Read koho II Ală Bơtau 21 Bible Online

II Ală Bơtau 21 - koho bible

II Ală Bơtau 21

¹Manase neh jơt bàr sơnam tòm tŭ khai sơntòm at bồ; khai at bồ pram jơt pram sơnam tòm Jerusalem. Mè khai sơnđan la Hepjiba.

²Khai lơh bơta iơh di đap Yàng Jehôwa mơ lòt jat bơta cù kìr ală làng bol mơ Yàng Jehôwa neh bơtrơh tơlik di đap làng bol Israel.

³Bơh khai bơt bơtào wơl ală tiah jơnhoa mơ Ejekia bèp khai neh phà tơrlah, bơtào wơl cơnòng duh khoai Baal, bơtào rùp ràk Asera tòm toh be Ahap bơtau Israel neh lơh, duh khoai ală sơmañ hơđang trồ mơ duh broă gơ.

⁴Khai kung bơt cơnòng duh khoai tòm hìu duh khoai Yàng Jehôwa, mơ Yàng Jehôwa neh đơs bơh hìu duh khoai lah: “Tòm Jerusalem Añ rơp ơn sơnđan Añ.”

⁵Khai bơt ală cơnòng duh khoai kòp nơm rùp hơđang trồ, tòm bàr bă tiah ơdŭ mpang hìu duh khoai Yàng Jehôwa dê.

⁶Chu kòn klau he tòm ồs nàng duh khoai, bơtê ngui crìu, sền dà; bơtào ală cau gru bơjơu. Khai lơh bơta iơh di đap Yàng Jehôwa oă ngan, bơrcek bơta gơjrañ Kơnràñ sùm.

⁷Ai rùp ràk Asera mơ khai neh lơh, gen khai ơn tòm hìu duh khoai mơ Yàng Jehôwa neh đơs mơ Dabit mơ Salômôn, kòn klau khai, lah: “Tòm hìu duh khoai do mơ tòm Jerusalem, ƀòn Añ neh sac tòm ală jơi bơtiàn Israel, mơ Añ rơp ơn sơnđan Añ sùm sùm.

⁸Añ rơp ò lơh jơng Israel dê lik lòt nrah nring tai, bơh di lơgar mơ Añ neh ai ồng pàng bol khai in; dilah bol khai mìng kơrhia lơh jat jơh ală bơta Añ neh nting sồr bol khai, mơ lơh jat jơh ală bơta boh lam mơ dĭ gơna Añ jê la Môise neh sồr bol khai.”

⁹Mơya bol khai ò bài iat; Manase neh lam bol khai lơh bơta iơh bơsak rlau mơ ală làng bol mơ Yàng Jehôwa neh tơnroh bơh di đap làng bol Israel.

¹⁰Yàng Jehôwa kơnòm di ală cau gơnoar hwơr, la dĭ gơna Kơnràñ, mơ đơs lah:

¹¹“Bơh Manase, bơtau Juda, neh tìs ală bơta cù kìr hơ̆, mơ neh lơh bơta iơh rlau mơ ală bơta cau Amôrit neh lơh lài mơ khai, mơ neh lơh Juda in kung tìs glài mơ rùp ràk khai dê sơl.

¹²Tài bơh hơ̆, Jehôwa Yàng Tom Trồ Israel dê đơs be do: ‘Añ rơp tơndùh hơđang Jerusalem mơ hơđang Juda ală bơta rung rài dờng ngan, tian gơs dilah cau lơi kơno yal rơp nggồr tồr.

¹³Añ rơp yò hơđang Jerusalem che was Samari mơ kơr hìu Ahap. Añ rơp jùt jơh Jerusalem be cau jùt dô nơm prềng, jùt gơ mơ drup sơrklup gơ.

¹⁴Añ rơp tơnroh pơnah gam wơl bơh sre brê Añ jê, jào phi bol khai tòm tê cau sò tơm bol khai dê; bol khai rơp gơlik gơs phan pơndòm mơ phan kup geh ală cau sò tơm bol khai dê;

¹⁵bơh bol khai lơh ală bơta iơh di đap Añ, bơrcek bơta gơjrañ Añ, bơh ngai ồng pàng bol khai lik bơh lơgar Ejiptơ jơl tus ngai do.’”

¹⁶Manase kung lơh gơtuh oă mhàm ò gơs glài, tian gơs Jerusalem kong bềng bơh đah do tus hơ đah ne. Di gah glài mơ khai neh lơh Juda in tìs glài, gen tàng bol khai neh lơh ală bơta iơh di đap Yàng Jehôwa.

¹⁷Ală bơta ndai Manase dê, ală broă khai mơ glài khai neh tìs, gen neh cih tòm sră yal broă kòp nam ală bơtau Juda dê.

¹⁸Manase bic lơhă bal mơ ồng pàng khai dê, geh tơp tòm suơn gơlang khai dê, hơ̆ la suơn Uja. Ammôn, kòn klau khai pơrdòn ala khai.

¹⁹Ammôn neh bàr jơt bàr sơnam; tòm tŭ khai at bồ; mơ khai at bồ bàr sơnam tòm Jerusalem. Mè khai sơnđan la Mesulemet, kòn ùr Harus, sau Jôtba dê.

²⁰Khai lơh bơta iơh di đap Yàng Jehôwa, tòm toh be Manase, bèp khai, neh lơh.

²¹Khai lòt jat jơh ală gùng mơ bèp khai neh lòt, duh broă rùp ràk mơ bèp khai neh duh broă, mơ duh khoai bol gơ.

²²Khai sang lòi Jehôwa Yàng Tom Trồ ồng pàng khai dê, mơ ò lòt jat gùng dà Yàng Jehôwa dê.

²³Ală dĭ gơna Ammôn dê bơtào tòmdră mơ khai, mơ tơnchơt khai tòm gơlang bơtau.

²⁴Mơya làng bol tòm lơgar tơnchơt jơh ală cau pơrlơ̆ dră di bơtau Ammôn, mơ pồ bơtào Jôsia, kòn klau khai, lơh gơs bơtau ala khai.

²⁵Ală bơta ndai Ammôn dê, mơ broă khai neh lơh, gen neh cih tòm sră yal broă kòp nam ală bơtau Juda dê.

²⁶Khai geh tơp tòm bơtô ƀồc khai dê tòm suơn Uja; Jôsia, kòn klau khai, pơrdòn sơbàn khai dê.