Read koho II Ală Bơtau 6 Bible Online

II Ală Bơtau 6 - koho bible

II Ală Bơtau 6

¹Tŭ hơ̆ mpồl ală cau gơnoar hwơr đơs mơ Elise lah: “Be ồng neh gŏ, tiah bol he ơm tềng do hơđơm bơta sền gàr ồng dê hat ngan bol hi in.

²Lòi bol hi lòt tus hơ Jordan, mơ lòi bol hi lòt kơl bơh tềng hơ̆ kòp nă dô nơm chi, mơ bơtào tềng hơ̆ dô bă tiah bol hi in ơm.” Elise ho: “Lơh tĕ behơ̆.”

³Gen dô nă tòm bol khai đơs lah: “Dan ồng lòt bal mơ ală dĭ gơna ồng dê.” Khai ho lah: “Añ rơp lòt.”

⁴Behơ̆, khai lòt bal mơ ală bol hơ̆. Tòm tŭ bol khai neh tus di hiòng Jordan, bol khai kơl chi.

⁵Mơya dô nă cau ơm kơl gơplơ̆ chi, mat sùng khai sơntă gơdùh tòm dà. Khai driau dờng lah: “Ơ cau tòm añ! Nđàc sơngit añ! Gơ la phan añ neh jồm.”

⁶Cau Yàng Tom Trồ lùp lah: “Ntềng đah gơdùh taih?” Tòm tŭ khai sơnio tiah hơ̆, gen Elise koh dô gơl chi sơrbì gơ di tiah hơ̆, mơ lơh mat sùng gơđồng hơđang.

⁷Khai đơs lah: “Dòñ tĕ gơ.” Behơ̆ cau hơ̆ pò tê mơ ai gơ.

⁸Tŭ hơ̆ tòm tŭ bơtau Aram lòt tòmlơh mơ Israel; khai bơyai bal mơ ală cau kwang khai dê, mơ đơs lah: “Tềng do mơ tềng ne la tiah añ rơp bơtào sàl añ jê.”

⁹Mơya cau Yàng Tom Trồ dê sồr cau tus đơs mơ bơtau Israel lah: “Kơrhia tĕ, bañ tiă gan tiah do, tài bơh cau Aram neh mù tềng hơ̆.”

¹⁰Cau bơtau Israel sồr cau lòt tus di tiah mơ cau Yàng Tom Trồ neh yal lài; Rlau mơ dô dơ̆ hala bàr dơ̆ khai neh yal lài dô bă tiah hơ̆ in, behơ̆ tàng bol khai neh ơm rcang ngac mat.

¹¹Nùs bơtau Aram dơrcul dờng ngan tài bơh bơta hơ̆, khai hòi ală cau kwang khai dê mơ đơs mơ bol khai lah: “Tŭ do yal tĕ añ in, ñcau tòm bol he ơm đah bơtau Israel taih?”

¹²Gen dô nă tòm ală cau kwang khai yal lah: “Ơ bơtau, cau tòm añ jê, ò gơs cau lơi ò; hơ̆ la Elise cau gơnoar hwơr tòm Israel, la cau yal bơtau Israel in ală jơnau bơtau đơs tòm ơdŭ bic bơtau dê.”

¹³Gen bơtau đơs lah: “Lòt tĕ jòi sền khai ơm tiah lơi, añ rơp sồr kup khai.” Gơs cau yal bơtau in lah: “Khai ơm tòm Dôthan.”

¹⁴Behơ̆, bơtau sồr cau ling hào ơseh, rơndeh, mơ dô mpồl ling gal ngan tus tòm trồ mang, mơ gơrwàng ƀòn.

¹⁵Tòm tŭ dĭ gơna cau Yàng Tom Trồ dê guh gòñ bơh drim lik lòt, gŏ dô mpồl ling bal mơ rơndeh ơseh ơm gơrwàng ƀòn dờng. Cau dĭ gơna đơs mơ Elise lah: “Ơ yàng! Ñchi bol he pal lơh taih?”

¹⁶Elise ho lah: “Bañ rngòt, ală cau ơm bal mơ bol he oă rlau mơ ală cau ơm bal mơ bol khai.”

¹⁷Gen Elise hòi dan lah: “Ơ Yàng Jehôwa, dan pò mat cau dĭ gơna añ, nàng khai in geh gŏ.” Gen Yàng Jehôwa pò mat khai, mơ khai gŏ mơnơm bềng ală ơseh mơ rơndeh mơ ồs ơm gùt dar Elise.

