Read koho II Ală Bơtau 19 Bible Online

II Ală Bơtau 19 - koho bible

II Ală Bơtau 19

¹Tòm tŭ bơtau Ejekia kơno ală jơnau hơ̆, gen bơtau crè ồi ào mơ soh ào bài sơnò kiat, mut tòm hìu duh khoai Yàng Jehôwa dê.

²Mơ khai sồr Eliakim, kwang at bồ hìu gơlang, Sepna cau gơnoar cih, mơ ală cau gơnoar ơn phan duh khoai kra rlau jơh, soh ào bài sơnò kiat, tus hơ Esai cau gơnoar hwơr kòn klau Amôs.

³Bol khai đơs mơ Esai lah: “Ejekia đơs be do: ‘Ngai do la dô ngai bòl glar, dơñŏ tơnhial, òsơp òso; kòn oh nga neh tus di ngai deh, mơya ò tơl pràn nàng deh kòn.

⁴Digơlan Jehôwa Yàng Tom Trồ ồng neh kơno ală jơnau Rapsake, mơ bơtau Asiri, cau tòm khai, neh sồr khai tus srat rma Yàng Tom Trồ kis gam sùm sùm, mơ Jehôwa Yàng Tom Trồ ồng rơp lơh glài ală jơnau Kơnràñ neh kơno. Behơ̆, dan hòi dan tĕ ala ală cau gam kis in.’”

⁵Tòm tŭ ală dĭ gơna bơtau Ejekia lòt tus hơ Esai.

⁶Esai đơs mơ bol hơ̆ lah: “Bol mê đơs tĕ mơ cau tòm bol mê be do: Yàng Jehôwa đơs be do: Bañ rngòt ală jơnau bol mê neh kơno ală dĭ gơna bơtau Asiri ngui đơs tràl sơrbil di Añ.

⁷Añ rơp ơn dô nơm hwềng tòm khai, lơh khai in kơno jơnau pơnro, mơ khai rơp rê wơl hơ lơgar tòm khai dê; tềng hơ̆ khai rơp gơpừ chơt bơh đào.”

⁸Tŭ Rapsake rê wơl hơ bơtau Asiri, gŏ bơtau ơm gơrwàng Lipna, bơh khai kơno bơtau neh lik lòt bơh Laki.

⁹Tŭ bơtau kơno jơnau bơh Tirhakah bơtau Ethiôpi lah: “Ne, khai neh tus nàng tòmlơh mơ bơtau.” Gen, Sennacerip sồr cau lòt tus hơ Ejekia mơ nting sồr lah:

¹⁰“Ală bol mê pal đơs be do mơ Ejekia, bơtau Juda lah: ‘Bañ lòi Yàng Tom Trồ, la bơtau mê gơn kơnòm, pơrlồm mê, mơ đơs lah: Jerusalem rơp ò gơtơmut tòm tê cau Asiri.’

¹¹Ne, khai neh kơno ală broă bơtau Asiri neh lơh ală lơgar mơ tơnroh jơh, ai mê, rơp geh klàs ơ?

¹²Ală yàng ală lơgar mơ ồng pàng añ neh tơnroh hơ̆ la ală yàng Gôjan, Haran, Rejep mơ làng bol Eden ơm tòm Telasar, rgơi dong tă bol khai sơl?

¹³Ntềng đah bơtau Hamat, bơtau Arpat, bơtau ƀòn dờng Sepharbaim, bơtau Hena, hala bơtau Iba?”

¹⁴Ejekia dòp geh sră pơyoa bơh di tê cau kong sồr, gen sền. Gen, khai guh hơ hìu duh khoai Yàng Jehôwa, mơ pò sră pơyoa di đap Yàng Jehôwa.

¹⁵Ejekia hòi dan Yàng Jehôwa lah: “Ơ Jehôwa Yàng Tom Trồ Israel dê! Kơnràñ gam ơm digùl ală ceruƀim, mìng dô nă Kơnràñ la Yàng Tom Trồ ală lơgar tòm dunnia dê. Să tòm Kơnràñ neh lơh gơs trồ mơ tiah.

¹⁶Ơ Yàng Jehôwa! Dan ai tồr Kơnràñ mơ iat. Ơ Yàng Jehôwa! Pò tĕ mat Kơnràñ mơ sền. Dan Yàng iat tĕ ală jơnau Sennacerip sồr đơs nàng dơñŏ tơnhial di Yàng Tom Trồ kis gam sùm sùm.

¹⁷Ngan, ơ Yàng Jehôwa, ală bơtau Asiri neh tơnroh ală làng bol mơ ù tiah bol khai dê,

¹⁸sơrbì ală yàng bol khai dê tòm ồs; mơya ò di la yàng, hơ̆ la ală broă tê cau neh lơh gơlik bơh chi mơ bơh lŭ; gen tàng bol khai tơnroh ală yàng hơ̆.

¹⁹Behơ̆ tŭ do, ơ Jehôwa Yàng Tom Trồ bol hi dê! Dan dong tă bol hi klàs bơh tê Sennacerip, tồ jơh ală lơgar hơđang plai ù git lah mìng dô nă Jehôwa la Yàng Tom Trồ lơm.”

