Read koho I Ală Bơtau 10 Bible Online

I Ală Bơtau 10 - koho bible

I Ală Bơtau 10

¹Tòm tŭ bơtau ùr Seba kơno bơta tiơng pơnro Salômôn dê mơ (pơnro dòp geh bơh sơnđan Yàng Jehôwa dê), gen tus lòng Salômôn ală sèng lùp kalke.

²Mò tus tòm Jerusalem bal mơ dô mpồl gal ngan cau duh broă, làkđa pơdiang sơnơm ƀô bơlhu, oă màh mơ lŭ màng. Tòm tŭ mò tus hơ Salômôn, mò đơs mơ bơtau jơh ală bơta gơs tòm nùs mò dê.

³Salômôn ho wơl jơh ală sèng lùp mò dê, ò gơs bơta lơi kalke pồn ndơp bơtau in, mơ bơtau ò rgơi yal tơlik jơnau gơtha mò in.

⁴Tòm tŭ bơtau ùr Seba sền gŏ ală bơta jak chài Salômôn dê, gơlang bơtau neh bơt,

⁵Ală phan sa bơkah di cơnòng sa bơtau dê, ală tiah nggui ală cau kwang bơtau dê, hìu ơm ală dĭ gơna, bơta rơndap broă ală cau duh broă bơtau dê, ală phan soh bol khai dê, ală cau kwang yò tơrnòm, mơ ală phan ơn chu mơ bơtau ơn pơdơng tòm hìu duh khoai Yàng Jehôwa dê, gen mò gơ dô jơh hwềng nùs.

⁶Behơ̆ mò đơs mơ cau bơtau lah: “Jơnau yal wơl la song ngan mơ añ neh kơno tòm lơgar añ jê, bơh bơta bơt bơtào mơ bơta jak chài bơtau dê,

⁷mơya añ ò dòn ală jơnau yal hơ̆ jơl tus di tŭ añ neh tus mơ sền gŏ gơ mơ mat tòm añ jê; ò tus di nggùl ală bơta cau neh yal añ in! Bơta jak chài mơ bơta pas gơs bơtau dê oă rlau ngan mơ jơnau yal añ neh kơno.

⁸Lơngai ngan ală bau ùr bơtau dê! Lơngai ngan ală dĭ gơna bơtau dê, la ală cau gơs mat sùm di đap bơtau, mơ iat bơta jak chài bơtau dê!

⁹Pal jòng ro Jehôwa Yàng Tom Trồ bơtau dê, bơh Kơnràñ niam nùs bơtào bơtau hơđang sơbàn Israel dê! Tài bơh Yàng Jehôwa kòñ gơboh Israel sùm sùm, gen Kơnràñ neh bơtào bơtau lơh gơs bơtau at bồ jat bơta song ngan mơ song ring.”

¹⁰Bơtau ùr ơn bơtau in dô rhiang bàr jơt talơng màh mơ oă ngan sơnơm ƀô bơlhu bal mơ lŭ màng. Òhềt tŭ lơi gơs cau cèng sơnơm ƀô bơlhu tus gơs khà dờng ngan ndròm be bơtau ùr lơgar Seba neh ai bơtau Salômôn in.

¹¹Rlau mơ hơ̆ tai, mpồl ơhò Hiram dê, pơdiang màh bơh Ôphir, kung pơdiang chi pơnàng bò oă ngan, mơ lŭ màng.

¹²Bơtau ngui chi pơnàng bò do lơh gơs rơng hìu duh khoai Yàng Jehôwa mơ gơlang bơtau dê, bal mơ ală kơñi pĕ mơ kơñi liă cau đơs chò in. Bơh ò gơs cau lơi cèng chi pơnàng bò kàr hơ̆, ò gơs cau gŏ wơl jơl tus ngai do.

