Read koho II Ală Bơtau 25 Bible Online

II Ală Bơtau 25 - koho bible

II Ală Bơtau 25

¹Tòm nam dơ̆ sin rài Jedekia, ngai jơt kơnhai jơt, bơtau Nebukatnessar, Babilôn dê, bal mơ jơh mpồl ling khai dê, tus tòmlơh mơ Jerusalem; mơ khai sơntơp sàl di đap ƀòn, mơ bơt dơrñang gơrwàng gùt dar ƀòn.

²Bơta gơrwàng ƀòn jŏ jơl tus di sơnam dơ̆ jơt dùl rài Jedekia.

³Ngai sin kơnhai poan, gơs bơta jơgloh rung dờng tòm ƀòn, làng bol ò gơs piang lă.

⁴Tŭ hơ̆, gơs dô nơm trồm neh tơmbluh di dơrñang ƀòn; gen bơtau mơ jơh mpồl ling ntoat dô tòm trồ mang di gùng mpồng ƀòn dờng digùl bàr nơm dơrñang ƀòn rềp di suơn bơtau. Bulah mpồl ling Kalde gơrwàng ƀòn dờng. Bol khai dô song hơ Araba.

⁵Mơya mpồl ling Kalde ting jat bơtau Jedekia, mơ kup geh khai tòm ƀlàng ring Jerikô; jơh mpồl ling khai dô nrah nring mơ sang lòi khai.

⁶Mpồl ling Kalde kup bơtau Jedekia, lam tus hơ bơtau Babilôn ơm tòm Ripla; bol khai lơh nền glài bơtau.

⁷Bol khai tơnchơt ală kòn klau Jedekia di đap mat khai; bol khai kơlwĕ mat Jedekia, kơt khai mơ sreng kòng, mơ cèng khai tus hơ Babilôn.

⁸Ngai poh kơnhai pram; nam dơ̆ jơt sin rài bơtau Nebukatnessar, bơtau Babilôn, kwang sền gàr bơtau Nebujaradan, dĭ gơna bơtau Babilôn, tus hơ Jerusalem.

⁹Khai chu hìu duh khoai Yàng Jehôwa, gơlang bơtau dê, mơ ală hìu tòm ƀòn dờng Jerusalem; chu pơrguc jơh ală hìu dờng.

¹⁰Gen mpồl ling Kalde, la ală cau lòt bal mơ cau kwang sền gàr bơtau, phà tơrlah dơrñang gùt dar Jerusalem.

¹¹Kwang sền gàr bơtau Nebujaradan kup cèng pơrdô jơh ală làng bol gam wơl tòm ƀòn, bal mơ jơh ală cau neh sang mpồl ling mơ lòt jat bơtau Babilôn mơ mpồl làng bol gam wơl.

¹²Kwang sền gàr bơtau mìng lòi wơl ală cau rƀah lơòi rlau jơh, nàng tam ño mơ lơh sre.

¹³Mpồl ling Kalde pòng bơcah jơh ală jrong kòng, mpàn kòng, mơ tơnau ơn dà mơ kòng tòm hìu duh khoai Yàng Jehôwa dê, mơ cèng kòng hơ̆ hơ Babilôn.

¹⁴Bol khai kung cèng jơh ală glah mơ kòng, cơnhŏ dờng, pềs, mơngàn, mơ jơh ală phan ngui mơ kòng ngui tòm bơta duh khoai.

¹⁵Cau kwang sền gàr bơtau hơ̆ kung cèng jơh ală phan ơn kơlhô, thao, mơ ală phan mơ màh, priă.

¹⁶Ai bàr nơm jrong, dô nơm tơrlung ơn dà, mơ ală jơng gơ mơ Salômôn neh lơh hìu duh khoai Yàng Jehôwa in, gen ò rgơi kơr jơh ală kòng ală phan hơ̆ dê.

¹⁷Kòp jrong jơnhoa jơt phàm tal, hơđang bồ jrong kòng jơnhoa pe tal, geh gòm gùt dar mơ bơtơng mơ ală plai lừu kung mơ kòng. Jrong dơ̆ bàr kung bơka bơtơng tòm toh be jrong lài.

¹⁸Kwang sền gàr bơtau kup cau gơnoar dờng ơn phan duh khoai Seraya, cau gơnoar oh ơn phan duh khoai Sôphôni, mơ pe nă cau kơp gàr mpồng hìu duh khoai,

¹⁹Bơh tòm ƀòn khai kung kup dô nă cau kwang at bồ ală cau ling jak, mơ pram nă kwang bơyai broă ơm rềp mơ bơtau neh bàn tòm ƀòn dờng, cau gơnoar cih la cau kwang dờng at bồ mpồl ling rcang hòi pơjum jơh mpồl ling tòm lơgar, bal mơ prau jơt nă cau tòm lơgar la cau neh bàn tòm ƀòn dờng;

²⁰Nebujaradan kwang sền gàr bơtau kup bol khai mơ cèng jơh tus hơ bơtau Babilôn, tòm Ripla.

²¹Bơtau Babilôn sồr tơnchơt bol khai tòm Ripla, tòm tiah Hamat. Behơ̆, cau Juda kong kup cèng lik bơh lơgar tòm bol khai dê.

²²Bơtau Babilôn bơtào Gedalia kòn klau Ahikam, sau Saphan lơh gơs kwang at bồ hơđang ală làng bol gam wơl tòm lơgar Juda, la ală cau bơtau Nebukatnessar lòi wơl.

²³Tŭ ală kwang ling mơ ală cau ling bol khai dê kơno lah, bơtau Babilôn neh bơtào Gedalia lơh gơs kwang dờng gen bol khai lòt tus hơ Gedalia tòm Mispa. Sơnđan bol khai la Ismael, kòn klau Nethania, Jôhanan, kòn klau Kareah, Seraya, kòn klau Tanhumet cau Netôphat, mơ Jaajania, kòn klau cau Maakat.

²⁴Gedalia srat să mơ bol khai mơ mpồl ling bol khai dê lah: “Bañ rngòt ală kwang cau Kalde dê. Ơm tĕ tòm lơgar, duh broă bơtau Babilôn, gen ală bol mê rơp geh lơngap lơngai.”

²⁵Mơya kơnhai poh, Ismael, kòn klau Nethania, sau Elisama, bơh jơi bơtiàn bơtau, tus tòm Mitba, gơs jơt nă cau lòt bal, lơh tơnchơt Gedalia, ală cau Juda mơ cau Kalde ơm bal mơ khai tòm Mispa.

²⁶Jơh làng bol, bơh cau dềt tus di cau dờng, mơ jơh ală kwang at bồ ling lik lòt tus hơ lơgar Ejiptơ, tài bơh bol khai rngòt di cau Kalde.

²⁷Tòm nam dơ̆ pe jơt poh Jehôyakin bơtau Juda kòl kup cèng, ngai bàr jơt poh kơnhai jơt bàr, Ebilmerodak bơtau Babilôn, tòm nam hơ̆ khai sơntòm at bồ, khai hồ toh Jehôyakin bơtau Juda lik bơh hìu jàm.

²⁸Khai đơs jơnau lơbơn niam mơ Jehôyakin, mơ ơn sơbàn khai gơs gơnoar rlau mơ ală cau bơtau bal mơ khai tòm Babilôn.

²⁹Behơ̆ Jehôyakin hồ ào jàm, kòp ngai tòm rài kis khai geh sa hơđang cơnòng bal mơ bơtau.

³⁰Bơh bơta ai gơnoar bơtau dê, kòp ngai bơtau rcang ai phan ngui sa khai in jơl jơh rài kis Jehôyakin dê.