Read koho II Ală Bơtau 14 Bible Online

II Ală Bơtau 14 - koho bible

II Ală Bơtau 14

¹Nam dơ̆ bàr rài bơtau Jôas kòn klau Jôaca bơtau Israel, gen Amajiah kòn klau Jôas bơtau Juda, nggui hơđang sơbàn.

²Khai neh bàr jơt pram sơnam tòm tŭ lơh gơs bơtau, mơ at bồ bàr jơt sin nam tòm Jerusalem. Mè khai sơnđan la Jehôadan, ƀòn Jerusalem.

³Khai lơh bơta niam di đap Yàng Jehôwa, mơya ò di be Dabit, ồng pàng khai; khai lơh jat ală bơta Jôas, bèp khai neh lơh.

⁴Bulah behơ̆, khai ò sòr tơrlah ală tiah jơnhoa; làng bol kư̆ ơn phan pơdơng mơ chu kơlhô hơđang ală tiah jơnhoa hơ̆.

⁵Tŭ lơgar khai pa geh bơtào kơ̆, gen khai lơh glài tơnchơt ală cau dĭ gơna neh tơnchơt cau bơtau la bèp khai.

⁶Mơya khai ò lơh glài tơnchơt ală kòn sau cau tơnchơt cau hơ̆, tòm toh be jơnau neh cih tòm sră bơta boh lam Môise dê; tòm hơ̆ Yàng Jehôwa neh đơs lah: “Cau rơp ò tơnchơt bèp ala kòn, kung rơp ò tơnchơt kòn ala bèp; kòp nă rơp chơt bơh tồi glài is he dê.”

⁷Amajiah tơnchơt jơt rbô ling Edôm ơm tòm thòng Boh, tòmpìt ai theng Sela, mơ tơmoh sơnđan la Joktheel, sơnđan hơ̆ gam tus ngai do.

⁸Gen Amajiah sồr cau kong sồr lòt tus mơ Jôas, kòn klau Jôaca, sau Jehu, bơtau Israel, mơ đơs lah: “Tus tĕ, nàng bol he tòmlơh bal.”

⁹Jôas, bơtau Israel, sồr cau kong sồr ho wơl mơ Amajiah, bơtau Juda lah: “Chi lò tòm Liban sồr đơs mơ chi blàng kung tòm Liban, mơ lah: Ai tĕ kòn ùr mê bau mơ kòn klau añ. Mơya gơs phan brê Liban dê lòt gan, jă tơnlề chi lò hơ̆ hơđơm jơng.

¹⁰Mê neh lơh cau Edôm mơ nùs mê bềng bơta pơnhừ să. Dòp tĕ bơta gơklŏ, mơ ơm wơl tòm hìu mê dê; ñchi bơh tài mê kòñ sih he in bơta rung rài, lơh mê in mơ Juda in gơkòl bơta roh gơcoh taih?”

¹¹Amajiah ò bài iat Jôas. Behơ̆ gen, Jôas bơtau Israel guh, lồc behơ̆ khai tòmlơh mơ Amajiah, bơtau Juda tòm Bet Semes lơgar Juda.

¹²Mpồl ling Juda gơkòl mpồl ling Israel lơh gơprah; gen mpồl ling Juda ntoat dô, kòp nă rê wơl hơ sàl he.

¹³Tòm Bet Semes, Jôas, bơtau Israel, kup Amajiah, bơtau Juda, kòn klau Jôas, sau Acasia; mơ lòt tus hơ Jerusalem, phà dơrñang ƀòn bơh Mpồng Epraim jơl tus di Mpồng Mum, dô pah jòng poan rhiang tal.

¹⁴Khai pìt ai ală màh, priă mơ ală phan ngui tòm hìu duh khoai Yàng Jehôwa dê, mơ ală phan màng tòm gơlang bơtau; khai kung kup cau lơh gơs phan bơrkòl, gen rê wơl hơ Samari.

¹⁵Ală bơta ndai Jôas dê, ală broă khai lơh, bơta pràn kơldang khai, bơta tòmlơh khai mơ Amajiah, bơtau Juda, gen neh cih tòm sră yal broă kòp nam ală cau bơtau Israel dê.

¹⁶Jôas bic lơhă bal mơ ồng pàng khai dê, mơ geh tơp tòm Samari bal mơ ală cau bơtau Israel; lồc behơ̆ Jerôbôam, kòn klau khai, pơrdòn sơbàn khai.

¹⁷Amajiah kòn klau Jôas bơtau Juda, gam kis jơt pram sơnam, tơnơ̆ mơ Jôas kòn klau Jôaca, bơtau Israel, neh sang rài.

¹⁸Ală bơta ndai Amajiah dê, gen neh cih tòm sră yal broă kòp nam ală cau bơtau Juda.

¹⁹Tòm Jerusalem gơs cau pơrlơ̆ dră mơ khai; gen khai dô tus hơ Lakis. Mơya bol khai sồr ting jat khai tus hơ Lakis, mơ tơnchơt khai tềng hơ̆.

²⁰Chòp, gơs cau pơdiang ƀồc khai hơđang ơseh tus hơ Jerusalem, mơ tơp khai bal mơ ồng pàng khai dê, tòm ƀòn Dabit.

²¹Gen jơh cau Juda bơtào Ajaria; lơh gơs bơtau ala Amajiah bèp khai in; tŭ khai neh jơt prau sơnam.

²²Tơnơ̆ mơ bèp bơtau neh bic lơhă bal mơ ồng pàng khai dê, khai bơt bơtào wơl Elat, mơ ai wơl ƀòn hơ̆ gơrê wơl hơđơm gơnoar Juda.

²³Nam dơ̆ jơt pram rài Amajiah kòn klau Jôas bơtau Juda, gen Jerôbôam kòn klau Jôas, nggui hơđang sơbàn lơh gơs bơtau Israel tòm Samari. Khai at bồ poan jơt poan sơnam.

²⁴Khai lơh bơta iơh di đap Yàng Jehôwa, ò sang lòi tồi glài Jerôbôam dê, kòn klau Nebat neh lơh cau Israel in tìs glài.

²⁵Khai ai wơl nhàr Israel bơh Lebo Hamat jơl tus di dàlềng Arabah, jat be jơnau Jehôwa Yàng Tom Trồ Israel dê neh đơs bơh bơr cau gơnoar hwơr Jôna, dĭ gơna Kơnràñ dê, la kòn klau Amitai, ơm Gat Hepher.

²⁶Mơ tai, Yàng Jehôwa neh gŏ Israel kong bòl glar jê sồt sràt bơtang ngan; bơh tòm Israel ò gam dô nă lơi geh khat gơboh, kung ò gơs cau lơi dong kòl Israel sơl.

²⁷Yàng Jehôwa ò đơs lah Kơnràñ rơp jùt sơnđan Israel bơh hơđơm mattơngai do, gen kơnòm Jerôbôam, kòn klau Jôas, dong tă bol khai.

²⁸Ală bơta ndai Jerôbôam dê, ală broă khai, bơta pràn kơldang khai, mbe lơi khai tòmlơh mơ ai wơl Israel in Damas mơ Hamat lài neh duh broă Juda, ală bơta hơ̆ gen neh cih tòm sră yal broă kòp nam ală cau bơtau Israel dê.

²⁹Jerôbôam bic lơhă mơ ồng pàng khai dê, la ală cau bơtau Israel, gen Sacari kòn klau khai, pơrdòn sơbàn khai.