Read koho I Ală Bơtau 14 Bible Online

I Ală Bơtau 14 - koho bible

I Ală Bơtau 14

¹Tòm tŭ hơ̆, Abijah kòn klau Jerôbôam kòp jê.

²Jerôbôam đơs mơ bau ùr khai lah: “Lòt tĕ lơh să ai be cau ndai, nàng cau ò đal git ai la bau ùr Jerôbôam. Ai lòt tĕ hơ Silô, bơh gơs cau gơnoar hwơr Ahijah ơm tềng hơ̆, la cau neh yal lài bơh añ lah añ rơp lơh gơs bơtau hơđang làng bol do.

³Cèng bal jơt nai piang lă, dô êt ƀañ lơngồt, mơ dô gri dà lơwe, mơ lòt tus tĕ hơ khai; khai rơp yal ai in bơta pal gơlik tus kòn dềt in.”

⁴Bau ùr Jerôbôam lơh jat behơ̆, khai lik lòt tus hơ Silô, mơ tus hơ hìu Ahijah dê. Tŭ hơ̆ Ahijah ò rgơi sền gŏ, bơh mat khai neh jơngo tài bơh neh kra ngan.

⁵Mơya Yàng Jehôwa đơs mơ Ahijah lah: “Ne, bau ùr Jerôbôam dê tus lùp mê bơh kòn klau khai kòp jê. Mê rơp ho mơ khai be do, be do. Tòm tŭ khai tus, khai rơp lơh să be dô nă cau ndai.”

⁶Mơya tòm tŭ khai cơnđòa gan di bơr mpồng, Ahijah kơno ntas jơng khai dê, gen đơs lah: “Ơ bau ùr Jerôbôam, mut tĕ; ñchi bơh tài ai lơh bơthĭ be cau ndai taih? Añ geh sồr yal ai in dô jơnau iơh: Lòt yal tĕ Jerôbôam in git:

⁷Jehôwa Yàng Tom Trồ Israel dê đơs be do: ‘Tài bơh Añ neh yò tơngguh mê bơh digùl làng bol, bơtào mê lơh gơs bơtau hơđang làng bol Israel Añ jê.

⁸Añ neh crè sang lơgar bơh di hìu Dabit mơ jào gơ mê in; mơya mê ò đòm be Dabit, dĭ gơna Añ jê, la cau prap gàr ală bơta sồr lam Añ jê, mơ jơh nùs jat Añ, mìng lơh bơta niam di đap Añ,

⁹mơya mê neh lơh bơta iơh rlau mơ ală cau lài mơ mê, mơ bơtào mê in ală yàng ndai mơ lơh rùp ràk pac sềr nàng bơrcek Añ gơjrañ, mơ tơlo Añ hơ đah ngkòi mê dê.

¹⁰Gen tàng, Añ rơp cèng bơta iơh hơđang hìu Jerôbôam, Añ rơp tơnroh jơh ală cau klau bơh di Jerôbôam, cau dĭ gơna mơ cau khat gơboh bơh hìu Israel, Añ rơp tơnroh jơh hìu Jerôbôam, mơ pơs wàs jơh hìu khai, be cau chu ală phan ƀơ̆ ƀơl, jơl tus ò gam wơl ñchi lơi.

¹¹Jơh tơl nă cau gơrê mơ Jerôbôam cau lơi chơt tòm ƀòn dờng, gen so rơp sa, mơ cau lơi chơt tòm ƀlàng gen sềm trồ rơp sa;’ bơh Yàng Jehôwa neh đơs behơ̆.

¹²Behơ̆ gen lik tĕ, rê hơ hìu ai dê. Tòm tŭ jơng ai mut tòm ƀòn dờng, gen kòn dềt rơp chơt.

¹³Jơh Israel rơp ñìm rac mơ tơp khai; mìng dô nă khai tòm hìu nhă Jerôbôam rơp geh tơp tòm bơtô ƀồc, tài bơh tòm khai neh bàn dô êt bơta niam nùs Jehôwa Yàng Tom Trồ Israel dê.

¹⁴Rlau mơ hơ̆, Yàng Jehôwa rơp tơngguh dô nă bơtau hơđang Israel să tòm Kơnràñ in, khai rơp tơnroh jơh hìu Jerôbôam ngai do, tŭ do mo.

