Read koho II Ală Bơtau 20 Bible Online

II Ală Bơtau 20 - koho bible

II Ală Bơtau 20

¹Tòm ală ngai hơ̆, Ejekia gơlơh kòp mòr chơt. Cau gơnoar hwơr Esai, kòn klau Amôs, lòt tus hơ khai mơ đơs lah: “Yàng Jehôwa đơs be do: ‘Rơndap niam tĕ hìu nhă mê, bơh mê rơp chơt, ò kis tai.’”

²Gen khai wèt mat hơ dơrñang, hòi dan mơ Yàng Jehôwa lah:

³“Ơ Yàng Jehôwa! Tŭ do añ rac dan mơ Kơnràñ, kah tĕ lah mbe lơi añ neh jơh nùs lòt di đap Yàng tòm bơta dòn song di đap Yàng, mơ neh lơh bơta niam di đap Yàng.” Ejekia ñìm rac sràt bơtang ngan.

⁴Lài mơ tŭ Esai òhềt lik tus digùl ƀlàng, gơs jơnau Yàng Jehôwa đơs mơ khai lah:

⁵“Rê wơl tĕ, đơs mơ Ejekia, bơtau làng bol Añ jê lah: Jehôwa Yàng Tom Trồ Dabit dê, ồng pàng mê dê, đơs be do: Añ neh kơno jơnau hòi dan mê dê, gŏ dà mat mê dê; ngan Añ rơp sơmbòi mê in; tus ngai dơ̆ pe mê rơp guh hơ hìu duh khoai Yàng Jehôwa dê.

⁶Añ rơp bơtơl jơt pram nam tai rài kis mê in, Añ rơp dong tă mê mơ ƀòn do klàs bơh tê bơtau Asiri. Tài bơh Añ mơ Dabit, cau dĭ gơna Añ, Añ rơp cang kìng ƀòn do.”

⁷Gen Esai đơs lah: “Ai tĕ dô nơm ƀañ plai chi ƀal, ơn tĕ gơ hơđang toh mồr tồ bơtau geh sơmbòi.”

⁸Ejekia lùp Esai lah: “Bơh tềl lơi añ đal git lah Yàng Jehôwa rơp sơmbòi añ in mơ tus di ngai dơ̆ pe añ rơp geh guh hơ hìu duh khoai Kơnràñ dê taih?”

⁹Esai ho lah: “Do la tềl sơnio mê in bơh Yàng Jehôwa, Kơnràñ rơp lơh wil tơl bơta Kơnràñ neh ho. Tŭ do mƀur tus hơđap jơt kơnă hala ruc wơl jơt kơnă taih?”

¹⁰Ejekia ho lah: “Mƀur tus hơđap jơt kơnă gen la be òs; chan lòi mƀur ruc wơl jơt kơnă la niam rlau.”

¹¹Cau gơnoar hwơr hòi dan Yàng Jehôwa, gen Kơnràñ cèng mƀur ruc wơl jơt kơnă, bơh mattơngai neh ruc wơl bơh di rùp Ahas dê.

¹²Tòm tŭ hơ̆, Merôdak Baladan, kòn klau Baladan, bơtau Babilôn, pơyoa sră mơ phan pà Ejekia in; bơh khai kơno lah Ejekia kòp.

¹³Ejekia wă rò bol hơ̆, mơ sơnio bol khai in jơh đam jàr gơlang bơtau, priă, màh, sơnơm bơlhu, mơñà màng, ală phan tòmlơh, mơ ală phan tòm đam jàr khai dê. Ò gơs phan lơi tòm gơlang hala tòm lơgar mơ Ejekia ò sơnio bol khai in.

¹⁴Gen cau gơnoar hwơr Esai lòt tus hơ bơtau Ejekia, mơ lùp khai lah: “Ală cau hơ̆ bơh lơi tus? Mơ ñchi jơnau bol khai đơs taih?” Ejekia ho: “Bol khai tus bơh lơgar ngài, bơh Babilôn.”

¹⁵Esai pơnjat: “Ñchi bơtau ai bol khai in sền tòm gơlang bơtau taih?” Ejekia ho: “Bol khai neh gŏ jơh ală phan tòm gơlang añ. Ò gơs phan lơi tòm gơlang mơ añ ò ai bol khai in sền ò.”

¹⁶Gen Esai đơs mơ Ejekia lah: “Iat tĕ jơnau Yàng Jehôwa:

¹⁷‘Ală ngai rơp tus, tòm tŭ ală phan ơm tòm gơlang bơtau, ală phan mơ ồng pàng bơtau dê neh prap lòi tòm đam jàr jơl tus di ngai do, gen rơp kong cèng tus hơ Babilôn, rơp ò gơs phan lơi gam wơl.

¹⁸Ală kòn klau bơtau dê, neh deh bơtau in, rơp kòl kup cèng; bol khai rơp lơh gơs cau kwang kriau tòm gơlang bơtau Babilôn dê.’”

¹⁹Ejekia ho mơ Esai lah: “Jơnau Yàng Jehôwa mơ ồng neh đơs hơ̆ la niam.” Bơh khai neh kơlôi lah: “Ñchi bơh tài, dilah tòm rài añ rơp gơs bơta lơngap lơngai mơ bơta ring lơngai?”

²⁰Ală bơta ndai Ejekia dê, bơta pràn kơldang khai, bơta bơt bơtào tơrlung ơn dà mơ cèng dà mut tòm ƀòn, gen neh cih tòm sră yal broă kòp nam ală bơtau Juda dê.

²¹Ejekia bic lơhă bal mơ ală ồng pàng khai dê; Manase kòn klau khai pơrdòn sơbàn.