Read koho II Ală Bơtau 17 Bible Online

II Ală Bơtau 17 - koho bible

II Ală Bơtau 17

¹Tòm nam dơ̆ jơt bàr rài Ahas bơtau Juda, gen Ôse kòn klau Ela, sơntòm at bồ hơđang Israel, tòm Samari; khai at bồ sin nam.

²Khai lơh bơta iơh di đap Yàng Jehôwa, mơya ò ndròm be ală bơtau Israel lài mơ khai.

³Salmanaser, bơtau Asiri, lòt tus tòmdră mơ Ôse; khai kong duh Salmanaser, mơ boh dia khai in.

⁴Mơya bơtau Asiri gŏ Ôse jòi kai pơrlơ̆ dră; bơh Ôse neh sồr cau lòt tus hơ Sô, bơtau Ejiptơ, mơ ò boh dia bơtau Asiri in be khai neh lơh kòp nam; gen bơtau Asiri kup khai cap mơ cèng jàm.

⁵Gen bơtau Asiri lòt tus tòmpìt ai jơh lơgar, tòm pe nam khai gơrwàng Samari.

⁶Tòm nam dơ̆ sin rài Ôse, bơtau Asiri tòmpìt ai jơh Samari, cèng làng bol Israel tus hơ Asiri, ơn bol khai ơm tòm Hala hơđang Habor, di gah hiòng Gôjan dê, tòm ală ƀòn dờng lơgar Medi dê.

⁷Broă do gơlik gơs bơh làng bol Israel neh tìs glài tòmdră mơ Jehôwa Yàng Tom Trồ bol khai dê, la Bơtau neh tă bol khai lik bơh lơgar Ejiptơ, bơh tê Pharaôn bơtau Ejiptơ dê. Bol khai neh duh khoai ală yàng ndai,

⁸lòt jat bơta òs mòng ală làng bol mơ Yàng Jehôwa neh bơtrơh tơlik bơh di đap làng bol Israel, mơ jat bơta òs mòng mơ ală cau bơtau Israel neh lam.

⁹Cau Israel lơh òm ală bơta ò di pal tòmdră wơl mơ Jehôwa Yàng Tom Trồ bol khai dê, bơt bơtào bol khai in ală tiah jơnhoa tòm làm jơh ală ƀòn bol khai, bơh bồ theng kơp gàr jơl tus di ƀòn dờng kơ̆ cê,

¹⁰bơt bơtào bol khai in ală jrong duh khoai hơđang ală dòr jơnhoa mơ hơđơm ală chi dờng;

¹¹tềng hơ̆ bol khai ơn phan pơdơng hơđang jơh ală tiah jơnhoa, be ală làng bol mơ Yàng Jehôwa neh bơtrơh bơh di đap bol khai, bol khai lơh ală bơta iơh bơsak, bơrcek Yàng Jehôwa gơjrañ.

¹²Bol khai duh broă ală rùp ràk la bơta Yàng Jehôwa neh đơs mơ bol khai lah: “Bol mê bañ lơh bơta hơ̆.”

¹³Bulah Yàng Jehôwa yal tơnggit Israel mơ Juda in, bơh di ală cau gơnoar hwơr mơ ală cau git lài, lah: “Pơrlac tĕ bơh di ală gùng iơh bơsak bol mê dê, kơrmap gàr tĕ bơta sồr lam mơ bơta boh lam Añ jê, jat be jơh ală bơta boh lam Añ neh nting sồr ală ồng pàng bol mê dê, mơ Añ neh sồr bol mê bơh ală dĭ gơna Añ jê la ală cau gơnoar hwơr.”

¹⁴Mơya bol khai ò bài iat, bol khai kư̆ kơldang bồ, be ală ồng pàng bol khai dê ò dòn di Jehôwa Yàng Tom Trồ bol khai dê.

