Read koho I Ală Bơtau 18 Bible Online

I Ală Bơtau 18 - koho bible

I Ală Bơtau 18

¹Tơnơ̆ mơ hơ̆ jŏ ngai, tòm nam dơ̆ pe tơnơ̆ mơ bơta prang dờng, gơs jơnau Yàng Jehôwa đơs mơ Eli lah: “Lòt tĕ tơlik mat mơ Ahap; Añ rơp ai mìu dùh hơđang ù.”

²Behơ̆, Eli lòt tơlik mat mơ Ahap. Gơs bơta jơgloh rung dờng ngan tòm Samari.

³Ahap sồr hòi Apdia, la kwang at bồ gơlang bơtau dê. (Apdia duh rngòt ngan di Yàng Jehôwa.

⁴Tòm tŭ Jesebel tơnchơt jơh ală cau gơnoar hwơr Yàng Jehôwa dê, gen Apdia neh cèng dô rhiang nă cau gơnoar hwơr pồn bol khai pram jơt nă tòm kòp nơm rgồng lŭ, rcang bol khai in ƀañ mơ dà.)

⁵Ahap đơs mơ Apdia lah: “Lòt tĕ làm jơh lơgar, tus hơ jơh ală croh mơ tiah dà cat mơ tòm ală thòng, digơlan bol he rơp jòi bàn ñhơt, nàng dong ală alàng ơseh in kis, nàng ò roh ală phan poan jơng.”

⁶Behơ̆, bol khai tòmcah tiah digùl bol khai nàng lòt sền sơwì lơgar. Ahap lòt is dô nă khai tòm gùng do, mơ Apdia lòt is dô nă khai tòm gùng ndai.

⁷Tòm tŭ Apdia lòt gùng, gen Eli tìp mơ khai, Apdia đal git khai, tơmbic să tòm ù, mơ đơs lah: “Hơ̆ la ồng cau tòm añ, Eli ngan sơl?”

⁸Khai ho, “Ơi, añ do. Lòt tĕ, yal mơ cau tòm mê lah: Eli ơm tềng do.”

⁹Apdia đơs lah: “Añ neh tìs glài lơi, mơ ồng kòñ jào dĭ gơna ồng tòm tê Ahap, nàng tơnchơt añ taih?

¹⁰Be Jehôwa Yàng Tom Trồ ồng dê kis sùm, ò gơs làng bol lơi lơgar lơi mơ cau tòm añ ò sồr jòi ồng; mơ tòm tŭ cau yal lah: Eli ò gơs tềng do, gen khai sồr lơgar hơ̆ làng bol hơ̆ srat să lah ò gơs cau lơi tìp ồng.

¹¹Mơ tŭ do, ồng đơs wơl mơ añ lah: ‘Lòt tĕ yal mơ cau tòm mê: Eli ơm tềng do!’

¹²Tòm tŭ añ lòt bơh di ồng, rơp gơs hwềng Yàng Jehôwa dê cèng ồng lòt tiah lơi añ ò git; behơ̆, tòm tŭ añ tus yal Ahap in, mơ khai ò gŏ ồng, khai rơp tơnchơt añ. Bulah, añ la dĭ gơna ồng dê duh rngòt di Yàng Jehôwa bơh tŭ gam pơnu.

¹³Cau neh ò yal ồng in git, tòm tŭ Jesabel tơnchơt ală cau gơnoar hwơr Yàng Jehôwa dê, mbe añ neh pồn dô rhiang nă cau gơnoar hwơr Yàng Jehôwa dê pram jơt nă tòm kòp nơm rgồng lŭ, mơ rcang bol khai in ƀañ mơ dà ơ?

¹⁴Mơya tŭ do, ồng sồr añ: ‘Lòt tĕ yal, mơ cau tòm mê lah: Eli ơm tềng do!’ Ngan khai rơp tơnchơt añ.”

¹⁵Eli ho lah: “Añ ntào di đap Yàng Jehôwa Gơnap Gơnoar Dờng Làm Jơh dê, mơ srat să lah: Ngan ngai do añ rơp tơlik mat mơ Ahap.”

¹⁶Behơ̆, Apdia lòt tìp Ahap, mơ yal wơl khai in. Gen Ahap lòt tìp Eli.

