Read koho II Ală Bơtau 4 Bible Online

II Ală Bơtau 4 - koho bible

II Ală Bơtau 4

¹Tŭ hơ̆, gơs bau ùr dô nă tòm mpồl ală cau gơnoar hwơr dê rac dan mơ Elise lah: “Cau dĭ gơna ồng la bau klau añ, neh sang rài; mơ ồng git lah dĭ gơna ồng dê duh rngòt Yàng Jehôwa. Mơya gơs dô nă cau tòm dồs neh tus nàng kup bàr nă kòn klau añ nàng lơh dĭ.”

²Elise đơs mơ khai lah: “Ñchi añ pal lơh ai in taih? Yal tĕ añ in git; ñchi phan ai gơs tòm hìu taih?” Khai ho lah: “Cau dĭ ùr ồng ò gơs phan lơi tòm hìu mìng dô gri mơñà.”

³Khai đơs lah: “Lik tĕ jồm ală gri gòi ală cau gơp ƀòn ai dê, bañ jồm dô êt.

⁴Gen mut tĕ tòm hìu til mpồng wơl bal mơ ală kòn ai dê, mơ sơntòm tuh mơñà tòm ală gri hơ̆, gri lơi bềng gen ơn dô đah.”

⁵Behơ̆ khai lik bơh hơ̆ mơ rê hìu til mpồng wơl bal mơ ală kòn khai dê; ală kòn khai cèng ală gri nàng tuh mơñà.

⁶Tòm tŭ ală gri neh bềng rau, khai đơs mơ kòn klau khai lah: “Cèng tĕ añ in gri ndai tai.” Mơya khai đơs lah: “ò gam gri tai.” Gen mơñà dơh wơl.

⁷Khai tus yal mơ cau Yàng Tom Trồ, gen Elise đơs lah: “Cèng tac tĕ mơñà mơ tơm dồs ai dê; ai mơ ală kòn ai rgơi kis bơh mơñà gam wơl hơ̆.”

⁸Dô ngai ne, Elise lòt gan làm Sunem, tềng hơ̆ gơs dô nă cau ùr pas sơm, jà khai ơm wơl sa. Bơh hơ̆, kòp dơ̆ khai lòt gan gùng hơ̆, Eli ơm wơl tềng hơ̆ nàng sa.

⁹Khai đơs mơ bau klau khai lah: “Añ git nền la cau òs lòt gan gùng bol he do la cau goh Yàng Tom Trồ dê.

¹⁰Bol he lơh tĕ dô nơm ơdŭ dềt hơđang rkàng mơ ală dơrñang, mơ ơn tòm hơ̆ dô nơm cơnòng bic, dô nơm cơnòng cih; dô nơm cơnòng nggui, mơ dô nơm ồs đèng khai in. Behơ̆ nàng khai in ơm tềng hơ̆ kòp dơ̆ khai tus hìu he.”

¹¹Dô ngai ne, Elise lòt tus hơ Sunem, ơm tòm ơdŭ hơđang, mơ bic tềng hơ̆.

¹²Khai đơs mơ Gehaji, dĭ gơna khai, lah: “Hòi tĕ cau ùr Sunem hơ̆ tus.” Gehaji hòi khai; khai lik ntào di đap Elise.

¹³Elise đơs mơ dĭ gơna khai lah: “Đơs tĕ mơ khai lah: ‘Bơh ai neh kong bòl glar rcang ală bơta do bol hi in; behơ̆ ñchi bol he pal lơh ai in taih? Ai gơs jơnau lơi nàng añ đơs ala ai in mơ cau bơtau hala cau kwang at bồ mpồl ling sơl?’” Khai đơs mơ khai lah: “Añ gam ơm digùl làng bol tòm añ jê.”

¹⁴Elise đơs tai: “Behơ̆, gen ñchi bol he pal lơh khai in taih?” Gehaji ho lah: “Heh, khai ò gơs kòn klau, mơ bau klau khai neh kra rau.”