¹⁵Bol khai sền òsơp ală bơta boh lam mơ bơta ho bal Kơnràñ neh bơtào mơ ồng pàng bol khai dê, mơ ală jơnau yal tơnggit mơ Kơnràñ neh ai bol khai in. Bol khai lòt jat ală rùp ràk ma blac, mơ bol khai gơlik gơs ma blac, bol khai đòm krơh ală làng bol ơm gùt dar, bơh ală làng bol hơ̆ mơ Yàng Jehôwa neh ai gơnoar sồr bol khai lah bañ đòm jat krơh bol khai dê.

¹⁶Bol khai pơndang sang jơh ală bơta boh lam Jehôwa Yàng Tom Trồ bol khai dê mơ lơh bol khai in rùp pac sềr bàr nơm kòn kơnrồ, bol khai bơtào ală jrong duh khoai Asera, duh khoai jơh ală sơmañ đang trồ, mơ duh broă Baal.

¹⁷Bol Khai cèng ală kòn ùr kòn klau chu tòm ồs nàng duh khoai rùp ràk, bol khai òs juh proh, hòi hwềng, sền dà, bol khai tac să bol khai tòm bơta lơh iơh di đap Yàng Jehôwa, nàng bơrcek Kơnràñ gơjrañ.

¹⁸Gen tàng, Yàng Jehôwa gơhào gơjrañ ngan di làng bol Israel, mơ bơtrơh tơlik bol khai bơh di đap mat Kơnràñ; mìng gam wơl jơi bơtiàn Juda lơm.

¹⁹Cau Juda kung ò lơh jat ală bơta sồr lam Jehôwa Yàng Tom Trồ bol khai dê; mơya lòt jat ală bơta òs mòng mơ Israel neh sơnio lam.

²⁰Yàng Jehôwa neh sang lòi jơh jơi bơtiàn Israel, lơh glài bol khai mơ phi bol khai tòm tê ală cau phà tơnroh, jơl tus Kơnràñ bơtrơh tơlik bol khai bơh di đap mat Kơnràñ.

²¹Tòm tŭ Yàng crè Israel bơh hìu Dabit gen bol khai bơtào Jerôbôam kòn klau Nebat, lơh gơs bơtau; Jerôbôam lam Israel ò lòt jat Yàng Jehôwa, mơ chồl bol khai gơtơmut tòm glài dờng.

²²Làng bol Israel kư̆ tìs jơh ală tồi glài Jerôbôam neh tìs, bol khai ò cah ngài bơh ală glài hơ̆,

²³jơl tus di tŭ Yàng Jehôwa neh bơtrơh tơlik bol khai bơh di đap Kơnràñ, tòm toh be Kơnràñ neh yal lài bơh ală cau gơnoar hwơr dĭ gơna Kơnràñ dê. Behơ̆, Israel kong cèng pơrdô ngài bơh lơgar, ơm dĭ tòm lơgar Asiri jơl tus di ngai do.

²⁴Bơtau Asiri cèng làng bol bơh Babilôn, Kutha, Abba, Hamat mơ Sepharbaim, mơ ơn ală làng bol hơ̆ tòm ală ƀòn dờng Samari ala cau Israel. Bol khai tòmpìt ai lơgar Samari, mơ ơm tòm ală ƀòn dờng hơ̆.

²⁵Tòm tŭ bol khai rơp sơntòm ơm tềng hơ̆, bol khai ò duh rngòt di Yàng Jehôwa, gen tàng Yàng Jehôwa sồr klìu triă tus tơnchơt dô êt cau tòm mpồl bol khai.

²⁶Gen cau yal mơ bơtau Asiri lah: “Ală làng bol mơ bơtau neh cèng tus ơn tòm ală ƀòn Samari ò git bơta boh lam mơ yàng lơgar dê, tài behơ̆ tàng yàng hơ̆ neh sồr klìu triă tus tơnchơt bol khai, tài bơh bol khai ò git bơta boh lam yàng lơgar dê.”

