Read koho II Ală Bơtau 18 Bible Online

II Ală Bơtau 18 - koho bible

II Ală Bơtau 18

¹Tòm nam dơ̆ pe rài Ôse kòn klau Ela, bơtau Israel, gen Ejekia, kòn klau Ahas, bơtau Juda, sơntòm at bồ.

²Khai neh bàr jơt pram sơnam tòm tŭ khai sơntòm at bồ, mơ at bồ bàr jơt sin sơnam tòm Jerusalem. Mè khai sơnđan la Abi, kòn klau Sacari.

³Khai lơh bơta niam di đap Yàng Jehôwa tòm toh be Dabit, ồng pàng khai dê neh lơh.

⁴Khai sòr tơrlah jơh ală tiah jơnhoa, pòng bơcah ală jrong duh khoai, pòng tơrlah ală rùp Asera, mơ pòng lề lac bơs kòng mơ Môise neh lơh; bơh jơl tus di tŭ hơ̆ cau Israel ơn phan duh khoai gơ in. Cau sơnđan rùp bơs hơ̆ la Nehustan.

⁵Ejekia bơtau Juda dòn kơnòm di Jehôwa Yàng Tom Trồ Israel dê; gen tàng ò gơs dô nă lơi tòm toh be khai tòm ală cau bơtau Juda tơnơ̆ khai, hala tòm ală cau bơtau lài mơ khai.

⁶Khai đềt mềr mơ Yàng Jehôwa; ò sang lòi Kơnràñ, mơya prap gàr ală bơta sồr lam mơ Yàng Jehôwa neh nting sồr Môise in.

⁷Yàng Jehôwa ơm bal mơ khai; bulah khai lòt tiah lơi, gen geh bơtoah bơtoài. Khai pơrlơ̆ dră mơ bơtau Asiri, mơ ò bài duh broă bơtau hơ̆ tai.

⁸Khai brồ lơh lơgar cau Philistin jơl tus Gaja mơ ù tiah gơ dê, bơh theng kơp gàr tus di ală ƀòn dờng kơ̆ cê.

⁹Tòm nam dơ̆ poan rài Ejekia, di sơnam dơ̆ poh rài Ôse kòn klau Ela bơtau Israel, gen Salmanaser bơtau Asiri, lòt tus tòmlơh mơ gơrwàng Samari.

¹⁰Tus di lồi pe sơnam, khai tòmpìt geh, behơ̆ di sơnam dơ̆ prau rài Ejekia, sơnam dơ̆ sin rài Ôse bơtau Israel, gen Samari gơkòl tòmpìt.

¹¹Bơtau Asiri cèng cau Israel tus hơ Asiri, ơn bol khai ơm tòm Halah hơđang Habo, hiòng Gôjan, mơ tòm ală ƀòn dờng Medi dê;

¹²tài bơh bol khai ò dòn bơr Jehôwa Yàng Tom Trồ bol khai dê, sang lòi bơta ho pơgon Kơnràñ dê, bol khai ò bài iat mơ ò lơh jat ală bơta mơ Môise, dĭ gơna Yàng Jehôwa neh nting sồr.

¹³Tòm nam dơ̆ jơt poan rài Ejekia, Sennacerip bơtau Asiri, guh tòmlơh mơ jơh ală ƀòn dờng kơ̆ cê cau Juda dê mơ tòmpìt ai gơ.

¹⁴Ejekia bơtau Juda, sồr cau tus hơ Laki đơs mơ bơtau Asiri lah: “Añ neh lơh tìs; dan bơtau lik bơh lơgar añ; dilah bơtau kòñ añ lơh bơta lơi, añ rơp kong.” Bơtau Asiri sồr Ejekia bơtau Juda, pal ơn pe rhiang talơng priă, mơ pe jơt talơng màh.

¹⁵Ejekia ơn khai in ală priă bơh hìu duh khoai Yàng Jehôwa mơ tòm đam jàr gơlang bơtau dê.

¹⁶Tŭ hơ̆, bơtau Ejekia tă màh bơh ală mpồng mơ jrong hìu duh khoai Yàng Jehôwa mơ să tòm khai neh ƀềp gơ, mơ jào jơh bơtau Asiri in.

¹⁷Bơtau Asiri sồr Tartan, Rapsaris, mơ Rapsake, la ală kwang dờng at bồ mpồl ling khai dê, lam bal dô mpồl ling oă bơh Lakis tus hơ bơtau Ejekia tòm Jerusalem. Bol khai tus hơ Jerusalem mơ ơm ntào di tơmbòr dà đah đang tơnau, ơm di gah ƀlàng sre cau òs pìh phan.

¹⁸Tòm tŭ bol khai hòi mơ bơtau. Gen Eliakim, kòn klau Hilkia, kwang at bồ hìu gơlang, Sepna, cau gơnoar cih, mơ Jôa kòn Asap dê, kwang cih bơta bơyai broă lik lòt tus mơ bol khai.

¹⁹Rapsake đơs mơ bol khai lah: “Bol mê đơs tĕ mơ Ejekia lah: Bơtau Asiri la bơtau dờng, đơs be do: Mê dòn kơnòm di ñcau taih?

²⁰Mê kơlôi lah mìng ală jơnau đơs gòi rgơi ala bơta pràn nàng tòmlơh sơl ơ? Mê ơn nùs dòn kơnòm di ñcau mơ pơrlơ̆ dră di añ taih?

