Read koho II Ală Bơtau 13 Bible Online

II Ală Bơtau 13 - koho bible

II Ală Bơtau 13

¹Tòm nam dơ̆ bàr jơt pe rài Jôas kòn klau Acasia bơtau Juda, gen Jôaca kòn klau Jehu sơntòm at bồ hơđang Israel tòm Samari; khai at bồ jơt poh sơnam.

²Khai lơh bơta iơh di đap Yàng Jehôwa; đòm jat ală bơta tồi glài Jerôbôam, kòn klau Nebat, hơ̆ la glài khai neh lơh cau Israel in gơtup tìs; khai ò pleh ngài bơh tồi glài hơ̆.

³Bơta gơjrañ dờng Yàng Jehôwa dê gơhào khuh tòmdră mơ Israel, tài bơh hơ̆ Kơnràñ jào bol khai pơnjat sùm tòm tê Hajael bơtau Aram, mơ Benhadat kòn klau Hajael.

⁴Mơya Jôaca hòi dan di Yàng Jehôwa, mơ Yàng Jehôwa dòp jơnau hòi dan khai dê, bơh Kơnràñ gŏ mbe lơi bơtau Aram rồn bơklơn cau Israel.

⁵Gen tàng Yàng Jehôwa ai cau Israel in dô nă cau dong tă, behơ̆ tàng bol khai geh klàs bơh tê cau Aram, mơ cau Israel geh ơm wơl tòm hìu bol khai be lài òr.

⁶Bulah behơ̆, bol khai kung ò sang tồi glài hìu Jerôbôam dê, la glài khai neh lơh cau Israel in gơtup tìs; mơya kư̆ lòt jat bơta tìs glài hơ̆; jrong duh khoai yàng ùr Asera kung gam tòm Samari.

⁷Behơ̆, Jôaca ơm wơl mơ mpồl ling ò rlau pram jơt nă cau hào ơseh, jơt nơm rơndeh, mơ jơt rbô nă cau ling lòt jơng lơm; bơh bơtau Aram neh tơnroh bol khai, mơ lơh di bol khai be thul tòm ƀlàng pơrjòt kòi.

⁸Ală bơta ndai Jôaca dê, ală broă khai lơh, mơ bơta pràn kơldang khai dê, gen jơh neh cih tòm sră yal broă kòp nam ală cau bơtau Israel dê.

⁹Jôaca bic lơhă bal mơ ală ồng pàng khai dê, mơ cau tơp khai tòm Samari. Jôas kòn klau khai, pơrdòn sơbàn khai.

¹⁰Tòm nam dơ̆ pe jơt poh rài Jôas, bơtau Juda, gen Jôas kòn klau Jôaca, sơntòm at bồ hơđang Israel tòm Samari; khai at bồ jơt prau nam.

¹¹Khai lơh bơta iơh di đap Yàng Jehôwa, ò sang lòi tồi glài Jerôbôam, kòn klau Nebat, la glài neh lơh cau Israel in tìs glài, mơ kư̆ lòt jat rùp ràk hơ̆.

¹²Ală bơta ndai Jôas dê, ală broă khai lơh, mbe lơi khai tòmlơh mơ Amajiah, bơtau Juda, mơ bơta pràn kơldang khai dê mbe lơi, gen neh cih tòm sră yal broă kòp nam ală cau bơtau Israel dê.

¹³Jôas bic lơhă bal mơ ồng pàng khai, mơ Jerôbôam pơrdòn sơbàn khai; Jôas geh tơp tòm Samari bal mơ ală cau bơtau Israel.

¹⁴Tŭ hơ̆, tòm tŭ Elise kòp jê, tài bơh kòp jê hơ̆ gen khai pal chơt. Jôas, bơtau Israel tus hơ Elise, mơ ñìm di đap khai, mơ đơs lah: “Ơ bèp añ jê! Bèp añ jê! Rơndeh mơ ling ơseh Israel dê!”

¹⁵Gen Elise đơs mơ khai lah: “Ai tĕ sơna mơ ală kam,” gen Jôas ai sơna mơ ală kam.

¹⁶Gen khai đơs mơ bơtau Israel lah, “wàr tĕ sơna.” Gen khai wàr. Elise ơn tê khai hơđang tê bơtau.

¹⁷Gen đơs lah: “Pò tĕ mpồng dềt bơh đah mattơngai lik.” Gen Jôas pò mpồng. Elise đơs tai: “Pañ tĕ.” Gen khai pañ. Tŭ hơ̆ Elise pơnjat tai lah: “Hơ̆ la chi kam pha lin rlau Yàng Jehôwa dê, hơ̆ la chi kam pha lin rlau mơ cau Aram; bơh mê rơp brồ lơh cau Aram tòm Aphek, tian gơs tơnroh jơh bol khai.”

¹⁸Elise pơnjat lah: “Ai tĕ kam.” Gen Jôas ai kam. Elise đơs tai lah: “Pòng tĕ tòm ù.” Jôas pòng pe dơ̆, mơ dơh wơl.

¹⁹Gen cau Yàng Tom Trồ gơhào gơjrañ, đơs mơ bơtau lah: “Bơtau pal pòng pram prau dơ̆, gen sồng rơp lơh cau Aram jơl tus di tŭ tơnroh jơh; mơya tŭ do bơtau lơh cau Aram mìng pe dơ̆ lơm.”

²⁰Behơ̆ Elise chơt, mơ cau tơp khai. Tŭ hơ̆ mpồl cau Môap òs mut tòmlơh mơ lơgar di di bồ sơnam.

²¹Di di tŭ hơ̆, gơs dô nă cau cèng tơp ƀồc, gŏ mpồl ling hơ̆ tus, gen sơrbì ƀồc hơ̆ tòm bơtô ƀồc Elise dê. Ƀồc chơt di tơm ntìng ƀồc Elise dê, gen kis wơl mơ ñă ntào.

²²Jơh rài Jôaca, Hajael, bơtau Aram, neh rồn bơklơn cau Israel.

²³Mơya Yàng Jehôwa kòñ nđàc di bol khai, mơ ai nùs nđàc sơngit di bol khai, tài bơh jơnau ho bal Kơnràñ dê neh bơtào mơ Abraham, Isak, mơ Jakôp. Kơnràñ ò tơnroh bol khai, ò tă sang bol khai bơh di đap Kơnràñ jơl tus di ngai do.

²⁴Hajael, bơtau Aram sang rài; Benhadat, kòn klau khai pơrdòn sơbàn khai.

²⁵Jôas, kòn klau Jôaca, ai wơl bơh tê Benhadat, kòn klau Hajael, ală ƀòn mơ Benhadat neh tòmpìt ai bơh Jôaca, bèp khai dê. Jôas tòmlơh mơ Benhadat pe dơ̆, mơ ai wơl ală ƀòn Israel dê.