Read koho II Ală Bơtau 12 Bible Online

II Ală Bơtau 12 - koho bible

II Ală Bơtau 12

¹Tòm nam dơ̆ poh rài Jehu, Jôas sơntòm at bồ, khai at bồ poan jơt sơnam tòm Jerusalem. Mè khai sơnđan la Jibia, ƀòn tòm Beerseba.

²Jôas lơh bơta niam di đap Yàng Jehôwa jơh rài khai, bơh cau gơnoar ơn phan duh khoai Jehôyada neh nting sồr khai.

³Bulah behơ̆, ală tiah jơnhoa òhềt tă sang, làng bol gam ơn phan pơdơng mơ ơn phan duh khoai hơđang ală tiah jơnhoa hơ̆.

⁴Jôas đơs mơ ală cau gơnoar ơn phan duh khoai lah: “Ală khà priă neh lơh nền ơn is sàng goh geh cèng tơmut tòm Hìu duh khoai Yàng Jehôwa, hơ̆ la priă kòp nă cau neh lơh nền khà ơn, khà priă bơh bơta neh lơh nền kòp nă dê, mơ priă kòp nă chò nùs cèng ơn tòm hìu duh khoai Yàng Jehôwa dê,

⁵lòi ală cau gơnoar ơn phan duh khoai dòp ală priă hơ̆ di ală cau neh mòng git, gen lòi bol khai rcang niam wơl ală tiah lơi tòm hìu duh khoai neh tơrlah dàng pal càng nàng rcang niam wơl.”

⁶Mơya tus di sơnam dơ̆ bàr jơt pe rài bơtau Jôas, ală cau gơnoar ơn phan duh khoai òhềt rcang niam wơl hìu duh khoai.

⁷Gen tàng bơtau Jôas hòi cau gơnoar ơn phan duh khoai Jehôyada mơ ală cau gơnoar ơn phan duh khoai ndai, mơ đơs mơ bol khai lah: “Ñchi bơh tài ò lơh niam wơl hìu duh khoai taih? Bơh do jơl hìng nau bañ dòp ală priă cau mòng git tai; mơya jào tĕ priă hơ̆ tòm tê ală cau rcang lơh niam wơl hìu duh khoai.”

⁸Behơ̆ ală cau gơnoar ơn phan duh khoai dô nùs bal ò dòp priă bơh làng bol tai, mơ kung ò rcang lơh niam wơl ală tiah bluh dàng hìu duh khoai tai sơl.

⁹Gen cau gơnoar ơn phan duh khoai Jehôyada ai dô nơm đài, lơh dô nơm trồm hơđang bơnap, gen ơn di gah cơnòng duh khoai, đah ma mpồng mut tòm hìu duh khoai Yàng Jehôwa dê. Ală cau gơnoar ơn phan duh khoai sền gàr di bơr mpồng cèng ơn tòm đài hơ̆ jơh ală priă mơ cau neh cèng tơmut tòm hìu duh khoai Yàng Jehôwa dê.

¹⁰Tòm tŭ bol khai gŏ gơs oă priă tòm đài, cau gơnoar cih bơtau dê, mơ cau gơnoar dờng ơn phan duh khoai lòt kòp priă neh gơs tòm hìu duh khoai Yàng Jehôwa dê, mơ kơt gơtòm kơldung.

¹¹Bol khai jào priă neh kòp hơ̆ tòm tê ală cau lơh broă, la cau sền gàr hìu duh khoai Yàng Jehôwa dê. Gen bol khai tơm jền cau chài lơh chi mơ cau chài bơt hìu in, la cau lơh broă tòm hìu Yàng Jehôwa dê.

¹²Tơm cau chài bơt dơrñang mơ cau chài phàt lŭ in, mơ bol khai kung blơi chi mơ lŭ ngui nàng rcang wơl Hìu duh khoai Yàng Jehôwa dê, mơ tơm wơl jền neh ngui bơh bơta rcang wơl hơ̆.

¹³Mơya cau ò lơh ală cờu priă, ală kơtrơi koh brài đèng, ală mơngàn, ală kơlwòk, hala ală phan ngui mơ màh, hala mơ priă, bơh di ală priă neh geh cèng ơn tòm hìu duh khoai Yàng Jehôwa dê;

¹⁴bơh ală priă hơ̆ neh ai ală cau chài lơh broă, la ală cau rcang lơh wơl hìu duh khoai Yàng Jehôwa dê.

¹⁵Bol khai ò sồr ală cau dòp priă nàng tơm jền tơngai ală cau lơh broă in, pal yal wơl nđò khà priă, tài bơh bol khai lơh broă dô bă song ngan.

¹⁶Jền priă bơh phan ơn tơwài bơta gơtup tìs, mơ jền priă bơh phan ơn tơwài glài, ò cèng tơmut tòm hìu duh khoai Yàng Jehôwa; gơ gơrê mơ ală cau gơnoar ơn phan duh khoai.

¹⁷Tŭ hơ̆, Hajael bơtau Aram, brồ tus tòmlơh mơ tiah Gat, mơ tòmpìt gơ. Mơya tòm tŭ khai ơn mat nàng guh tòmdră mơ Jerusalem,

¹⁸gen Jôas, bơtau Juda, ai jơh ală phan ơn Jôsaphat dê, Jôram mơ Acasia, ală ồng pàng khai dê, la bơtau Juda, neh ơn is sàng goh, bal mơ ală phan goh he dê, mơ jơh ală màh tòm đam jàr hìu duh khoai Yàng Jehôwa dê bal mơ tòm gơlang bơtau sơl, mơ pơyoa Hajael in, bơtau Aram; gen tàng Hajael neh lik bơh Jerusalem.

¹⁹Ală bơta ndai Jôas dê, ală broă khai lơh, gen neh cih tòm sră yal broă kòp nam ală cau bơtau Juda dê.

²⁰Ală dĭ gơna Jôas bơtào tòmdră mơ khai, tơnchơt khai tòm Milô, tòm gùng mù tòm Silla.

²¹Jôaca, kòn klau Simeat, mơ Jôsaƀat, kòn klau Sômer, la ală dĭ gơna khai neh tơnchơt khai. Cau tơp khai bal mơ ală ồng pàng khai dê tòm ƀòn dờng Dabit; Amajiah kòn klau khai, pơrdòn sơbàn khai.