²⁷Gen bơtau Asiri ai gơnoar sồr lah: “Cèng tĕ tềng hơ̆ dô nă cau gơnoar ơn phan duh khoai mơ bol mê neh kup bơh tềng hơ̆, nàng bơto bol khai in bơta boh lam yàng lơgar dê.”

²⁸Behơ̆ dô nă tòm ală cau gơnoar ơn phan duh khoai mơ bol khai neh kup bơh Samari tus, ơm tòm Betel, khai bơto bol khai pal duh khoai Yàng Jehôwa.

²⁹Mơya kòp làng bol gam bơtào ală yàng is bol khai in, ơn gơtòm ală bơmồng hơđang ală tiah jơnhoa mơ cau Samari neh bơtào, kòp làng bol ơn yàng bol khai dê tòm ală ƀòn dờng hơ̆.

³⁰Cau Babilôn bơtào rùp ràk Sukôt Benôt; cau Kus, bơtào rùp ràk Nergal; cau Hamat bơtào Asima;

³¹Cau Abit bơtào rùp ràk Niphas mơ Tartak; cau Sepharbaim chu kòn sau he tòm ồs ơn Adrammelek mơ Anammelek in, bàr nă yàng cau Sepharbaim dê.

³²Bol khai kung duh khoai Yàng Jehôwa, mơya sac cau tòm mpồl bol khai dê bơtào gơs cau gơnoar ơn phan duh khoai tòm ală tiah jơnhoa; la ală cau ơn phan duh khoai in tòm ală bơmồng tòm ală tiah jơnhoa.

³³Behơ̆ bol khai duh khoai Yàng Jehôwa, mơya kung duh khoai ală yàng bol khai dê, jat bơta òs mòng ală làng bol neh bơtrơh tơlik.

³⁴Tus di ngai do, bol khai gam lơh jat bơta òs mòng yau bol khai dê. Bol khai ò duh rngòt di Yàng Jehôwa, ò lơh jat jơnau sồr, bơta lơh nền, bơta sồr lam, hala bơta boh lam lòi wơl kòn sau Jakôp in, mơ Kơnràñ neh tơmoh sơnđan la Israel.

³⁵Yàng Jehôwa neh bơt bơtào bơta ho bal mơ bol khai, bơto bol khai lah: “Bol mê bañ duh khoai ală yàng ndai tai, hala cùn khoai bol gơ mơ duh broă bol gơ, hala ơn phan pơdơng bol gơ in sơl.

³⁶Mơya bol mê pal duh khoai Yàng Jehôwa, la Bơtau neh cèng bol mê lik bơh lơgar Ejiptơ bơh gơnap gơnoar dờng mơ tơwòr tê pò tơlik, bol mê pal kun khoai să tòm Kơnràñ mơ duh khoai, mơ ơn phan pơdơng Kơnràñ in.

³⁷Ală bơta boh lam, bơta sồr lam, bơta lơh nền mơ gơnoar sồr mơ Kơnràñ neh cih bol mê in, ală bol mê pal prap gàr lơh jat sùm sùm, bañ duh khoai ală yàng ndai tai

³⁸Bol mê bañ hŭi bơta ho bal mơ Añ neh bơtào mơ bol mê; bañ duh khoai ală yàng ndai tai;

³⁹mơya bol mê pal duh khoai Jehôwa Yàng Tom Trồ bol mê dê, Kơnràñ rơp dong tă bol mê klàs bơh tê ală cau sò tơm.”

⁴⁰Bulah behơ̆ bol khai ò bài iat, mơya kư̆ gam lơh jat bơta òs yau bol khai dê.

⁴¹Behơ̆, ală làng bol hơ̆ duh khoai Yàng Jehôwa mơ kung duh broă ală rùp ràk pac sềr bol khai dê; tus di ngai do kòn sau bol khai dê, mơ kòn sau kòn sau bol khai dê kư̆ gam lơh be ồng pàng bol khai dê neh lơh.