²¹Sền tĕ, tŭ do mê dòn kơnòm di Ejiptơ, dô nơm tòm proh neh pă; bơh cau lơi sơnđìng di gơ, gen rơp yar bluh tê. Dilah cau lơi kơnòm di Pharaôn bơtau Ejiptơ, gen rơp kong behơ̆.

²²Mơya dilah bol mê rơp đơs mơ añ lah, bol hi kơnòm di Jehôwa Yàng Tom Trồ bol hi dê. Hơ̆ ò di bơh Kơnràñ mơ ală tiah jơnhoa mơ cơnòng duh khoai Kơnràñ dê mơ Ejekia neh sòr tơrlah, đơs mơ Juda mơ Jerusalem lah: Bol mê pal duh khoai di đap cơnòng duh khoai do tòm Jerusalem ò ơ?

²³Tŭ do tus tĕ, tòmpơrlòng tĕ mơ cau tòm añ jê la bơtau Asiri. Añ rơp jào mê in bàr rbô nơm ơseh, pơnah đah mơ mê, dilah mê jòi geh tơl cau ling hào ơseh nàng hào bol gơ.

²⁴Gen mbe mê rgơi ting bơtrơh dô nă kwang ling dềt rlau jơh digùl ală cau dĭ gơna cau tòm añ jê taih? Tòm tŭ mê sơnđìng di Ejiptơ nàng jòi rơndeh mơ ling hào ơseh sơl ơ?

²⁵Rlau mơ hơ̆, ò di jat gơnoar sồr Yàng Jehôwa dê mơ añ neh tus nàng tòmdră mơ phà tơnroh tiah do ò ơ? Yàng Jehôwa neh đơs mơ añ lah: Guh tĕ nàng tòmlơh mơ lơgar do, mơ phà tơnroh gơ.”

²⁶Gen Eliakim kòn klau Hilkia, Sepna, mơ Jôa, đơs mơ Rapsake lah: “Đơs tĕ mơ ală dĭ gơna ồng tòm jơnau đơs Aram dê; bơh bol hi wă jơnau đơs hơ̆. Bañ đơs mơ bol hi tòm jơnau đơs Juda rngòt làng bol ơm hơđang dơrñang ƀòn kơno.”

²⁷Rapsake ho wơl mơ bol khai lah: “Ngan ò di cau tòm añ mìng sồr đơs ală jơnau do mơ cau tòm mê mơ mê lơm ò? Khai ngan ò di sồr añ tus đơs mơ ală cau ơm hơđang dơrñang ƀòn nàng bol khai bal mơ mê sa è mơ hùc dà đồm bol khai dê, ơ?”

²⁸Gen, Rapsake ntào tềng hơ̆, ai jơnau đơs cau Juda dê driau dờng lah: “Iat tĕ jơnau bơtau Asiri, la bơtau dờng đơs.

²⁹Bơtau đơs be do: ‘Bañ lòi Ejekia pơrlồm bol mê, bơh khai ò rgơi dong tă bol mê klàs bơh tê añ.

³⁰Kung bañ lòi khai lơh bol mê dòn kơnòm di Yàng Jehôwa, mơ đơs lah: “Yàng Jehôwa rơp dong tă bol he, mơ ƀòn do rơp ò gơtơmut tòm tê bơtau Asiri.”

³¹Bañ iat Ejekia, bơh bơtau Asiri đơs be do: “Lơh gơtòmsòr tĕ bal mơ añ mơ kong lik tĕ hơ añ; kòp nă tòm bol mê rơp sa plai suơn ño mơ chi ƀal he dê, kung hùc dà tơrlung he dê sơl,

³²jơl tus di tŭ añ tus lam bol mê mut tòm dô nơm lơgar kung be lơgar bol mê dê, hơ̆ la lơgar gơs kòi mơ tơrnòm, ƀañ mơ suơn ño, dô lơgar gơs mơñà ôlibe mơ dà lơwe. Behơ̆ bol mê rơp kis, mơ ò chơt. Behơ̆, bañ iat Ejekia, bơh khai pơrlồm bol mê tòm tŭ đơs lah: Yàng Jehôwa rơp dong tă bol he.

³³Gơs ală yàng ală làng bol lơi neh dong lơgar gơ klàs bơh tê bơtau Asiri sơl?

³⁴Ntềng đah ală yàng Hamat dê, mơ yàng Arpat dê? Ntềng đah ală yàng Sepharbaim, yàng Hena dê, mơ yàng Iba dê? Ală yàng hơ̆ neh dong tă Samari klàs bơh tê añ sơl?

³⁵Yàng lơi digùl ală yàng ală lơgar dê, neh dong tă lơgar bol khai bơh tê añ sơl? Mơ Yàng Jehôwa rgơi dong tă Jerusalem bơh tê añ sơl ơ?”’”

³⁶Mơya làng bol ơm mŏ mŏ, ò ho wơl dô jơnau lơi; bơh bơtau neh ai gơnoar sồr lah: “Bol mê bañ ho wơl.”

³⁷Gen Eliakim, kòn klau Hilkia, kwang at bồ hìu gơlang, cau gơnoar cih Sepna, mơ kwang cih bơta bơyai broă, Jôa kòn klau Asap, rê wơl hơ Ejekia, ồi ào neh crè, yal wơl khai in ală jơnau Rapsake dê.