Read koho II Ală Bơtau 10 Bible Online

II Ală Bơtau 10 - koho bible

II Ală Bơtau 10

¹Tŭ hơ̆ Ahap gơs poh jơt nă kòn klau ơm tòm Samari. Behơ̆ Jehu cih sră pơyoa hơ ală cau at bồ Jejreel in tòm Samari, pơyoa tus hơ ală cau kwang kra, mơ ală cau bơto ală kòn klau Ahap dê mơ đơs lah:

²“Bơh ală kòn klau cau tòm bol mê gam ơm bal mơ bol mê, mơ tài bơh bol mê gơs oă rơndeh, ơseh, ƀòn dờng kơ̆ cê, mơ phan tòmlơh,

³pồ bơtào tĕ kòn klau cau tòm bol mê dê, dô nă cau jak chài rlau, ơn khai hơđang sơbàn bèp khai dê, mơ tòmlơh bơh hìu cau tòm bol mê in.”

⁴Mơya jơh ală bol khai rngòt rngơt ngan, mơ đơs lah: “Sền tĕ, bàr nă bơtau ò jai ntào di đap khai, tơ ài lah bol he, mbe rgơi ntào jai taih?”

⁵Kwang at bồ gơlang mơ kwang at bồ ƀòn, bal mơ ală kwang kra mơ ală cau gơnoar bơto ală kòn klau Ahap dê, sồr đơs mơ Jehu lah: “Bol hi la dĭ gơna ồng dê; bol hi rơp lơh ală bơta ồng đơs. Bol hi ò kòñ bơtào dô nă cau lơi lơh gơs bơtau, lơh tĕ bơta lơi jat nùs ồng kơlôi la di.”

⁶Gen Jehu cih bol khai in dô pang sră pơyoa dơ̆ bàr, mơ đơs lah: “Dilah bol mê ơm đah mơ añ, mơ dilah bol mê neh kòñ lơh jat jơnau añ jê, ai tĕ bồ ală kòn klau cau tòm bol mê dê cèng lòt tus mơ añ tòm Jejreel ngai hìng di di jơ do.” Tŭ hơ̆ poh jơt nă kòn klau bơtau dê gam ơm mơ ală cau kwang at bồ ƀòn dờng, la ală cau sền gàr ròng siam bol khai.

⁷Tòm tŭ neh dòp sră pơyoa, gen bol khai kup poh jơt nă kòn klau bơtau dê, mơ tơnchơt jơh, mơ ơn bồ ală kòn bơtau dê tòm ală sah mơ pơyoa tus hơ Jejreel Jehu in.

⁸Tòm tŭ cau tus yal Jehu in, lah: “Cau neh cèng tus bồ ală kòn klau bơtau dê.” Jehu đơs: “Dap tĕ tòm bàr nơm gơnru di tiah mpồng ƀòn jơl tus ngai hìng.”

⁹Àng drim ngai hìng, Jehu lik lòt, ntào di đap jơh làng bol mơ đơs lah: “Bol mê ò gơs glài lơi, añ la cau tòmdră mơ cau tòm añ, mơ neh tơnchơt khai; mơya ñcau neh tơnchơt ală cau do taih?

¹⁰Gen git tĕ lah rơp ò gơs bơta lơi dùh tòm ù tòm ală jơnau Yàng Jehôwa dê, la jơnau Yàng Jehôwa neh đơs bơh hìu Ahap; tài bơh Yàng Jehôwa neh lơh gơlik gơs be jơnau Kơnràñ neh đơs kơnòm di Elise dĭ gơna Kơnràñ dê.”

¹¹Behơ̆ Jehu kung tơnchơt jơh ală cau gam wơl tòm hìu Ahap ơm tòm Jejreel, bal mơ ală kwang bàng, ală cau bơyô đềt mềr, mơ ală cau gơnoar ơn phan pơdơng khai dê, tian gơs ò gam wơl dô nă lơi.

¹²Gen Jehu ñă lòt tus hơ Samari. Rò gùng tòm tŭ neh tus rềp tum cau ê belàt,

¹³Jehu tìp ală cau gơp bơtiàn Acasia bơh Juda mơ lùp lah: “Bol mê la ñcau taih?” Bol khai ho lah: “Bol hi la oh mi mơ Acasia dê; bol hi neh tus nàng còp ală kòn klau bơtau mơ mè bau ùr bơtau dê.”

¹⁴Gen Jehu sồr lah: “Kup kis bol khai.” Gen cau kup kis bol khai mơ tơnchơt bol khai di trồm tum cau ê belàt, jơh ală bol khai la poan jơt bàr nă; ò lòi dô nă cau lơi.

¹⁵Lòt bơh tềng hơ̆, Jehu tìp Jehônadap, kòn klau Rekap, lòt tus rò khai. Khai lùp còp Jehônadap, mơ đơs lah: “Nùs mê dòn song mơ añ, be nùs añ neh dòn song mơ mê sơl?” Jehônadap ho lah: “Ngan behơ̆.” Jehu đơs: “Behơ̆ gen, dilah dòn song, pò tĕ tê mê añ in.” Gen Jehônadap pò tê khai in. Jehu sồr khai hào rơndeh bal mơ khai,

¹⁶mơ đơs lah: “Tus tĕ mơ añ, sền nùs ngac ngar añ jê bơh Yàng Jehôwa.” Behơ̆, Jehu mơ khai hào hơđang rơndeh.

