Read koho I Ală Bơtau 19 Bible Online

I Ală Bơtau 19 - koho bible

I Ală Bơtau 19

¹Ahap yal wơl Jesebel in ală broă Eli neh lơh, mơ mbe khai neh tơnchơt jơh ală cau gơnoar hwơr Baal mơ đào,

²Gen Jesebel sồr dô nă cau lòt tus hơ Eli mơ đơs lah: “Dan ală yàng lơh añ kơnjơ̆ rlau behơ̆, dilah añ ò lơh bơta kis mê dê be bơta kis dô nă tòm bol khai, jơ do ngai hìng.”

³Behơ̆ tàng, Eli rngòt ngan, khai ñă ntoat dô nàng dong klàs bơta kis khai dê, mơ lòt tus hơ Beerseba, gơrê mơ Juda, khai lòi cau dĭ gơna khai ơm tềng hơ̆.

⁴Ai să tòm khai gen lòt gùng tòm dô ngai tus tòm ƀlàng ngềt ngơt, tus nggui hơđơm chi pơnggŏ, mơ dan chơt lah: “Ơ Yàng Jehôwa! Neh tơl rau. Tă tĕ bơta kis añ, bơh añ ò niam rlau mơ ală ồng pàng añ jê.”

⁵Gen khai tơmbic să hơđơm chi pơnggŏ mơ bic lơhă. Nisơna gơs dô nă cau gơnrơh tup di khai mơ đơs lah: “guh tĕ mơ sa.”

⁶Khai sền gŏ di tiah bồ bic gơs dô nơm ƀañ dềt buh hơđang ồs rnga, mơ dô gri dà. Khai sa mơ hùc, gen bic tai.

⁷Cau gơnrơh Yàng Jehôwa dê tus dơ̆ bàr, tup di khai mơ đơs lah: “Guh tĕ mơ sa, bơh gùng ngài ngan mê in.”

⁸Khai guh sa mơ hùc, gen khai geh pràn bơh phan sa hơ̆ mơ khai lòt gùng poan jơt ngai mơ poan jơt mơnang tus hơ Hôrep, la mơnơm Yàng Tom Trồ dê.

⁹Tềng hơ̆, khai mut tòm dô nơm rgồng lŭ, mơ bic mang tềng hơ̆. Gen gơs jơnau Yàng Jehôwa dê đơs mơ khai lah: “Ơ Eli, ñchi mê lơh tềng do taih?”

¹⁰Khai ho lah: “Añ neh jơh nùs, ngac ngar bơh Jehôwa Yàng Tom Trồ Gơnap Gơnoar Dờng Làm Jơh; bơh làng bol Israel neh sang lòi bơta ho bal Kơnràñ dê, phà tơrlah ală cơnòng duh khoai Kơnràñ dê, mơ tơnchơt ală cau gơnoar hwơr Kơnràñ dê mơ đào; mìng dô nă añ gam wơl, mơ bol khai kung jòi bơta kis añ nàng tơnchơt.”

¹¹Yàng Tom Trồ đơs mơ khai lah: “Lik tĕ, ntào di jơng mơnơm di đap Yàng Jehôwa, bơh Yàng Jehôwa rơp lòt gan.” Tŭ do gơs dô ròs càl dờng khồm pràn ngan di đap Kơnràñ, crè ală mơnơm, mơ lơh bơcah ală pơnai lŭ gơlik rpot rpet; mơya Yàng Jehôwa ò ơm tòm càl. Tơnơ̆ mơ ròs càl gơs dô bơta gơlơnggơr ù, mơya Yàng Jehôwa ò ơm tòm ù lơnggơr;

¹²tơnơ̆ mơ bơta gơlơnggơr ù gơs lơmpiat ồs; mơya ò gơs Yàng Jehôwa tòm lơmpiat ồs. Tơnơ̆ mơ lơmpiat ồs, gơs dô jơnau ngan la lơbơn niam.

¹³Tòm tŭ Eli pa kơno jơnau hơ̆, gen gòm muh mat mơ ào jrùh, lik ntào di bơr rgồng. Gen gơs dô jơnau đơs mơ khai lah: “Ơ Eli, ñchi mê lơh tềng do taih?”

¹⁴Khai ho lah: “Añ neh jơh nùs ngac ngar bơh Jehôwa Yàng Tom Trồ Gơnap Gơnoar Dờng Làm Jơh dê, bơh làng bol Israel neh sang lòi bơta ho bal Kơnràñ dê, phà tơrlah ală cơnòng duh khoai Kơnràñ dê, tơnchơt ală cau gơnoar hwơr Kơnràñ dê mơ đào, mìng dô nă añ gam wơl, mơ bol khai kung jòi bơta kis añ nàng tơnchơt.”

¹⁵Gen Yàng Jehôwa đơs mơ khai lah: “Lòt tĕ, rê wơl tòm gùng mê lòt hơ ƀlàng ngềt ngơt hơ Damas. Tòm tŭ neh tus rau, mê rơp bong mơñà Hajael in lơh gơs bơtau Siri.

¹⁶Mê kung bong mơñà Jehu in, kòn klau Nimsi, lơh bơtau hơđang Israel; mơ mê rơp bong mơñà Elise in, kòn klau Saphat tòm Abelmehola, lơh gơs cau gơnoar hwơr ala mê in.

¹⁷Cau lơi klàs bơh đào Hajael dê gen Jehu rơp tơnchơt; cau lơi klàs bơh đào Jehu dê gen Elise tơnchơt.

¹⁸Mơya Añ rơp ơn is poh rbô nă cau tòm Israel jơh ală gơltang hơ̆ òhềt cùn khoai di đap Baal, mơ kòp nơm sơndồi bol khai òhềt cum gơ.”

¹⁹Behơ̆, Eli lòt bơh hơ̆ mơ tìp Elise kòn klau Saphat dê, ơm lơòr sre, gơs jơt bàr yô kơnrồ di đap khai, să tòm khai at yô dơ̆ jơt bàr. Eli lòt gan sơrbì ào jrùh hơđang khai.

²⁰Gen Elise sang kơnrồ khai dê, ntoat jat Eli mơ đơs lah: “Dan lòi añ rê cum mè bèp añ sir, gen añ rơp jat ồng.” Eli ho lah: “Lòt tĕ mơ rê wơl; bơh añ ò lơh ñchi lơi di mê.”

²¹Gen Elise rê wơl bơh tiah jat Eli, kup dô yô kơnrồ tơnchơt gơ, mơ ai ngal lơh lòng nàng gơm poac gơ, mơ yò gơ ală cau in sa. Gen khai ñă lòt jat Eli, mơ gơlik gơs cau duh broă Eli in.