Read koho I Ală Bơtau 21 Bible Online

I Ală Bơtau 21 - koho bible

I Ală Bơtau 21

¹Tơnơ̆ ală broă hơ̆, gơlik gơs dô bơta be do: Nabôt, cau Jejreel, gơs dô nơm suơn ño tòm Jejreel, di gah gơlang bơtau Ahap, tòm Samari.

²Ahap đơs mơ Nabôt lah: “Ai tĕ suơn ño mê dê añ in, nàng añ lơh suơn biap, tài bơh gơ ơm rềp di gơlang añ; añ rơp ai mê in dô nơm suơn ño niam rlau; hala dilah mê kòñ, añ rơp ai mê in priă kas ngan.”

³Mơya Nabôt đơs mơ Ahap lah: “Yàng Jehôwa bơkơ̆u añ ai bơtau in sre brê ồng pàng añ jê!”

⁴Ahap rê hìu moat mơ gơjrañ, bơh jơnau Nabôt, cau Jejreel neh đơs mơ khai; bơh khai neh đơs lah: “Añ rơp ò ai bơtau in sre brê ồng pàng añ jê.” Ahap bic hơđang cơnòng, wèt mat đah dơrñang, mơ ò bài sa.

⁵Bau khai la Jesebel tus mơ khai, đơs lah: “Ñchi bơh tài bơtau gơs nùs moat jrùng mơ ò bài sa taih?”

⁶Khai ho: “Bơh añ neh đơs mơ Nabôt, cau Jejreel lah: Ai tĕ suơn ño mê dê añ in mơ dòp priă, hala dilah mê kòñ, añ rơp ai mê in suơn ño ndai;” Mơya khai ho: “Añ ò ai suơn ño añ jê bơtau in.”

⁷Bau bơtau la Jesebel đơs lah: “Ò di bơtau gơs gơnoar at bồ hơđang Israel ơ? Guh tĕ, sa mơ chò hòp tĕ. Añ rơp ai bơtau in suơn ño Nabôt cau Jejreel.”

⁸Behơ̆, Jesebel cih sră pơyoa ai sơnđan Ahap, tap ƀang kì bơtau, pơyoa ală kwang kra mơ ală cau màng ryŭ ơm tòm ƀòn dờng bal mơ Nabôt.

⁹Khai cih tòm sră pơyoa be do: “Yal tơnggit tĕ dô bơta ơt sa, mơ ơn Nabôt nggui di đap làng bol;

¹⁰ơn tĕ di đap mat khai bàr nă cau gơlềng gơlàng lơh cơng blac tòmdră mơ khai, lah: ‘Mê neh srat rma Yàng Tom Trồ mơ bơtau.’ Gen lam tĕ khai lik bơh ƀòn, cơm lŭ jơl chơt tơn.”

¹¹Ală cau tòm ƀòn dờng Nabôt dê, hơ̆ la ală cau kwang kra, mơ ală cau màng ryŭ tềng hơ̆, lơh jat jơnau Jesabel nting sồr bol khai, tòm toh be jơnau neh cih tòm sră Jesebel neh pơyoa bol khai in.

¹²Bol khai yal tơnggit dô bơta ơt sa mơ ơn Nabôt nggui hơđap làng bol.

¹³Bàr nă cau gơlềng gơlàng tus nggui di đap Nabôt, mơ bol khai yă blac tòmdră mơ Nabôt di đap làng bol, lah: “Nabôt neh srat rma Yàng Tom Trồ mơ bơtau.” Gen bol khai lam Nabôt lik hơ bơdìh ƀòn dờng, mơ cơm lŭ tơnchơt khai.

¹⁴Gen bol khai sồr lòt yal mơ Jesabel lah: “Nabôt neh kong cơm lŭ; mơ neh chơt rau.”

¹⁵Dơ̆ Jesabel kơno lah Nabôt neh kong cơm lŭ mơ neh chơt rau, gen đơs mơ Ahap lah: “Lòt tĕ, ai suơn ño Nabôt, cau Jejreel, bơh suơn hơ̆ khai neh ò bài ai bơtau in nàng dòp priă; bơh Nabôt ò gam kis tai, neh chơt rau.”

¹⁶Dơ̆ Ahap kơno Nabôt neh chơt rau, gen Ahap lik lòt tus hơ suơn ño Nabôt, cau Jejreel, nàng dòp gơlơh gơs phan tòm.

¹⁷Gen gơs jơnau Yàng Jehôwa tus mơ Eli, cau Thisebe, lah:

¹⁸“Mù tĕ lòt tìp mơ Ahap, bơtau Israel, at bồ tòm Samari; tŭ do khai ơm tòm suơn ño Nabôt dê, khai neh lòt tềng hơ̆ nàng lơh gơs phan tòm khai dê.”

¹⁹Mê rơp đơs mơ khai lah: Yàng Jehôwa đơs be do: “Mê neh tơnchơt cau, mơ kung tòmpìt sre brê ơ?” Mê pal đơs mơ khai lah: “Tòm tiah so neh liap mhàm Nabôt dê, gen so kung rơp liap mhàm mê behơ̆ sơl.”

²⁰Ahap đơs mơ Eli lah: “Ơ cau sò tơm, mê neh tìp añ ơ?” Eli ho lah: “Añ neh tìp bơtau, tài bơh bơtau neh tac să he nàng lơh bơta iơh di đap Yàng Jehôwa.”

²¹“Añ rơp cèng tus bơta rung rài hơđang mê. Añ rơp tơnroh mê, mơ añ rơp pơndut bơh di hìu Ahap jơh ală cau klau, bulah cau ơm dĭ hala cau khat gơboh tòm Israel;

²²mơ Añ rơp lơh hìu mê be hìu Jerôbôam kòn klau Nebat dê, mơ be hìu Baesa kòn klau Ahija, tài bơh mê neh bơrcek Añ gơjrañ, mơ neh lơh Israel tìs glài.

²³Gơwèt mơ Jesebel Yàng Jehôwa kung đơs lah: ‘So rơp sa poac Jesabel đah dơlam dơrñang Jejreel.’

²⁴Cau lơi gơrê bal mơ hìu Ahap, cau chơt tòm ƀòn dờng ală so rơp sa poac; mơ cau lơi chơt tòm ƀlàng sre gen sềm trồ rơp sa poac.”

²⁵(Ngan, ò gơs cau lơi be Ahap, la cau neh tac să nàng lơh bơta iơh di đap Yàng Jehôwa, mơ khai kòl chồl bơtrut bơh bau ùr khai la Jesebel.

²⁶Khai neh lơh bơta cù kìr rlau jơh tòm tŭ lòt jat ală rùp ràk, be cau Amôrit neh lơh, la làng bol mơ Yàng Jehôwa neh bơtrơh tơlik di đap làng bol Israel.)

²⁷Tòm tŭ Ahap neh kơno jơnau hơ̆, khai crè ồi ào khai dê; mơ soh ƀào di să mơ ơt sa; yùp mơ ƀào bic tòm tiah mơ ơm pơndêt să.

²⁸Gen gơs jơnau Yàng Jehôwa tus đơs mơ Eli, cau Thisebe, lah:

²⁹“Mê neh gŏ mbe lơi Ahap pìn pơndêt să di đap mat Añ sơl? Tài bơh khai pìn pơndêt să di đap Añ, Añ rơp ò cèng tus bơta rung rài tòm rài khai; mơya tòm rài kòn klau khai Añ rơp cèng bơta rung rài hơđang hìu khai dê.”