Read koho II Ală Bơtau 11 Bible Online

II Ală Bơtau 11 - koho bible

II Ală Bơtau 11

¹Tòm tŭ Athali, mè Acasia dê, gŏ kòn klau he neh chơt rau, gen khai sồr tơnchơt jơh ală cau tòm hìu nhă cau bơtau dê.

²Mơya Jôseba, kòn ùr bơtau Jôram dê, mơ la bi ùr Acasia dê, kup kơñau Jôas, kòn klau Acasia dê, bơh digùl ală kòn klau bơtau mơ bơh di cau kòñ tơnchơt, ơn khai tòm ơdŭ bic bal mơ cau ròng tơmpô khai, mơ pồn khai klàs bơh di Athali; gen tàng khai ò gơkòl tơnchơt.

³Khai ơm mơ Jôseba prau nam, pồn să tòm hìu duh khoai Yàng Jehôwa dê, tòm tŭ Athali ơm at bồ hơđang lơgar.

⁴Mơya tòm nam dơ̆ poh, Jehôyada hòi pơjum ală kwang at bồ rhiang ling kơp gàr mơ ală ling sền gàr gơlang bơtau, mơ bol hơ̆ neh tus mơ khai tòm hìu duh khoai Yàng Jehôwa dê. Khai bơtào bơta ho bal mơ srat să ho nền di hìu duh khoai Yàng Jehôwa; gen sơnio kòn klau cau bơtau bol khai in.

⁵Khai sồr bol khai lah: “Do la bơta bol mê pal lơh: Dô pơnah pe tòm bol mê tus di ngai Saƀat, rơp kơp gàr gơlang bơtau;

⁶dô pơnah pe rơp kơp gàr mpồng Sur, ai dô pơnah pe rơp ơm di mpồng đah ngkòi ală cau ling sền gàr, pal sền gàr gơlang bơtau;

⁷mơ bàr pơnah pe tòm bol mê gơs broă tòm ngai Saƀat, mơ kơp gàr hìu duh khoai Yàng Jehôwa dê.

⁸Bol mê pal gơrwàng gùt dar bơtau, kòp nă at phan tòmlơh tòm tê. Cau lơi lòt tus mut tòm mpồl, gen tơnchơt tĕ khai. Ơm tĕ mơ bơtau, tòm tŭ bơtau mut hala lik.”

⁹Ală cau kwang at bồ dô rhiang ling lơh jat jơh ală bơta cau gơnoar ơn phan duh khoai Jehôyada dê nting sồr. Kòp nă cèng bal ală cau ơm tòm broă kơp gàr ngai Saƀat, ală cau hơ̆ tus nàng rcang broă tòm ngai Saƀat, mơ lòt tus mơ cau gơnoar ơn phan duh khoai Jehôyada.

¹⁰Cau gơnoar ơn phan duh khoai jào ală cau kwang at bồ dô rhiang ling in ală tà mơ khèl bơtau Dabit dê, neh ơn tòm hìu duh khoai Yàng Jehôwa dê.

¹¹Ală cau ling sền gàr ntào kòp nă at phan tòmlơh tòm tê, jat tap sèng gùt dar bơtau, bơh đah đang hìu duh khoai tus đah đơm hìu duh khoai, gùt dar cơnòng duh khoai mơ gùt dar hìu, nàng sền gàr bơtau bơh kòp đah.

¹²Gen Jehôyada tơlik kòn bơtau, tơndau sơgơn bơtau hơđang bồ khai, mơ jào sră bơta boh lam khai in; bol khai yal tơnggit mơ bong mơñà khai in lơh gơs bơtau, bol khai tàp tê mơ driau dờng lah: “Bơtau kis gam sùm sùm!”

¹³Tòm tŭ Athali kơno sap cau ling sền gàr mơ làng bol dê, gen khai mù tus mơ làng bol tòm hìu duh khoai Yàng Jehôwa dê.

¹⁴Khai gŏ cau bơtau ntào hơđang tiah kơnă cau bơtau ntào, jat be òs gơs ală cau kwang at bồ mơ ală cau uh kơlwòk ntào rềp bơtau, mơ jơh làng bol tòm lơgar hòn chò mơ uh kơlwòk. Athali crè ào khai mơ driau lah: “Pơrlơ̆ dră! Pơrlơ̆ dră!”

¹⁵Mơya cau gơnoar ơn phan duh khoai sồr ală kwang at bồ mpồl ling lah: “Cèng tĕ cau ùr hơ̆ lik bơh digùl mpồl ling, mơ dilah cau lơi jat khai, gen tơnchơt tĕ mơ đào.” Bơh cau gơnoar ơn phan duh khoai đơs lah: “Bañ tơnchơt khai tòm hìu duh khoai Yàng Jehôwa dê.”

¹⁶Cau ai tê kup khai; khai lòt gan gùng mpồng ơseh mut tòm gơlang bơtau, mơ tềng hơ̆ cau tơnchơt khai.

¹⁷Jehôyada bơtào bơta ho bal digùl Yàng Jehôwa mơ bơtau mơ làng bol, bol khai la làng bol Yàng Jehôwa dê; mơ kung bơtào bơta ho bal digùl bơtau mơ làng bol.

¹⁸Jơh làng bol lơgar dê lòt tus hơ bơmồng Baal mơ sòr tơrlah gơ, pòng bơcah cơnòng duh khoai mơ rùp ràk Baal dê, mơ tơnchơt Mathan, cau ơn phan duh khoai Baal, di đap cơnòng duh khoai. Cau gơnoar ơn phan duh khoai Jehôyada ơn cau kơp gàr hìu duh khoai Yàng Jehôwa dê.

¹⁹Khai cèng ală kwang at bồ, mpồl ling Karit, mpồl ling kơp gàr, mơ jơh làng bol tòm lơgar; bol khai rò cau bơtau bơh hìu duh khoai Yàng Jehôwa dê, lòt gan di mpồng tiah kơp gàr gơlang bơtau dê. Jôas nggui hơđang sơbàn bơtau.

²⁰Behơ̆ jơh làng bol tòm lơgar hòn chò, mơ ƀòn dờng geh ring lơngai tơnơ̆ mơ tŭ cau neh tơnchơt Athali mơ đào tòm gơlang bơtau.

²¹Jôas sơntòm at bồ tòm tŭ khai tơl poh sơnam.