Read koho II Ală Bơtau 15 Bible Online

II Ală Bơtau 15 - koho bible

II Ală Bơtau 15

¹Tòm nam dơ̆ bàr jơt poh Bơtau Jerôbôam lơgar Israel dê, gen bơtau Ajaria kòn klau Amajiah bơtau Juda dê, sơntòm at bồ.

²Khai neh jơt prau nam tòm tŭ sơntòm at bồ, mơ khai at bồ pram jơt bàr sơnam tòm Jerusalem. Mè khai sơnđan la Jekôlia, ƀòn tòm Jerusalem

³Khai lơh bơta niam di đap Yàng Jehôwa, kư̆ jat ală bơta Amajiah, bèp khai neh lơh.

⁴Bulah behơ̆, ală tiah jơnhoa òhềt tă sang; làng bol gam ơn phan pơdơng mơ ơn ală phan duh khoai hơđang ală tiah jơnhoa hơ̆.

⁵Yàng Jehôwa lơh bơtau, gen tàng bơtau gơlik dun jơl tus di tŭ khai chơt; khai ơm tòm dô nơm hìu is. Jôtham, kòn klau bơtau, at bồ gơlang bơtau mơ at bồ hơđang làng bol tòm lơgar.

⁶Ală bơta ndai Ajaria dê, ală broă khai dê, gen neh cih tòm sră yal broă kòp nam ală cau bơtau Juda dê.

⁷Ajaria bic lơhă bal mơ ală ồng pàng khai dê, mơ geh tơp bal mơ bol khai tòm ƀòn Dabit. Jôtham kòn klau khai, pơrdòn sơbàn khai.

⁸Tòm nam dơ̆ pe jơt phàm rài Ajaria, bơtau Juda, Sacari, kòn klau Jerôbôam, at bồ hơđang Israel tòm Samari prau kơnhai.

⁹Khai lơh bơta iơh di đap Yàng Jehôwa, tòm toh be ală ồng pàng khai neh lơh; khai ò cah ngài bơh tồi glài Jerôbôam, kòn klau Nebat dê, la glài mơ khai neh lơh cau Israel in tìs glài.

¹⁰Salum kòn klau Jabes bơtào tòmdră mơ khai, pòng tơnchơt khai di đap làng bol; mơ at bồ ala khai.

¹¹Ală bơta ndai Sacari dê, gen neh cih tòm sră yal broă kòp nam bơh ală cau bơtau Israel dê.

¹²Behơ̆, tòm toh be jơnau Yàng Jehôwa neh yal Jehu in lah: “Jơi bơtiàn mê rơp nggui hơđang sơbàn Israel jơl tus di rài dơ̆ poan.” Ngan behơ̆, hơ̆ la bơta neh gơlik tus.

¹³Salum kòn klau Jabes, sơntòm at bồ tòm nam dơ̆ pe jơt sin rài Ujia bơtau Juda dê, khai at bồ dô kơnhai tòm Samari.

¹⁴Menahem kòn klau Gadi, ơm tòm Tirjah guh hơ Samari, lơh Salum, kòn klau Jabes, mơ tơnchơt khai; mơ Menahem at bồ ala Salum.

¹⁵Ală broă ndai Salum dê, khai pơrlơ̆ dră mbe lơi, gen neh cih tòm sră yal broă kòp nam ală bơtau Israel dê.

¹⁶Tŭ hơ̆, Menahem cèng ling bơh Tirjah, brồ lơh Tipsah, mơ tơnchơt jơh làng bol ơm tòm hơ̆, mơ jơh kơnhwàl gùt dar, tài bơh ƀòn hơ̆ ò bài pò mpồng khai in; khai tơnroh gơ, mơ reh kơndul jơh ală cau ùr gơs bun tềng hơ̆.

¹⁷Tòm nam dơ̆ pe jơt sin rài Ajaria, bơtau Juda, gen Menahem kòn klau Gadi, sơntòm at bồ hơđang Israel, mơ khai at bồ jơt sơnam tòm Samari.

¹⁸Khai lơh bơta iơh di đap Yàng Jehôwa; jơh rài khai ò cah ngài bơh tồi glài Jerôbôam kòn klau Nebat dê, la glài neh lơh cau Israel in tìs glài.

¹⁹Pul, bơtau Asiri, tus tòmlơh mơ lơgar; Menahem ai Pul in dô rbô talơng priă, nàng dong khai bơtào kơ̆ lơgar tòm gơnoar bơtau khai dê.

