Read koho I Ală Bơtau 15 Bible Online

I Ală Bơtau 15 - koho bible

I Ală Bơtau 15

¹Nam dơ̆ jơt phàm rài bơtau Jerôbôam, kòn klau Nebat, gen Abijam sơntòm at bồ hơđang lơgar Juda.

²Khai at bồ pe sơnam tòm Jerusalem. Mè khai sơnđan la Maaka, kòn ùr Abisalôm dê.

³Khai neh tìs jơh ală tồi glài mơ bèp khai neh lơh lài mơ khai; nùs khai ò song mơ Jehôwa Yàng Tom Trồ khai dê, be nùs Dabit, ồng pàng khai.

⁴Bulah behơ̆, bơh Dabit gen Jehôwa Yàng Tom Trồ khai dê neh lòi khai in dô nơm ồs đèng tòm Jerusalem, bơtào kòn klau khai pơrdòn jat khai, mơ bơt bơtào kơ̆ Jerusalem;

⁵Tài bơh Dabit neh lơh bơta niam di đap Yàng Jehôwa, ò pơrlac đah lơi bơh ală bơta Kơnràñ neh nting sồr khai, mìng tòm broă Uria, cau Hetit lơm.

⁶Bơta kơlìn neh sơntòm digùl Rôbôam mơ Jerôbôam mơ pơnjat sùm jơh rài kis khai dê.

⁷Ală bơta ndai Abijam dê, mơ ală broă khai lơh, neh geh cih tòm sră ală cau bơtau Juda dê. Abijam mơ Jerôbôam kung tòmlơh bal.

⁸Abijam bic lơhă bal mơ ồng pàng khai, mơ cau tơp khai tòm ƀòn dờng Dabit. Gen Asa kòn klau khai, pơrdòn sơbàn khai.

⁹Nam dơ̆ bàr jơt, rài bơtau Jerôbôam la bơtau Israel, gen Asa sơntòm at bồ hơđang lơgar Juda.

¹⁰Khai at bồ poan jơt dùl nam tòm Jerusalem. Mò khai la Maaka, kòn ùr Abisalôm dê.

¹¹Asa lơh bơta niam di đap Yàng Jehôwa, be Dabit ồng pàng khai dê neh lơh.

¹²Khai ting bơtrơh ală cau klau dri tơlàr (hơ̆ la ală cau klau tìs glài mơ cau klau) lik bơh lơgar, mơ tă sang jơh ală rùp ràk mơ ồng pàng khai neh lơh.

¹³Mơ khai kung tă gơnoar mò bơtau dê bơh Maaka, mò khai dê, tài bơh mò neh bơt bơtào rùp ràk cù kìr Asera dê. Asa pòng tơrlah rùp ràk mò dê, mơ chu gơtòm Thòng Kidrôn.

¹⁴Mơya ală tiah jơnhoa gen ò tă sang; bulah behơ̆, nùs Asa la song mơ Yàng Jehôwa jơl jơh rài kis khai.

¹⁵Khai cèng ơn tòm hìu duh khoai Yàng Jehôwa ală phan ơn bơh bơta ho pơgon bèp khai dê, mơ ală phan ơn ho pơgon să tòm khai dê priă, màh, hala ală phan ngui.

¹⁶Gơs bơta kơlìn tòmlơh digùl Asa, bơtau Juda, mơ Baesa, bơtau Israel tòm jơh rài kis khai.

¹⁷Baesa, bơtau Israel, guh tòmdră mơ Juda, mơ bơt bơtào tiah Rama, nàng kơryan gùng làng bol lik hala mut hơ Asa, bơtau Juda.

¹⁸Gen Asa ai jơh ală priă mơ màh gam wơl tòm đam hìu duh khoai Yàng Jehôwa dê mơ tòm đam gơlang bơtau dê, jào dĭ gơna khai in; mơ sồr bol khai tus hơ Benhadat, kòn klau Tabrimmon, sau Hejion, bơtau Siri, ơm tòm Damas, mơ đơs lah:

¹⁹“Bơtào bơta dô bă bal tĕ digùl añ mơ ồng, tòm toh be bèp ồng dê mơ bèp añ jê neh lơh: añ pơyoa ồng in dô nơm phan pà gòi màh mơ priă; lòt tĕ sang jơnau ho dô bă bal ồng mơ Baasa, bơtau Israel, nàng khai pleh ngài bơh añ.”