²⁰Esai kòn klau Amôs, sồr yal mơ Ejekia lah: “Jehôwa Yàng Tom Trồ Israel dê đơs be do: Añ neh kơno jơnau mê hòi dan mơ añ bơh bơta Sennacerip, bơtau Asiri.

²¹Do la jơnau Yàng Jehôwa neh đơs bơh khai: ‘Cau ơruh dềt Siôn sền òsơp, dơñŏ tơnhial mê; kòn ùr Jerusalem neh rtơs bồ di mê.

²²Mê bơtat bơtròh mơ srat rma ñcau taih? Mê neh đơs dờng jơnau Ngan mê neh pò mat sền trol tòmdră mơ ñcau taih? Khin cha tòmdră mơ Bơtau Goh Israel dê!

²³Mê neh kơnòm ală cau kong sồr he bơrsèl tơnhial Yàng. Mơ đơs lah: “Añ cèng oă rơndeh tòmlơh, guh hơđang bồ mơnơm, tus di tiah jơnhoa ngài ngan Liban dê; añ rơp kơl ală chi pơnàng jơnhoa rlau jơh, mơ chi nho rề niam rlau jơh gơ dê; añ rơp tus di tiah ngài rlau jơh, hơ̆ la brê dơr gơ dê.

²⁴Añ neh tò tơrlung, hùc dà lơgar ndai; añ neh lơh soat ală hiòng dà Ejiptơ mơ mpàng jơng añ jê.”

²⁵Mê òhềt gơs tŭ lơi kơno lah Bơta do Añ neh lơh nền jŏ rau ơ? Añ neh rơndap nền bơh rài yau, Tŭ do, Añ lơh bơta hơ̆ gơlik gơs, Nàng mê in phà tơrlah ală ƀòn kơ̆ cê gơlik dô gơnru lề lac.

²⁶Tài behơ̆, làng bol ală ƀòn hơ̆ lơbơn lơño, kong rngòt rngơt mơ ƀàssìl ƀàsso; bol khai tòm toh be ñhơt tòm ƀlàng, be ñhơt tơlir sre, gơlơh be ñhơt hơđang rkàng hìu, ò gơkrơi be kòi mi neh ñòp lài mơ tŭ hòn dờng.

²⁷Mơya Añ git tŭ mê nggui, tŭ mê ntào, Tŭ mê lik, tŭ mê mut; mơ bơta gơhào gơjrañ mê gơwèt mơ Añ, Añ neh git jơh.

²⁸Bơh mê gơhào gơjrañ mơ Añ, mơ bơh jơnau pơnhừ să mê neh tus di tồr Añ, ngan Añ rơp cuh ơn dô nơm kòng di muh mê, nàng gla di bơr sơndồi mê. Gen Añ lơh mê in rê wơl jat gùng mơ mê neh lòt tus.’

²⁹Ơ Ejekia, kơnòm di tềl sơnio do mê đal git lah jơnau do rơp gơlik tòm toh: Nam do, bol mê rơp sa gar sơntìl hòn is; nam dơ̆ bàr sa phan gơrung is; mơya nam dơ̆ pe, bol mê rơp sih mơ toès, tam ño mơ sa plai gơ.

³⁰Dilah gar sơntìl lơi gam wơl làng bol Juda dê, hơđơm rơp hòn ryas, hơđang rơp gơlik plai.

³¹Bơh tòm Jerusalem cau gam wơl rơp lik, bơh Siôn cau gam kis rơp tus; nùs duh hul Yàng Jehôwa dê rơp lơh gơs bơta hơ̆.

³²Tài bơh hơ̆, Yàng Jehôwa đơs bơh bơtau Asiri be do: ‘Khai rơp ò mut tòm ƀòn do, ò pañ kam tòm gơ, ò tus di đap gơ mơ khèl, mơ ò bơt bơtào dơrñang tòmdră mơ gơ.’

³³Yàng Jehôwa đơs: ‘Khai rơp rê wơl jat gùng khai neh lòt tus, ò mut tòm ƀòn do.

³⁴Bơh Añ rơp cang kìng ƀòn do mơ dong tă gơ, bơh Añ mơ bơh Dabit dĭ gơna Añ jê.’”

³⁵Tòm mang hơ̆, gơs dô nă cau gơnrơh Yàng Jehôwa dê lòt tus tòmlơh mơ sàl Asiri, mơ tơnchơt dô rhiang phàm jơt pram rbô nă. Àng ngai hìng, cau guh bơh bic, gen gŏ mpồl ling hơ̆ la ƀồc chơt lơm.

³⁶Gen Sennacerip bơtau Asiri, rê wơl, ơm tòm Ninibe.

³⁷Dô ngai ne, khai duh khoai tòm bơmồng Nisrok, yàng khai dê, gen bàr nă kòn klau khai dê la Adrammelek mơ Sarejer tơnchơt khai mơ đào; gen bol khai dô tòm lơgar Ararat. Esarhatdôn, kòn klau ndai khai dê, pơrdòn sơbàn khai dê.