¹⁷Tòm tŭ Ahap gŏ Eli, gen khai đơs lah: “Hơ̆ la mê, cau lơh sơlồng sơlàng Israel sơl?”

¹⁸Eli ho lah: “Ò di añ lơh sơlồng sơlàng Israel; mơ la bơtau mơ hìu bèp bơtau dê, tài bơh bơtau neh sang lòi bơta sồr lam Yàng Jehôwa dê, mơ neh lòt jat Baal.

¹⁹Behơ̆ tŭ do bơtau sồr tĕ cau pơjum jơh Israel tòm mơnơm Karmel, añ in mơ poan rhiang pram jơt nă cau gơnoar hwơr Baal dê, mơ poan rhiang nă cau gơnoar hwơr Astarte, sa di cơnòng Jesebel.”

²⁰Behơ̆, Ahap sồr cau lòt pơjum jơh Israel mơ ală cau gơnoar hwơr tus hơ mơnơm Karmel.

²¹Gen Eli tus rềp làng bol mơ đơs lah: “Bol mê lòt bàr đah jơl tus di tŭ lơi taih? Dilah Yàng Jehôwa la Yàng Tom Trồ, gen jat tĕ Kơnràñ; dilah Baal gen jat tĕ gơ.” Mơya làng bol ò ho dô jơnau lơi.

²²Gen Eli đơs mơ làng bol lah: “Añ, mìng dô nă añ gam wơl tòm ală cau gơnoar hwơr Yàng Jehôwa dê; ai ală cau gơnoar hwơr Baal dê khà la poan rhiang pram jơt nă.

²³Behơ̆, ai tĕ bol he in bàr nơm kơnrồ dam; lòi tĕ bol khai sac dô nơm, blah dô pet, dô pet, dap hơđang lòng, mơya bañ sing ồs. Ai añ, añ rơp lơh dô nơm kơnrồ ne, ơn gơ hơđang lòng, mơya ò sing ồs.

²⁴Gen bol mê hòi tĕ di sơnđan yàng bol mê dê, ai añ, añ rơp hòi dan di sơnđan Yàng Jehôwa. Yàng lơi ho jơnau mơ ồs, hơ̆ ngan la Yàng Tom Trồ.” Gen jơh làng bol ho lah: “Jơnau đơs hơ̆ la di ngan.”

²⁵Gen Eli đơs mơ ală cau gơnoar hwơr Baal lah: “Sac tĕ bol mê in dô nơm kơnrồ dam, lơh poac lài, tài bơh bol mê gơs oă; gen hòi dan tĕ di sơnđan yàng bol mê dê; mơya bañ sing ồs.”

²⁶Behơ̆, bol khai kup dô nơm kơnrồ mơ cau neh lơh poac gơ; mơ hòi dan dê sơnđan yàng Baal bơh àng drim jơl tus nggùl ngai, mơ lah: “Ơ Baal! Dan ho jơnau bol hi.” Mơya ò gơs sap đơs lơi, kung ò gơs jơnau ho lơi; bol khai tòmya gùt dar cơnòng duh khoai bol khai neh bơt.

²⁷Tus di nggùl ngai, Eli dơñŏ tơnhial bol khai lah: “Driau nggà dờng tĕ, bơh khai la hwềng: digơlan khai ơm kơlôi sơnơng; digơlan gam ơm tiah ngài, digơlan gam lòt gùng; hala digơlan khai ơm bic, mơ rơp guh.”

²⁸Behơ̆, bol khai hòi driau dờng; mơ jat bơta òs mòng bol khai ai đào còr să he jơl tus mhàm hòr bơh di bol khai.

²⁹Tŭ rlau mơ nggùl ngai rau, bol khai kư̆ đơs hwơr behơ̆ jơl tus di jơ ơn phan pơdơng bơsàp trồ mho, mơya kung ò gơs sap đơs lơi, ò gơs jơnau ho wơl, mơ ò gơs cau lơi ho wơl.

³⁰Gen Eli đơs mơ jơh làng bol lah: “Tus tĕ rềp mơ añ;” mơ jơh làng bol tus rềp mơ khai. Gen lài ngan Eli rcang niam wơl cơnòng duh khoai Yàng Jehôwa dê neh kòl phà tơrlah.

