be cau gơs glài.”

²²Tòm tŭ mò gam đơs mơ bơtau gen cau gơnoar hwơr Nathan tus.

²³Gơs cau yal mơ bơtau lah: “Cau gơnoar hwơr Nathan neh tus tềng do.” Behơ̆ khai lòt tus hơ cau bơtau mơ tơmbic să blup mat di ù.

²⁴Nathan đơs lah: “Ơ cau tòm añ jê la bơtau, bơtau neh đơs sơl lah Adônija rơp pơrdòn bơtau mơ gơs bơtau at bồ, mơ khai rơp nggui hơđang sơbàn bơtau dê ơ?

²⁵Ngai do khai neh lòt hơđơm ne mơ ơn phan pơdơng duh khoai oă ngan kơnrồ, kơnrồ dam lơmă mơ belàt. Khai neh jà jơh ală kòn klau bơtau dê, ală cau kwang dờng at bồ ling, mơ Abiatha la cau gơnoar ơn phan duh khoai. Tòm jơ do, bol khai ơm ñô sa mơ khai, mơ driau dờng lah: ‘Dan bơtau Adônija in kis jŏ!’

²⁶Ai añ la cau duh broă bơtau dê bal mơ Jadôk cau gơnoar hwơr, Benayah kòn klau Jehôyada, mơ Salômôn, cau duh broă bơtau dê gen khai ò jà.

²⁷Ngan sơl do la bơta mơ cau tòm añ jê la bơtau neh lơh mơ ò ai ală cau duh broă bơtau in git ñcau rơp nggui hơđang sơbàn cau tòm añ jê la bơtau nàng at bồ pơnjat bơtau dê taih?”

²⁸Gen bơtau Dabit đơs lah: “Hòi tĕ Batseba añ in.” Behơ̆ mò mut mơ ntào di đap bơtau.

²⁹Gen bơtau Dabit srat să lah: “Di ngan be Yàng Jehôwa kis gam sùm sùm, la Bơtau neh dong tă añ klàs bơh di ală bơta bòl glar,

³⁰tòm ngai do añ rơp lơh gơlik gơs bơta añ neh ai sơnđan Jehôwa Yàng Tom Trồ Israel dê mơ srat să mơ ai lah: ‘Salômôn kòn klau ai rơp gơs bơtau at bồ pơrdòn añ,’ mơ khai rơp nggui hơđang sơbàn añ jê ala añ in.”

³¹Gen Batseba cùn khoai blup mat di ù, lồc behơ̆ cùn gơltang di đap bơtau mơ đơs lah: “Dan cau tòm añ jê la bơtau Dabit kis gam sùm sùm!”

³²Bơtau Dabit đơs lah: “Hòi tĕ añ in Jadôk cau gơnoar ơn phan duh khoai, Nathan cau gơnoar hwơr, mơ Benayah, kòn klau Jehôyada.” Tòm tŭ bol khai neh tus di đap bơtau,

³³gen bơtau đơs mơ bol khai lah: “Cèng tĕ ală cau duh broă cau tòm bol mê dê lòt jat bal mơ bol mê, mơ yò Salômôn kòn klau añ hào hơđang alàng ơseh tòm añ jê, mơ jun khai mù tus hơ Gihôn.

³⁴Tềng hơ̆, Jadôk cau gơnoar ơn phan duh khoai mơ Nathan cau gơnoar hwơr bong mơñà khai in lơh gơs bơtau hơđang Israel. Uh tĕ kơlwòk mơ driau dờng tĕ lah:

³⁵‘Bơtau Salômôn kis sùm!’ Lồc behơ̆, bol mê rơp guh bal mơ khai, khai rơp tus mơ nggui hơđang sơbàn añ mơ at bồ ala añ. Añ neh pồ bơtào khai lơh gơs bơtau at bồ hơđang Israel mơ Juda.”

³⁶Benayah kòn klau Jehôyada ho wơl mơ bơtau lah: “Amen! Yàng Jehôwa la Yàng Tom Trồ cau tòm añ jê la bơtau kung neh yal tơnggit behơ̆.

³⁷Mbe lơi Yàng Jehôwa neh ơm mơ cau tòm añ jê la bơtau gen dan Kơnràñ kung ơm bal mơ Salômôn sơl, tồ lơh sơbàn khai dê geh jòng màng rlau mơ sơbàn cau tòm añ jê la bơtau Dabit!”

