Read koho II Ală Bơtau 1 Bible Online

II Ală Bơtau 1 - koho bible

II Ală Bơtau 1

¹Tơnơ̆ mơ bơta chơt Ahap dê, làng bol Môap guh tòmdră mơ Israel.

²Acasia dùh bơh di pơnggàr rơng ơdŭ hơđang khai dê tòm Samari, mơ ơm bic tài bơh bơta jê sồt hơ̆. Behơ̆ khai sồr cau kong sồr lòt, mơ nting lah: “Lòt tĕ lùp Baaljebup, yàng cau Ekrôn dê, nàng git añ rơp bòi bơta kòp jê do sơl hala ò?”

³Mơya cau gơnrơh Yàng Jehôwa dê đơs mơ Eli, cau Thisebe lah: “Ñă tĕ, lòt tus tìp mơ ală cau kong sồr bơtau Samari dê, mơ đơs mơ bol khai lah: ‘Hơ̆ la tài bơh ò gơs Yàng Tom Trồ tòm Israel, gen tàng mê lòt lùp Baaljebup, yàng cau Ekrôn dê ơ?’

⁴Gen tàng tŭ do Yàng Jehôwa đơs be do: ‘Mê rơp ò mù bơh cơnòng mơ mê neh bic, mơya mê ngan rơp chơt.’” Behơ̆ Eli lik lòt.

⁵Ală cau kong sồr lòt rê wơl mơ bơtau, khai lùp lah: “Ñchi bơh tài bol mê rê wơl taih?”

⁶Bol khai ho lah: “Gơs dô nă cau neh tus tìp bol hi, mơ đơs mơ bol hi lah: ‘Rê tĕ hơ bơtau la cau neh sồr bol mê lòt, mơ đơs mơ khai lah: Yàng Jehôwa đơs be do: “Ngan la tài bơh ò gơs Yàng Tom Trồ tòm Israel ơ, gen tàng mê sồr lòt lùp Baaljebup, yàng cau Ekrôn dê ơ? Tài bơh hơ̆, mê rơp ò mù bơh cơnòng mơ mê neh bic, mơya mê ngan rơp chơt.”’”

⁷Gen bơtau lùp bol khai lah: “Cau hơ̆ gơlơh mbe lơi, neh tus tìp bol mê đơs ală jơnau hơ̆ taih?”

⁸Bol khai ho lah; “Cau hơ̆ soh ào sơnò, mơ kơt but mơ che gơltau.” Bơtau đơs lah: “Hơ̆ la Eli, cau Thisebe.”

⁹Gen bơtau sồr dô nă cau kwang at bồ pram jơt ling lòt bal mơ pram jơt nă cau ling guh tus hơ Eli. Eli ơm nggui hơđang bồ kơh. Khai đơs mơ Eli lah: “Ơ cau Yàng Tom Trồ dê, bơtau đơs mơ ồng lah: mù tĕ!”

¹⁰Mơya Eli ho wơl mơ kwang at bồ pram jơt ling lah: “Dilah añ la cau Yàng Tom Trồ dê, dan ồs bơh hơđang trồ mù chu pơrguc mê, bal mơ pram jơt nă ling mê dê!” Gen ồs bơh đang trồ mù mo chu pơrguc kwang at bồ bal mơ pram jơt ling khai dê.

¹¹Bơtau sồr tai dô nă kwang at bồ ling ndai mơ pram jơt ling khai dê lòt tus hơ Eli. Cau kwang do đơs mơ Eli lah: “Ơ cau Yàng Tom Trồ dê, bơtau đơs be do: Mù tĕ mhar mhar.”

¹²Mơya Eli ho mơ khai lah: “Dilah añ la cau Yàng Tom Trồ, dan ồs mù bơh đang trồ chu pơrguc mê bal mơ pram jơt ling mê dê.” Gen ồs Yàng Tom Trồ dê bơh đang trồ mù chu pơrguc kwang at bồ bal mơ pram jơt ling khai dê.

¹³Gen bơtau sồr tai dô nă kwang at bồ ling lòt bal mơ pram jơt ling khai dê. Cau kwang do guh hơđang, cùn gơltang di đap Eli, mơ dan lah: “Ơ cau Yàng Tom Trồ dê, dan lòi bơta kis añ jê bal mơ bơta kis pram jơt nă cau dĭ gơna ồng dê, geh sền dờng màng di đap mat ồng.

¹⁴Ne, ồs neh mù bơh đang trồ, chu pơrguc bàr nă kwang at bồ pram jơt ling lài, bal mơ pram jơt ling bol khai dê; mơya tŭ do, dan sền bơta kis añ jê la dờng màng di đap mat ồng.”

¹⁵Cau gơnrơh Yàng Jehôwa dê đơs mơ Eli lah: “Mù tĕ bal mơ khai, bañ rngòt di khai.” Behơ̆, Eli mù mơ lòt bal mơ cau kwang at bồ tus hơ bơtau.

¹⁶Khai đơs mơ bơtau lah: Yàng Jehôwa đơs be do: “Tài bơh bơtau neh sồr cau lòt tus hòi lùp Baaljebup, yàng Ekrôn dê, ngan tài bơh tòm Israel ò gơs Yàng Tom Trồ nàng hòi lùp ơ? Gen tàng mê rơp ò mù bơh cơnòng mơ mê neh guh; bơh mê ngan rơp chơt.”

¹⁷Behơ̆, Acasia chơt jat be jơnau Yàng Jehôwa mơ Eli neh đơs. Jôram (hơ̆ la oh Acasia dê tài bơh khai ò gơs kòn klau) pơrdòn sơbàn lơh gơs bơtau, tòm nam dơ̆ bàr bơtau Jôram, kòn klau Jôsaphat, bơtau Juda dê.

¹⁸Ală broă ndai Acasia neh lơh, neh geh cih tòm sră yal broă kòp nam ală cau bơtau Israel dê.