Read koho II Ală Bơtau 22 Bible Online

II Ală Bơtau 22 - koho bible

II Ală Bơtau 22

¹Jôsia neh phàm sơnam, tòm tŭ khai sơntòm at bồ; khai at bồ pe jơt dùl nam tòm Jerusalem; Mè khai sơnđan la Jedida, kòn klau Adaja, sau Bôskat.

²Khai lơh bơta niam di đap Yàng Jehôwa, lòt jat jơh gùng dà Dabit, ồng pàng khai dê, ò wèt đah ma, hala đah kiau.

³Tòm nam dơ̆ jơt phàm rài Jôsia dê, bơtau sồr cau gơnoar cih Saphan kòn klau Ajalia, sau Mesulam, tus hơ hìu Yàng Jehôwa mơ nting lah:

⁴“Lòt tus tĕ hơ cau gơnoar dờng ơn phan duh khoai Hilkia, kòp priă neh cèng tus tòm hìu duh khoai Yàng Jehôwa dê, hơ̆ la priă mơ ală cau kơp gàr mpồng hìu duh khoai neh dòp geh bơh làng bol;

⁵gen jào priă hơ̆ tòm tê ală cau lơh broă la ală cau rcang gàr tòm hìu duh khoai Yàng Jehôwa dê, nàng bol khai jào ală cau chài lơh broă tòm hìu Yàng Jehôwa dê, nàng rcang lơh niam wơl,

⁶hơ̆ la cau chài lơh chi, cau chài bơt hìu, cau chài koh lŭ, mơ ngui blơi chi mơ lŭ neh phàt nàng rcang niam wơl hìu duh khoai.

⁷Mơya bañ kòp khà priă neh jào di tê bol khai, bơh bol khai ngan la cau lơh broă dòn song.”

⁸Cau gơnoar dờng lam bồ ơn phan duh khoai Hilkia đơs mơ cau gơnoar cih Saphan lah: “Añ neh jòi bàn dap sră bơta boh lam tòm hìu duh khoai Yàng Jehôwa dê.” Hilkia jào sră hơ̆ Saphan in, mơ khai sền sră hơ̆.

⁹Gen, cau gơnoar cih Saphan tus hơ bơtau mơ yal wơl lah: “Ală dĭ gơna bơtau dê neh tă priă jòi bàn tòm hìu duh khoai, mơ neh jào tòm tê ală cau rcang gàr hìu duh khoai Yàng Jehôwa dê.”

¹⁰Cau gơnoar cih Saphan đơs tai lah: “Cau gơnoar dờng lam bồ ơn phan duh khoai Hilkia neh jào añ in dô dap sră;” gen Saphan sền dờng sră hơ̆ di đap bơtau.

¹¹Tòm tŭ bơtau kơno ală jơnau tòm sră bơta boh lam, gen khai crè ồi ào.

¹²Gen, bơtau ai gơnoar sồr cau gơnoar ơn phan duh khoai Hilkia, Ahikam, kòn klau Saphan, Akbô, kòn klau Mikaya, Saphan, cau gơnoar cih, mơ Asaya, dĭ gơna bơtau dê mơ đơs lah:

¹³“Lòt tĕ hòi dan mơ Yàng Jehôwa añ in, làng bol in, mơ jơh Juda in, bơh ală jơnau tòm sră pa geh jòi bàn. Bơh bơta gơjrañ Yàng Jehôwa dê gơhào tòmdră mơ bol he ngan la dờng, tài bơh ồng pàng bol he ò bài dòn bơr ală jơnau tòm sră do, mơ ò lơh jat ală bơta neh cih bol he in.”

¹⁴Behơ̆, cau gơnoar ơn phan duh khoai Hilkia, Ahikam, Akbô, Saphan, mơ Asaya lòt jòi cau gơnoar hwơr ùr Hulda, bau ùr Salum, cau prap ào bơta pơjum, kòn klau Tikba, sau Harhas; mò ơm tòm Jerusalem, tòm ƀòn dơ̆ bàr. Bol khai lùp mò,

¹⁵gen mò đơs lah: “Jehôwa Yàng Tom Trồ Israel dê đơs be do: Yal tĕ mơ cau sồr bol mê tus mơ Añ lah:

¹⁶Yàng Jehôwa đơs be do: Ngan Añ rơp cèng bơta rung rài tus hơđang tiah do mơ hơđang làng bol ơm tòm hơ̆, lơh wil tơl ală jơnau tòm sră mơ bơtau Juda neh sền.

¹⁷Tài bơh làng bol Juda neh sang lòi Añ, chu kơlhô ală yàng ndai in, bơrcek Añ gơjrañ bơh ală broă tê bol khai dê, gen tàng bơta gơjrañ Añ rơp gơhào khuh mơ tiah do, ò tŭ lơi rài.

¹⁸Ai đah mơ bơtau Juda neh sồr cau hòi lùp Yàng Jehôwa, gen đơs tĕ mơ khai lah: Bơh ală jơnau khai neh kơno Jehôwa Yàng Tom Trồ Israel dê đơs be do:

¹⁹Tài bơh nùs mê neh git gơjrañ sang glài, mơ pơndêt să mê di đap Yàng Jehôwa; tòm tŭ mê neh kơno jơnau Añ đơs tòmdră mơ tiah do, mơ tòmdră mơ làng bol ơm tòm hơ̆, bol khai rơp gơlik dô bă tiah sang lòi srau gòi mơ srat rma, tài bơh mê neh crè ồi ào mê mơ ñìm rac di đap Añ, mơ Añ neh iat jơnau mê, Yàng Jehôwa đơs behơ̆.

²⁰Gen tàng, Añ rơp tơrgòm mê rê bal mơ ală ồng pàng mê; mơ mê rơp geh tơp tòm bơtô mê dô bă lơngap lơngai, mơ mat mê rơp ò gŏ ală bơta rung rài mơ Añ rơp cèng tus hơđang tiah do.” Gen bol khai yal wơl bơtau in ală jơnau hơ̆.