Read koho II Ală Bơtau 16 Bible Online

II Ală Bơtau 16 - koho bible

II Ală Bơtau 16

¹Tòm nam dơ̆ jơt poh rài Peka kòn klau Remalia, gen Ahas kòn klau Jôtham bơtau Juda, sơntòm at bồ.

²Ahas neh bàr jơt sơnam tòm tŭ khai sơntòm at bồ; khai at bồ jơt prau sơnam tòm Jerusalem. Khai ò lơh bơta niam di đap Jehôwa Yàng Tom Trồ khai dê be Dabit, ồng pàng khai neh lơh;

³mơya khai lòt jat gùng ală cau bơtau Israel, tian gơs khai ơn kòn klau khai dê tòm ồs đòm krơh cù kìr ală làng bol mơ Yàng Jehôwa neh bơtrơh bơh di đap làng bol Israel.

⁴Khai kung ơn phan pơdơng mơ chu kơlhô hơđang ală tiah jơnhoa, hơđang dòr mơ hơđơm ală chi tơlir.

⁵Gen Rejin bơtau Aram, mơ Peka kòn klau Remalia, bơtau Israel, guh tus nàng brồ lơh Jerusalem; bol khai gơrwàng Ahas, mơya ò rgơi geh pha mơ khai.

⁶Di tŭ hơ̆ bơtau Edôm dê, ai wơl Elat gơrê mơ Edôm; mơ khai bơtrơh cau Juda lik bơh Elat, mơ cau Edôm tus ơm tòm Elat, bol khai ơm tềng hơ̆ jơl tus ngai do.

⁷Ahas sồr cau lòt tus hơ Tilglat Pileser bơtau Asiri, mơ đơs mơ khai lah: “Añ la cau dĭ gơna bơtau, la kòn klau bơtau dê; lòt tus tĕ dong tă añ klàs bơh tê bơtau Aram mơ bơtau Israel neh brồ lơh añ.”

⁸Ahas kung ai màh mơ priă tòm hìu duh khoai Yàng Jehôwa mơ tòm đam jàr gơlang bơtau, pơyoa lơh gơs phan ơn bơtau Asiri in.

⁹Bơtau Asiri iat jơnau Ahas dê, lòt tus brồ lơh Damas mơ tòmpìt ai gơ, kup làng bol cèng tus hơ Kir, mơ khai tơnchơt Rejin.

¹⁰Gen Ahas lòt tus hơ Damas nàng rò Tilglat Pileser, bơtau Asiri. Ahas gŏ dô nơm cơnòng duh khai tòm Damas, gen Ahas pơyoa cau gơnoar ơn phan duh khoai Uria in rùp cih wơl cơnòng duh khoai hơ̆ jat be bơta cau neh lơh gơ, tòm toh be ală pơnah neh gơs gơ dê.

¹¹Cau gơnoar ơn phan duh khoai Uria lơh gơs dô nơm cơnòng duh khoai tòm toh be rùp mơ bơtau Ahas neh pơyoa bơh Damas; Behơ̆ cau gơnoar ơn phan duh khoai Uria lơh sir cơnòng duh khoai hơ̆ lài mơ tŭ bơtau rê wơl bơh Damas.

¹²Tòm tŭ bơtau bơh Damas rê wơl, khai sền gŏ cơnòng duh khoai gen tus rềp mơ ơn phan ơn hơđang gơ.

¹³Khai chu hơđang cơnòng phan ơn chu mơ phan ơn kòi mbo khai dê, tuh phan ơn ñô mơ mhàm bơh phan ơn bơta ring lơngai hơđang hơ̆ tòmdră mơ cơnòng duh khoai.

¹⁴Ai cơnòng duh khoai mơ kòng neh ơm di đap Yàng Jehôwa, gen khai tă cèng bơh di đap hìu duh khoai, digùl cơnòng duh khoai pa mơ hìu duh khoai Yàng Jehôwa dê, mơ ơn gơ đah đang cơnòng duh khoai khai dê.

¹⁵Gen, bơtau Ahas ai gơnoar sồr cau gơnoar ơn phan duh khoai Uria in lah: “Hơđang cơnòng duh khoai dờng ơn tĕ phan ơn chu àng drim mơ phan ơn kòi mbo trồ mho; mơ phan ơn chu mơ phan ơn kòi mbo bơtau dê; bal mơ phan ơn chu mơ phan ơn kòi mbo jơh làng bol tòm lơgar dê, kung tuh hơđang gơ phan ơn ñô bol khai dê, mơ tuh tòmdră mơ gơ jơh ală mhàm phan ơn chu, bal mơ jơh mhàm ală phan ơn duh khoai dê. Mơya cơnòng duh khoai mơ kòng, lòi añ in rơp hòi lùp nùs Yàng dê.”

¹⁶Cau gơnoar ơn phan duh khoai Uria lơh jat ală bơta bơtau Ahas neh nting sồr.

¹⁷Gen bơtau Ahas tă ală phan gòl ală kơrnòl dê, mơ tơmù ală thao dà bơh hơ̆; mơ tơmù tơnau dà mơ kòng bơh hơđang rùp kơnrồ kòng đo gơ, lồc behơ̆ cèng gơ ơn hơđang dô nơm mơnàng mơ lŭ.

¹⁸Khai kung tă sang bơh hìu duh khoai Yàng Jehôwa chi cang hơđang mpồng ngui tòm ngai Saƀat mơ cau neh bơt, mơ tă sang mpồng bơdìh nàng ơn is bơtau in. Khai lơh behơ̆ tài bơh bơtau Asiri dê.

¹⁹Ală bơta ndai Ahas dê, mơ ală broă khai lơh, gen neh cih tòm sră yal broă kòp nam ală bơtau Juda dê

²⁰Gen, Ahas bic lơhă bal mơ ồng pàng khai dê, geh tơp rềp mơ bol khai, tòm ƀòn Dabit. Ejekia kòn klau khai, pơrdòn sơbàn khai dê.