Read koho II Ală Bơtau 24 Bible Online

II Ală Bơtau 24 - koho bible

II Ală Bơtau 24

¹Tòm rài Jehôyakim at bồ, gen Nebukatnessar, bơtau Babilôn, guh tòmpìt lơgar Juda. Gen Jehôyakim gơlik gơs cau duh broă khai tòm pe sơnam, mơya bơtau Jehôyakim pơrlơ̆ nùs mơ tòmdră wơl mơ Nebukatnessar.

²Yàng Jehôwa chồl ală mpồl ling Kalde, ling Aram, ling Môap, mơ ling Ammôn dê tus tòmlơh mơ tơnroh Juda, jat be jơnau Yàng Jehôwa neh đơs bơh di ală cau gơnoar hwơr, la dĭ gơna Kơnràñ dê.

³Ngan bơta do gơlik tus hơđang làng bol Juda la bơh gơnoar sồr Yàng Jehôwa dê, nàng tă tơlik bol khai bơh di đap Kơnràñ, tài bơh ală tồi glài Manase dê, mơ bơh jơh ală bơta tồi glài khai neh lơh,

⁴mơ kung tài bơh mhàm ò gơs glài mơ khai neh lơh gơtuh; bơh khai neh lơh Jerusalem in bềng mhàm ò gơs glài, gen Yàng Jehôwa ò toh glài khai in.

⁵Ală broă ndai Jehôyakim dê, ală bơta khai neh lơh, neh cih tòm sră yal broă kòp sơnam ală bơtau Juda dê.

⁶Behơ̆ Jehôyakim bic lơhă bal mơ ală ồng pàng khai dê, mơ Jehôyakin kòn klau khai pơrdòn gơnoar ala khai in.

⁷Mơ tai, bơtau Ejiptơ ò khin lik bơh lơgar khai dê tai, tài bơh bơtau Babilôn neh tòmpìt ai lơgar gơrê bal mơ bơtau Ejiptơ, bơh croh Ejiptơ jơl tus hiòng Ơphrat.

⁸Jehôyakin neh jơt phàm sơnam tòm tŭ khai sơntòm at bồ; khai at bồ pe kơnhai tòm Jerusalem. Mè khai sơnđan la Nehusta, kòn ùr Elnathan ơm tòm Jerusalem.

⁹Khai neh lơh bơta iơh di đap Yàng Jehôwa, jat be bèp khai neh lơh.

¹⁰Tòm tŭ hơ̆, ală dĭ gơna Nebukatnessar, bơtau Babilôn, lòt tus hơ Jerusalem mơ gơrwàng ƀòn dờng.

¹¹Bơtau Nebukatnessar Babilôn dê, guh tus hơ ƀòn dờng, tòm tŭ ală mpồl ling khai dê ơm gơrwàng ƀòn.

¹²Gen Jehôyakin, bơtau Juda, jào să tòm khai bơtau Babilôn in, bal mơ mè khai, ală dĭ gơna khai, ală kwang at bồ ling, mơ ală kwang kơndời khai dê. Bơtau Babilôn kup khai cèng jàm tòm nam dơ̆ phàm rài Bơtau Babilôn at bồ.

¹³Nebukatnessar tùng cèng jơh ală phan kas màng tòm hìu duh khoai Yàng Jehôwa mơ ală phan kas màng tòm gơlang bơtau dê, khai pòng bơcah jơh ală phan ngui mơ màh tòm hìu Yàng Jehôwa dê mơ Salômôn, bơtau Israel neh lơh, jơh ală bơta do neh gơlik tòm toh be jơnau Yàng Jehôwa neh yal.

¹⁴Khai cèng pơrdô jơh làng bol Jerusalem, jơh ală kwang at bồ ling, mơ ală cau ling tòmlơh pràn kơldang lòt, kup cèng jơt rbô nă; jơh ală cau chài lơh chi mơ cau chài tiar lòs; ò lòi dô nă lơi, mìng gam ală cau rƀah rlau jơh tòm lơgar.

¹⁵Khai cèng Jehôyakin tus hơ Babilôn; mè bơtau, ală bau ùr bơtau, ală cau kwang, ală cau jak chài tòm lơgar dê, khai kup cèng jơh hơ Babilôn.

¹⁶Bơtau Babilôn kup cèng hơ Babilôn jơh ală cau khin cha; poh rbô nă, ală cau chài lơh chi mơ cau chài tiar lòs, dô rbô nă jơh ală la cau pràn kơldang jak tòmlơh.

¹⁷Bơtau Babilôn pồ bơtào Mattania, kồñ Jehôyakin dê, lơh gơs bơtau ala khai, tòmgơl sơnđan la Jedekia.

¹⁸Jedekia neh bàr jơt dùl sơnam tòm tŭ khai sơntòm at bồ, mơ khai at bồ jơt dùl sơnam tòm Jerusalem. Mè khai sơnđan la Hamuta, kòn klau Jeremi ơm tòm Lipna.

¹⁹Khai lơh bơta iơh di đap Yàng Jehôwa, be Jehôyakim neh lơh.

²⁰Bơh Jerusalem mơ làng bol Juda neh lơh Yàng Jehôwa in gơhào gơjrañ, tian gơs Kơnràñ bơtrơh tơlik bol khai bơh di đap mat Kơnràñ. Jedekia pơrlơ̆ dră di bơtau Babilôn.