¹³Bơtau Salômôn ai bơtau ùr Seba in ală bơta khai kòñ mơ dan, bal mơ ală phan mơ bơtau Salômôn neh ai mò in, jat bơta chò nùs kòñ ai bơtau dê. Gen mò rê wơl hơ lơgar khai dê bal mơ ală cau duh broă mò dê.

¹⁴Màh mơ bơtau Salômôn dòp geh kòp sơnam kơr tus prau rhiang prau jơt prau talơng,

¹⁵Di gah hơ̆, la ală màh bơh ală cau kă bro mơ bơh ală cau lòt pơrgơl phan mơna, mơ màh bơh jơh ală cau bơtau Arabi, mơ ală cau kwang đơng lơgar dê.

¹⁶Bơtau Salômôn lơh bàr rhiang nơm khèl dờng mơ màh klơn, prau rhiang sieklơ màh klơn tòm kòp nơm khèl dờng;

¹⁷mơ bơtau kung lơh pe rhiang nơm khèl dềt, mơ màh klơn, kư̆ kòp nơm ngui pe min màh. Bơtau ơn ală khèl hơ̆ tòm gơlang brê Liban.

¹⁸Bơtau kung lơh dô nơm sơbàn dờng mơ bla, kli màh ngan.

¹⁹Sơbàn do gơs prau kơnă; bồ sơbàn wil đah ngkòi; kòp đah sơbàn la tiah ơn tê, mơ gơs bàr nơm klìu triă ntào di gah tiah ơn tê.

²⁰Kung gơs jơt bàr nơm klìu triă ntào, dùl nơm tòm kòp tiah lồi kơnă tòm prau nơm kơnă, ò gơs lơgar lơi lơh sơbàn tòm toh behơ̆.

²¹Jơh ală coàn ñô Salômôn dê geh lơh mơ màh, mơ ală phan ngui tòm gơlang brê Liban gen kung lơh mơ màh ngan. Ò gơs phan lơi la priă: tòm rài bơtau Salômôn, cau ò kòp priă la màng.

²²Bơh mpồl ơhò Tarsi bơtau dê kòp pe sơnam dô dơ̆ tiă dàlềng bal mơ mpồl ơhò Hiram dê, cèng brê màh, priă, bla rwas, dồ, mơ brà.

²³Behơ̆, bơtau Salômôn lin rlau mơ ală cau bơtau tòm lơgar dunnia bơh bơta pas gơs mơ bơta jak chài.

²⁴Jơh cau tòm dunnia kòñ jòi sền muh mat Salômôn nàng iat bơta jak chài mơ Yàng Tom Trồ neh ơn tòm nùs khai.

²⁵Kòp nă tòm bol khai cèng dô nơm phan pà, jat nùs cèng tus cờu mơ priă mơ màh, ồi ào, phan tòmlơh, sơnơm ƀô, ơseh, mơ alàng ơseh oă ngan kòp nam.

²⁶Salômôn kung pơjum tơrgòm ală rơndeh mơ ơseh; gơs dô rbô poan rhiang nơm rơndeh mơ jơt bàr rbô nơm ơseh, ală phan hơ̆ bơtau ơn tòm ală ƀòn dờng ơn rơndeh, mơ tòm Jerusalem, bal mơ bơtau.

²⁷Tòm Jerusalem bơtau lơh priă sền be lŭ, mơ chi pơnàng oă be chi sơr hòn tòm tiah ƀlàng ring.

²⁸Bơtau Salômôn blơi ơseh bơh Ejiptơ mơ Kue; Ală cau kă bro bơtau dê lòt blơi gơ mơ khà priă.

²⁹Dô nơm rơndeh blơi tòm lơgar Ejiptơ mơ lam rê hơ Jerusalem, la prau rhiang sieklơ priă, mơ kòp nơm ơseh la dô rhiang pram jơt sieklơ. Behơ̆ bơh ală cau kă bro bơtau dê, bol khai neh blơi phan mơna bơh di jơh ală bơtau Hetit mơ ală bơtau Siri.