³¹Khai ai jơt bàr nơm pơnai lŭ, jat khà jơt bàr jơi bơtiàn ală kòn klau Jakôp dê, la cau mơ jơnau Yàng Jehôwa neh yal lah: “Israel rơp la sơnđan mê.”

³²Khai ngui jơt bàr nơm pơnai lŭ hơ̆ mơ bơtào gơs dô nơm cơnòng duh khoai sơnđan Yàng Jehôwa dê. Gen khai tò dô nơm rbòng gùt dar cơnòng duh khoai, ơn bàr lơ-i gar kòi;

³³gen dap lòng, blah kơnrồ dam dô pet, dô pet, mơ dap gơ hơđang lòng. Khai đơs lah: “Bơ̆ tĕ bềng poan yang dà, mơ cèng tuh hơđang phan ơn chu mơ hơđang lòng.”

³⁴Khai đơs tai: Lơh tĕ dơ̆ bàr; gen cau lơh dơ̆ bàr. Khai đơs pơnjat: lơh tĕ dơ̆ pe, mơ bol khai lơh dơ̆ pe,

³⁵jơl tus dà hòr gùt dar cơnòng duh khoai, mơ bềng rbòng tai sơl.

³⁶Tus di jơ ơn phan ơn bơsàp trồ mho, cau gơnoar hwơr Eli tus rềp mơ dan lah: “Ơ Jehôwa Yàng Tom Trồ Abraham dê, Isak dê, mơ Israel dê, ngai do dan yal tơnggit lah Kơnràñ la Yàng Tom Trồ tòm Israel, mơ añ la dĭ gơna Kơnràñ dê, añ dòn bơr Kơnràñ mơ lơh ală broă do.

³⁷Ơ Yàng Jehôwa! Dan ho jơnau añ, dan ho jơnau añ, tồ làng bol do đal git lah Jehôwa la Yàng Tom Trồ, mơ Kơnràñ lơh nùs bol khai rê wơl.”

³⁸Gen ồs Yàng Jehôwa dê mù bơh hơđang, chu pơrguc jơh phan ơn pơdơng chu, lòng, lŭ, mơ jồp jơh dà tòm rbòng.

³⁹Gŏ behơ̆, jơh làng bol tơmbic să tòm ù, mơ driau lah: “Jehôwa ngan la Yàng Tom Trồ! Jehôwa ngan la Yàng Tom Trồ!”

⁴⁰Eli đơs mơ bol khai lah: “Kup tĕ jơh ală cau gơnoar hwơr Baal dê, bañ lòi klàs dô nă lơi.” Gen cau Israel kup bol khai, Eli cèng bol khai mù hơ croh Kisôn, mơ tơnchơt bol khai tềng hơ̆.

⁴¹Gen Eli đơs mơ Ahap lah: “Guh tĕ, sa mơ ñô, bơh añ neh kơno ntas mìu dờng.”

⁴²Behơ̆, Ahap guh sa mơ ñô. Eli guh hơđang bồ mơnơm Karmel, kun tòm ù mơ drup mat he digùl bàr nơm gơltang.

⁴³Khai đơs mơ cau dĭ gơna khai dê lah: “Tŭ do guh tĕ, sền hơ đah dàlềng.” Cau dĭ gơna guh mơ sền, mơ đơs lah: “Ò gơs chi lơi.” Eli đơs tai: “Guh wơl tĕ poh dơ̆.”

⁴⁴Gen dơ̆ poh, cau dĭ gơna đơs lah: “Añ gŏ bơh đah dàlềng gơguh dô puk mhwal dềt kàr kơndồm tê.” Gen Eli pơnjat: “Lòt đơs tĕ mơ Ahap lah: ‘Kơt tĕ ừn rơndeh ơseh mơ mù, lài mơ tŭ mìu bàn bơtau kòl ơm wơl.’”

⁴⁵Tòm dô êt jŏ, trồ gơlik jù bơh mhwal, mơ càl, mơ gơs mìu dờng ngan. Gen Ahap hào hơđang rơndeh khai dê lòt tus hơ Jejreel.

⁴⁶Tê Yàng Jehôwa ơn hơđang Eli, khai kơt but mơ ntoat di đap Ahap tus di mpồng mut tòm Jejreel.