²⁰Benhadat iat jơnau bơtau Asa; gen sồr ală kwang ling khai brồ lơh ală ƀòn dờng Israel dê, tòmpìt ai Ijôn, Dan, Abel Bet Maaka, mơ jơh lơgar Kinnerot bal mơ lơgar Neptali.

²¹Baesa kơno bơta hơ̆, gen ơm ò bơt bơtào tiah Rama tai, mơ ơm tòm Tirjah.

²²Gen bơtau Asa hòi jà jơh ală cau Juda, ò sang lòi dô nă cau lơi; bol khai cèng jơh ală lŭ mơ chi mơ Baesa bơh Rama. Bơtau Asa ngui phan hơ̆ nàng bơt bơtào Gheba tòm tiah Benjamin, mơ Mispa.

²³Ală broă ndai Asa dê, gơnoar pràn khai dê, ală broă khai lơh, mơ ală ƀòn dờng khai bơt bơtào, gen neh geh cih tòm sră ală cau bơtau Juda dê. Tòm tŭ sơnam neh kra, gen khai jê jơng.

²⁴Asa bic lơhă mơ ồng pàng khai, mơ geh tơp bal mơ bol khai tòm ƀòn dờng Dabit ồng pàng khai. Jôsaphat, kòn klau khai, pơrdòn sơbàn khai.

²⁵Nadap, kòn klau Jerôbôam, sơntòm at bồ hơđang Israel tòm nam dơ̆ bàr bơtau Asa, Juda dê; khai at bồ hơđang Israel bàr nam.

²⁶Khai lơh bơta iơh di đap Yàng Jehôwa, lòt jat gùng dà ồng pàng khai dê, mơ tòm glài neh lơh Israel in tìs glài.

²⁷Baesa, kòn klau Ahija, tòm hìu nhă Isakar, pơrlơ̆ dră di khai; mơ Baesa tơnchơt khai tòm Gibethôn, la tiah gơrê mơ lơgar Philistin; bơh Nadap mơ jơh Israel ơm gơrwàng Gibethon.

²⁸Behơ̆ Baesa tơnchơt Nadap tòm nam dơ̆ pe rài Asa bơtau Juda, mơ at bồ ala khai.

²⁹Tòm tŭ khai pa lơh gơs bơtau, khai tơnchơt jơh ală cau gơrê bal mơ hìu Jerôbôam, ò lòi wơl dô nă cau lơi tòm hìu nhă Jerôbôam gam kis, tian gơs neh tơnroh jơh jat be jơnau Yàng Jehôwa neh đơs bơh bơr Ahija, dĭ gơna Kơnràñ tòm Silô;

³⁰tài bơh tồi glài Jerôbôam neh tìs lơh cau Israel tìs glài sơl, mơ tài bơh bơta gơjrañ khai neh bơrcek Jehôwa Yàng Tom Trồ Israel dê.

³¹Ală broă ndai Nadap dê, ală broă khai lơh, gen neh geh cih tòm sră yal broă kòp nam ală cau bơtau Israel dê.

³²Gơs bơta kơlìn digùl Asa, bơtau Juda, mơ Baesa, bơtau Israel, tòm jơh rài kis khai dê.

³³Nam dơ̆ pe rài Asa, bơtau Juda, gen Baesa, kòn klau Ahija, lơh gơs bơtau jơh Israel; khai ơm tòm Tirjah, mơ at bồ bàr jơt poan sơnam.

³⁴Khai lơh bơta iơh di đap Yàng Jehôwa, lòt jat gùng Jerôbôam dê, mơ tồi glài mơ khai neh lơh cau Israel in tìs glài.