¹⁵Elise đơs lah: “Hòi tĕ khai.” Tòm tŭ Gehaji hòi khai, khai tus ntào di mpồng.

¹⁶Elise đơs mơ cau ùr lah: “Nam tơnơ̆, di di tŭ do, ai rơp kơnđu dô nă kòn klau.” Khai đơs: “Ơ yàng añ, la cau Yàng Tom Trồ dê! Dan bañ đơs pơrlồm mơ dĭ ùr yàng dê.”

¹⁷Cau ùr hơ̆ geh bun, mơ khai deh dô nă kòn klau, nam tơnơ̆, kung di di tŭ hơ̆, tòm toh be jơnau Elise neh yal lài khai in.

¹⁸Tòm tŭ kòn dềt neh dờng, dô ngai ne khai lòt tus hơ bèp khai digùl ală cau toès kòi,

¹⁹khai hòi lah mơ bèp khai lah: “Ah, bồ añ jê! Bồ añ jê!” Bèp khai sồr cau dong broă lah: “Cèng tĕ khai rê hơ mè khai.”

²⁰Cau dong broă cèng khai rê, jào mè khai in; kòn dềt nggui hơđang gơltang mè khai dê tus nggùl ngai, gen khai chơt.

²¹Gen mè khai cèng khai tơmbic hơđang cơnòng cau Yàng Tom Trồ dê, lồc behơ̆ lik lòt, til mpồng wơl.

²²Tơnơ̆ mơ hơ̆, khai hòi bau klau khai mơ đơs lah: “Sồr tĕ dô nă cau dong broă, mơ cèng dô nơm alàng añ in, nàng añ lòt tus hơ cau Yàng Tom Trồ dê; gen añ rơp rê wơl.”

²³Bau klau lùp khai lah: “Ñchi bơh tài lòt tus hơ khai? Ngai do ò di ngai dùl lik, kung ò di ngai Saƀat taih?” Cau ùr ho: “Jơh ală bơta niam lơm.”

²⁴Gen cau ùr sồr kơt ừn alàng, mơ đơs mơ cau dong broă lah: “Pù tĕ alàng lòt, bañ lơh òbat, dilah tŭ lơi añ sồr gen dơh wơl.”

²⁵Behơ̆, khai lik lòt tus hơ cau Yàng Tom Trồ dê hơđang mơnơm Karmel. Tòm tŭ cau Yàng Tom Trồ dê gŏ khai bơh ngài, gen đơs mơ Gehaji, cau dong broă khai lah: “Ne, cau ùr Sunem!

²⁶Behơ̆, ntoat rò khai, mơ lùp khai lah: ‘Jơh ală bơta lơngap lơngai sơl? Bau mơ kòn ai lơngap lơngai sơl?’” Cau ùr ho: “Lơngap lơngai.”

²⁷Tŭ cau ùr tus rềp di cau Yàng Tom Trồ dê, hơđang mơnơm gen koar di jơng khai. Mơ Gehaji tus rềp nàng tơlo khai. Mơya cau Yàng Tom Trồ đơs lah: “Lòi tĕ dò khai, bơh khai jê sồt moat jrùng, sràt bơtang ngan; Yàng Jehôwa neh pồn mơ añ bơta do, mơ ò yal añ in.”

²⁸Gen cau ùr hơ̆ đơs lah: “Añ neh dan mơ cau tòm añ dô nă kòn klau sơl ơ? Añ ò di neh đơs lah: Bañ pơrlồm añ ò ơ?”

²⁹Elise đơs mơ Gehaji lah: “Kơt tĕ but mê, at gai kwềt añ mơ lòt. Dilah mê tìp cau lơi bañ lùp còp bol khai; dilah cau lơi lùp còp mê, bañ ho wơl. Mê rơp ơn gai kwềt añ hơđang muh mat kòn dềt.”