³⁸Behơ̆, Jadôk cau gơnoar ơn phan duh khoai, Nathan cau gơnoar hwơr, Benayah kòn klau Jehôyada, ală cau Keret mơ cau Phelet gen lòt tus, yò Salômôn hào hơđang alàng bơtau Dabit dê, mơ lam khai tus hơ Gihôn.

³⁹Tềng hơ̆ Jadôk cau gơnoar ơn phan duh khoai ai ngke mơñà tòm Sàl Ing Duh Khoai mơ bong Salômôn in. Lồc behơ̆ bol khai uh kơlwòk, mơ jơh làng bol hòi driau dờng lah: “Dan bơtau Salômôn in kis sùm!”

⁴⁰Mơ jơh làng bol guh jat khai, uh kơwào mơ hòn chò ò git lơh, tian gơs ù gơlơnggơr bơh jơnau driau dờng bol khai dê.

⁴¹Adônija mơ jơh ală cau nac ơm bal mơ khai kơno jơnau hơ̆ tòm tŭ bol khai pa sir ñô sa. Tòm tŭ kơno sap kơlwòk, gen Jôap lùp lah: “Ñchi bơh tài tòm ƀòn dờng gơs jơnau nggồr nggàc behơ̆ taih?”

⁴²Khai gam ơm đơs, ne Jônathan kòn klau Abiatha la cau gơnoar ơn phan duh khoai lòt tus. Adônija đơs mơ khai lah: “Mut tĕ, mê la dô nă cau di pal, ngan mê rơp cèng jơnau niam.”

⁴³Jônathan ho lah: “Ò, bơh cau tòm bol he dê la bơtau Dabit neh pồ bơtào Salômôn lơh gơs bơtau;

⁴⁴Cau bơtau neh sồr Jadôk cau gơnoar ơn phan duh khoai, Nathan cau gơnoar hwơr, Benayah kòn klau Jehôyada, ală cau Keret bal mơ ală cau Phelet lòt jat khai, mơ bol khai neh yò Salômôn hào hơđang alàng bơtau dê.

⁴⁵Jadôk cau gơnoar ơn phan duh khoai bal mơ Nathan cau gơnoar hwơr neh bong mơñà Salômôn in lơh gơs bơtau tòm Gihôn. Bơh tềng hơ̆ bol khai neh guh driau dờng hòn chò, mơ ƀòn dờng nggồr ur. Hơ̆ la jơnau ntas mơ ală ồng neh kơno.”

⁴⁶Tŭ hơ̆, Salômôn neh nggui hơđang sơbàn bơtau.

⁴⁷Rlau mơ hơ̆, ală cau duh broă bơtau dê kung neh tus hòn chò bal mơ cau tòm bol he dê la bơtau Dabit mơ đơs lah: “Dan Yàng Tom Trồ bơtau dê lơh sơnđan Salômôn in geh tiơng pơnro rlau mơ sơnđan bơtau dê, mơ lơh sơbàn khai dê jòng màng rlau mơ sơbàn bơtau dê.” Mơ cau bơtau kun bồ duh khoai hơđang cơnòng khai dê,

⁴⁸mơ neh đơs lah: “Jòng ro Yàng Jehôwa la Yàng Tom Trồ Israel dê, bơh tòm ngai do Kơnràñ neh ai gar mat añ sền gŏ dô nă cau tơrbŏ sơbàn añ jê.”

⁴⁹Gen jơh ală cau nac Adônija dê rngòt mơ ñă ntào kòp nă lòt gùng is he dê.

⁵⁰Mơya Adônija tài bơh rngòt di Salômôn gen lòt mơ at di ală ngke cơnòng duh khoai dê.

⁵¹Gơs cau tus yal Salômôn in lah: “Adônija rngòt di bơtau Salômôn, lòt at ală ngke cơnòng duh khoai dê, mơ đơs lah: ‘Ngai do, lòi bơtau Salômôn srat să mơ añ lah bơtau rơp ò tơnchơt cau duh broă bơtau dê.’”

⁵²Salômôn ho lah: “Dilah khai yal tơlik be dô nă cau kas màng, gen ò gơs dô dang che sŏ lơi khai dê rơp rung tòm ù; mơya dilah gơs bơta iơh lơi tòm khai gen khai rơp chơt.”

⁵³Gen Bơtau Salômôn sồr cau cèng khai mù bơh cơnòng duh khoai. Adônija tus tơmbic să di đap bơtau Salômôn; mơ Salômôn đơs mơ khai lah: “Rê tĕ hơ hìu mê dê.”