¹⁷Tòm tŭ neh mut tòm Samari rau, khai tơnchơt jơh ală cau gam wơl hìu Ahap dê tòm Samari, tian gơs neh pơs goh jơh hìu hơ̆, be jơnau Yàng Jehôwa dê neh đơs mơ Eli.

¹⁸Gen Jehu pơjum jơh ală làng bol, mơ đơs mơ bol khai lah: “Ahap ơn phan pơdơng Baal dô êt lơm; mơya Jehu rơp ơn phan pơdơng oă rlau tai.

¹⁹Behơ̆ tŭ do, pơjum tĕ añ in ală cau gơnoar hwơr Baal dê, ală cau duh khoai khai, mơ jơh ală cau gơnoar ơn phan pơdơng khai dê. Bañ lòi siơ̆u dô nă lơi, bơh añ gơs nùs kòñ ơn phan pơdơng dờng Baal in. Dilah cau lơi ò tus, ngan rơp ò kis.” Mơya, Jehu ngui kai gơrmơ̆i, nàng tơnroh ală cau duh khoai yàng Baal.

²⁰Jehu tơlik gơnoar sồr lah: “Lơh sàng goh tĕ dô ngai wèr pơjum dờng màng Baal in.” Gen bol khai yal tơnggit bơta pơjum hơ̆.

²¹Jehu pơyoa jơnau tus làm jơh Israel; jơh ală cau duh khoai Baal neh tus, tian gơs ò gơs dô nă lơi ò tus. Bol khai mut tòm hìu duh khoai Baal; mơ hìu duh khoai bềng hat bơh dơrñang do tus hơ dơrñang ne.

²²Jehu đơs mơ ală cau prap ào wèr lah: “Cèng tơlik tĕ ală ào pơjum ngai wèr ală cau duh broă Baal in.” Behơ̆ khai cèng tơlik ào soh pơjum ngai wèr bol hơ̆ in.

²³Gen Jehu mut tòm hìu duh khoai Baal bal mơ Jehônadap, kòn klau Rekap, đơs mơ ală cau duh broă Baal lah: “Jòi sền nề nề tĕ, tềng do ò gơs dĭ gơna lơi Yàng Jehôwa dê, mìng ală dĭ gơna Baal dê lơm.”

²⁴Gen bol khai tus nàng ơn ală phan ơn pơdơng chu. Mơ tai, Jehu neh ơn phàm jơt nă ơm kơp đah bơdìh hìu duh khoai, mơ nting sồr bol khai lah: “Cau lơi lòi dô nă cau tòm ală cau mơ añ neh jào tòm tê bol mê klàs, gen pal tơm mơ bơta kis khai dê.”

²⁵Tŭ neh ơn phan ơn chu sir rau, Jehu đơs mơ mpồl ling kơp gàr mơ ală cau kwang at bồ ling lah: “Tus tĕ tơnchơt bol khai, bañ lòi dô nă cau lơi klàs.” Behơ̆, bol khai tơnchơt bol hơ̆ mơ đào. Mpồl ling kơp gàr mơ ală kwang at bồ ling sơrbì ƀồc bol hơ̆ đah bơdìh, sơrbac sơrbang mut tòm dơlam hìu duh khoai Baal.

²⁶Bol khai tă tơlik jơh ală phan duh khoai bơh hìu duh khoai mơ chu jơh,

²⁷Bol khai pòng bơcah rùp ràk Baal, mơ phà tơrlah hìu duh khoai gơ dê, lơh gơlik gơs dô bă tiah lòt jă brê gam jơl tus di ngai do.

²⁸Behơ̆, Jehu pơs goh Baal bơh di Israel.

²⁹Mơya khai ò sang lòi tồi glài Jerôbôam, kòn klau Nebat dê, hơ̆ la glài neh lơh cau Israel gơtup tìs: hơ̆ la khai gam lòi wơl ală rùp ràk kơnrồ màh tòm Betel mơ Dan.

³⁰Yàng Jehôwa đơs mơ Jehu lah: “Tài bơh mê neh lơh niam, cahrña song ring di đap mat Añ, mơ lơh gơwèt mơ hìu Ahap jat nùs kòñ Añ, gen tàng kòn klau mê rơp nggui hơđang sơbàn Israel jơl tus di rài dơ̆ poan.”

³¹Mơya Jehu ò jơh nùs lơh jat bơta boh lam Jehôwa Yàng Tom Trồ Israel dê; khai ò sang lòi tồi glài Jerôbôam dê, hơ̆ la glài neh lơh cau Israel in tìs glài.

³²Tòm tŭ hơ̆, Yàng Jehôwa sơntòm koh pơndut pơnah kơnhwàl Israel dê, ai gơnoar Hajael brồ lơh bol khai hơđang làm lơgar Israel dê,

³³bơh đah mattơngai lik hiòng Jordan, jơh ù tiah Galaat, cau Gat, cau Ruben mơ cau Manase dê, bơh Arôer, la tiah bơh Croh Arnôn, hơ̆ la Galaat mơ Basan.

³⁴Ală bơta ndai Jehu dê, ală broă khai lơh, mơ bơta pràn kơldang khai, neh geh cih tòm sră yal broă kòp nam ală cau bơtau Israel dê.

³⁵Khai bic lơhă bal mơ ală ồng pàng khai, geh tơp tòm Samari; Jehôahas, kòn klau khai, pơrdòn gơnoar khai.

³⁶Jehu at bồ hơđang Israel bàr jơt phàm sơnam tòm Samari.