³⁰Cau mè kòn dềt đơs lah: “Kung be Yàng Jehôwa gam kis sùm, mơ bơta kis ồng dê, añ ò lik lòt dilah ồng ò lòt bal!” Gen Elise ñă ntào, mơ lòt jat khai.

³¹Gehaji lòt lài, mơ ơn gai kwềt hơđang muh mat kòn dềt. Mơya ò kơno ntas lơi, kung ò gŏ tềl kis lơi. Khai rê wơl rò Elise, mơ yal lah: “Kòn dềt òhềt kah rngal.”

³²Tòm tŭ Elise mut tòm hìu, gŏ kòn dềt bic chơt hơđang cơnòng khai dê.

³³Behơ̆ Elise mut til mpồng wơl, gơs kòn dềt mơ khai, mơ hòi dan mơ Yàng Jehôwa.

³⁴Gen khai hào hơđang cơnòng, bic blup hơđang să kòn dềt; ơn bơr hơđang bơr khai, mat hơđang mat khai, mơ tê hơđang tê khai. Khai bic blup hơđang kòn dềt, gen ƀồc khai ram wơl.

³⁵Elise mù bơh cơnòng, lòt yơng tòm ơdŭ; gen hào hơđang cơnòng bic blup hơđang să kòn dềt tai. Kòn dềt ntas muh poh dơ̆, mơ khai pò mat.

³⁶Gen Elise hòi Gehaji mơ đơs lah: “Hòi tĕ cau ùr Sunem.” Gehaji hòi khai. Tòm tŭ khai tus, Elise đơs mơ khai lah: “Kơnđu tĕ kòn ai.”

³⁷Khai tus mơ tơmbic să di jơng Elise mơ khoai, gen kơnđu kòn mơ lik lòt.

³⁸Tòm tŭ Elise rê wơl hơ Gilgal, gơs bơta jơgloh rung tòm lơgar. Ală cau bơtê ală cau gơnoar hwơr dê nggui di đap khai. Elise đơs mơ cau dong broă lah: “Ơn tĕ glah dờng hơđang bơnhă, gơm biap ală cau bơtê ală cau gơnoar hwơr in sa.”

³⁹Dô nă tòm mpồl bol khai lik lòt tòm ƀlàng sre nàng pic biap, gŏ dô nơm che ño brê, gen pic biap brê hơ̆, khai rê wơl, koh gơ ơn tòm glah, ò git gơ la biap lơi.

⁴⁰Cau yò kòp nă in sa; mơya tòm tŭ liap biap, bol khai driau dờng lah: “Ơ cau Yàng Tom Trồ, gơs bơta chơt tòm glah do!” Bol khai ò rgơi sa biap hơ̆.

⁴¹Elise đơs lah: “Cèng tĕ kơmbuh.” Khai ơn kơmbuh tòm glah, mơ đơs lah: “Yò tĕ kòp nă in sa.” Behơ̆, biap ò gam bơta khih lơi tai.

⁴²Gơs dô nă cau bơh Baal Salisa tus, cèng phan sa plai bồ sơnam ơn cau Yàng Tom Trồ in bàr jơt nai piang lă kòi màc, mơ kòi gam sơnyùr ơn tòm kơldung khai dê, lơh gơs phan ơn bồ sơnam. Elise sồr cau dong broă khai lah: “Ai tĕ gơ nàng làng bol in sa.”

⁴³Cau dong broă khai yal lah: “Mbe añ rgơi ơn piang lă mìng kàr do di đap dô rhiang nă cau in taih?” Mơya Elise ho: “Ai tĕ gơ nàng bol in sa; bơh Yàng Jehôwa neh đơs be do: ‘Bol khai rơp sa mơ gam tơngkah wơl.’”

⁴⁴Khai ơn ală piang lă hơ̆ di đap bol khai, bol khai sa, mơ gam tơngkah wơl, tòm toh be jơnau Yàng Jehôwa neh đơs.