²⁰Menahem tă ai priă hơ̆ bơh di làng bol Israel, hơ̆ la di ală cau gơs oă sre brê, kư̆ kòp nă pram jơt sieklơ priă, nàng jào bơtau Asiri in. Behơ̆ bơtau Asiri rê, mơ ò ơm jŏ tòm lơgar.

²¹Ală bơta ndai Menahem dê, mơ ală broă khai dê, gen neh cih tòm sră yal broă kòp nam ală cau bơtau Israel dê.

²²Menahem bic lơhă bal mơ ală ồng pàng khai, mơ Pekahia kòn klau khai pơrdòn sơbàn khai.

²³Tòm nam dơ̆ pram jơt rài Ajaria, bơtau Juda, gen Pekahia kòn klau Menahem, sơntòm at bồ hơđang Israel tòm Samari, mơ at bồ bàr sơnam.

²⁴Khai lơh bơta iơh di đap Yàng Jehôwa, khai ò pơrlac sang tồi glài Jerôbôam kòn klau Nebat dê, la glài neh lơh cau Israel in tìs glài.

²⁵Peka kòn klau Remalia, kwang at bồ mpồl ling khai dê, bal mơ pram jơt nă cau Galaat jat khai pơrlơ̆ dră di khai brồ lơh tơnchơt khai tòm gơlang bơtau gơs dơrñang kơ̆ cê, mơ tơnchơt tơn Argôp mơ Arie tòm Samari. Behơ̆ khai tơnchơt Pekahia mơ at bồ ala.

²⁶Ală bơta ndai Phekahia dê, mơ ală broă khai dê, gen neh cih tòm sră yal broă kòp nam ală cau bơtau Israel dê.

²⁷Tòm nam dơ̆ pram jơt bàr rài Ajaria, bơtau Juda; gen Peka kòn klau Remalia, nggui hơđang sơbàn lơh gơs bơtau Israel, tòm Samari, mơ at bồ bàr jơt sơnam.

²⁸Khai lơh bơta iơh di đap Yàng Jehôwa, khai ò cah ngài bơh tồi glài Jerôbôam kòn klau Nebat, la glài neh lơh cau Israel in tìs glài.

²⁹Tòm rài Peka bơtau Israel, Tilglat Pileser bơtau Asiri, tus gơrwàng tòmpìt ai Iyôn, Abel Betmakah, Janôah, Kedes, Hajor, tiah Galaat, Galile, mơ jơh kơnhwàl Neptali; gen khai cèng làng bol ală lơgar hơ̆ rê hơ Asiri.

³⁰Ôse, kòn klau Ela, bơtào bơta pơrlơ̆ dră mơ Peka kòn klau Remalia, brồ lơh mơ tơnchơt khai, mơ khai at bồ ala, tòm nam dơ̆ bàr jơt rài Jôtham, kòn klau Ujia.

³¹Ală bơta ndai Peka dê, mơ ală broă lơh khai dê, neh geh cih tòm sră yal broă kòp nam ală cau bơtau Israel dê.

³²Tòm nam dơ̆ bàr rài Peka kòn klau Remalia, bơtau Israel, gen Jôtham kòn klau Ujia, bơtau Juda, sơntòm at bồ.

³³Khai neh bàr jơt pram sơnam tòm tŭ khai sơntòm at bồ, mơ khai at bồ jơt prau sơnam tòm Jerusalem. Mè khai sơnđan la Jerusa kòn ùr Jadôk.

³⁴Khai lơh bơta niam di đap Yàng Jehôwa, kư̆ jat wil tơl ală bơta Ujia, bèp khai neh lơh.

³⁵Bulah behơ̆, ală tiah jơnhoa òhềt phà tơrlah; làng bol gam ơn phan pơdơng mơ ơn phan duh khoai hơđang ală tiah jơnhoa hơ̆. Hơ̆ la Jôtham bơt bơtào ală mpồng hơđang hìu duh khoai Yàng Jehôwa dê.

³⁶Ală bơta ndai Jôtham dê, mơ ală broă khai dê, gen neh cih tòm sră yal broă kòp nam ală bơtau Juda dê.

³⁷Tòm tŭ hơ̆, Yàng Jehôwa rơp sơntòm chồl Rejin bơtau Aram, mơ Peka kòn klau Remalia, tus brồ lơh Juda.

³⁸Jôtham bic lơhă bal mơ ồng pàng khai dê, geh tơp bal mơ bol khai, tòm ƀòn dờng Dabit, ồng pàng khai dê. Ahas kòn klau khai, pơrdòn sơbàn khai.