¹⁵Yàng Jehôwa rơp pòng lơh Israel, be dô nơm tòm proh ơwañ tòm dà, Kơnràñ rơp dus Israel bơh lơgar niam do mơ Kơnràñ neh ai ồng pàng bol khai in, mơ sơmprih bol khai đah ne hiòng Ơphrat, tài bơh bol khai neh bơtào jrong Asera, bơrcek Yàng Jehôwa gơjrañ.

¹⁶Kơnràñ rơp lơh glài Israel tài bơh glài Jerôbôam dê, hơ̆ la glài khai neh tìs mơ glài khai neh lơh Israel in tìs glài.”

¹⁷Bau ùr Jerôbôam ntào lòt tus hơ Tirjah. Tòm tŭ khai tus di bơr mpồng hìu, gen kòn dềt neh chơt.

¹⁸Jơh Israel tơp khai, mơ ñìm bơh khai, jat be jơnau Yàng Jehôwa neh kơnòm di dĭ gơna Kơnràñ dê cau gơnoar hwơr la Ahijah neh đơs.

¹⁹Ală broă ndai Jerôbôam dê neh lơh, hơ̆ la bơta tòmlơh mơ bơta at bồ khai dê, neh geh cih tòm sră ală bơtau Israel dê.

²⁰Jerôbôam at bồ tòm bàr jơt bàr nam; gen khai bic lơhă bal mơ ală ồng pàng khai dê, mơ Nađap kòn klau khai pơrdòn sơbàn khai.

²¹Rôbôam, kòn klau Salômôn dê, at bồ Juda. Rôbôam neh poan jơt dùl sơnam tòm tŭ khai sơntòm at bồ, mơ khai at bồ jơt poh nam tòm Jerusalem, ƀòn dờng mơ Yàng Jehôwa neh sac rwah bơh di jơh jơi bơtiàn Israel nàng ơn sơnđan Kơnràñ tềng hơ̆. Mè khai sơnđan la Naamah cau Ammôn.

²²Cau Juda lơh bơta iơh di đap Yàng Jehôwa; bol khai bơrcek lơh Yàng Jehôwa in ƀoah pơrñat, bơh tồi glài bol khai neh tìs rlau mơ ală ồng pàng bol khai dê neh lơh.

²³Bơh ală cau Juda kung bơt bơtào he in ală tiah jơnhoa, jrong duh khoai mơ rùp Asera hơđang ală tiah jơnhoa mơ hơđơm ală chi dờng.

²⁴Kung gơs ală cau klau dri tơlàr (hơ̆ la cau klau tìs glài mơ cau klau) tòm lơgar. Bol khai tìs glài jơh ală bơta cù kìr ală làng bol mơ Yàng Jehôwa neh bơtrơh tơlik di đap làng bol Israel.

²⁵Tòm nam dơ̆ pram rài Rôbôam at bồ; Sisak bơtau Ejiptơ, guh tòmlơh mơ Jerusalem,

²⁶khai ai ală phan màng tòm hìu duh khoai Yàng Jehôwa mơ tòm gơlang bơtau; khai tă ai jơh ală phan, khai kung tă ai jơh ală khèl mơ màh mơ Salômôn neh lơh.

²⁷Gen Rôbôam sồr lơh ală khèl mơ kòng nàng ala ală khèl hơ̆, jào ală kwang ling kơp gàr mpồng bơtau dê.

²⁸Kòp dơ̆ bơtau mut tòm hìu duh khoai Yàng Jehôwa, gơs ală cau ling kơp gàr at ală khèl hơ̆; mơ bol khai cèng prap wơl tòm tiah cau kơp gàr dê.

²⁹Ală broă ndai Rôbôam dê, mơ ală broă khai neh lơh, gen neh cih tòm sră ală cau bơtau Juda dê.

³⁰Mơ tai, Rôbôam mơ Jerôbôam tòmlơh bal sùm sùm.

³¹Rôbôam bic lơhă bal mơ ồng pàng khai dê, mơ geh tơp tòm ƀòn Dabit. Mè khai sơnđan la Naamah, cau Ammôn. Abijam, kòn klau khai, pơrdòn sơbàn khai.