¹⁸Tòm tŭ mpồl ling Aram mù tus nàng tòmdră mơ Elise; khai hòi dan mơ Yàng Jehôwa lah: “Dan Yàng lơh mat mpồl ling hơ̆ gơlik jơngo.” Behơ̆ Yàng Jehôwa lơh bol khai in jơngo mat, jat be jơnau hòi dan Elise dê.

¹⁹Elise đơs mơ bol khai lah: “Do ò di la gùng lòt, do ò di la ƀòn dờng; jat tĕ añ, añ rơp lam bol mê tus hơ cau bol mê jòi.” Mơ khai lam bol hơ̆ lòt tus hơ Samari.

²⁰Tòm tŭ bol khai neh mut tòm Samari rau, Elise hòi dan lah: “Ơ Yàng Jehôwa dan pò mat bol khai in sền gŏ.” Gen Yàng Jehôwa pò mat bol khai, gen bol khai gŏ lah bol khai ơm tòm dơlam ƀòn Samari.

²¹Tòm tŭ bơtau Israel gŏ bol khai, gen khai đơs mơ Elise lah: “Ơ bèp, añ pal tơnchơt bol khai sơl? Añ pal tơnchơt bol khai sơl?”

²²Elise ho lah: “Ò di tơnchơt. Ală cau bơtau ngui đào mơ àtak kup ơm jàm, bơtau kòñ tơnchơt bol khai ơ? Yò tĕ di đap bol khai phan sa mơ dà, nàng bol khai in sa mơ hùc, mơ lòi bol khai rê wơl mơ cau tòm bol khai dê.”

²³Behơ̆ bơtau Israel yò sa dờng bol khai in; tơnơ̆ mơ tŭ bol khai neh sa mơ ñô rau, bơtau sồr bol khai lòt gùng bol khai dê; mơ bol khai rê wơl mơ cau tòm bol khai dê. Mơ cau Aram ò gam tus brồ lơh tòm ù tiah Israel dê tai.

²⁴Tơnơ̆ mơ ală broă hơ̆, Benhadat, bơtau Aram, pơjum jơh ală mpồl ling khai, lòt tus gơrwàng ƀòn dờng Samari.

²⁵Bơta gơrwàng ƀòn pơnjat sùm, gơs bơta jơgloh rung dờng ngan tòm Samari, tian gơs dô nơm bồ alàng tac phàm jơt sieklơ priă, mơ nggùl lit è sềm ntòp tac pram sieklơ priă.

²⁶Tŭ hơ̆ bơtau Israel lòt yơng hơđang dơrñang ƀòn, dô nă cau ùr hòi khai mơ lah: “Ơ bơtau cau tòm añ, dan dong añ!”

²⁷Bơtau đơs: “Ò di, lòi tĕ Yàng Jehôwa dong kòl ai, mbe añ rgơi dong kòl ai taih? Bơh ƀlàng jă kòi hala bơh tiah pat tơrnòm ño taih?”

²⁸Bơtau lùp khai tai lah: “Ñchi broă ai yoam lah taih?” Khai ho lah: “Cau ùr do đơs mơ añ lah: ‘Ai tĕ kòn klau ai, tồ bol he sa poac khai ngai do; mơ ngai hìng bol he rơp sa poac kòn klau añ.’

²⁹Behơ̆, bol hi neh gơm poac kòn klau añ mơ sa. Ngai hìng añ neh đơs mơ khai lah: ‘Ai tĕ kòn klau ai, tồ bol he sa poac khai.’ Mơya khai neh pồn kòn klau khai.”

³⁰Tòm tŭ bơtau kơno ală jơnau cau ùr hơ̆ đơs, gen khai crè ồi ào khai dê. Tŭ hơ̆, khai gam lòt yơng hơđang dơrñang ƀòn, làng bol rgơi sền gŏ bơtau neh soh ƀào sơnò kiat tòm să khai,

³¹mơ bơtau đơs lah: “Behơ̆ dan Yàng Tom Trồ lơh di añ kơnjơ̆ rlau tai, dilah ngai do bồ Elise dê, kòn klau Saphat, gam hơđang pơnì khai dê.”

³²Tŭ hơ̆ Elise ơm nggui tòm hìu, mơ ală cau kwang kra ơm nggui bal mơ khai. Lài mơ tŭ ală cau geh sồr lòt tus, Elise đơs mơ ală cau kwang kra lah: “Bol mê gŏ sơl hơ̆ la cau tơnchơt cau neh sồr cau tus nàng koh bồ añ? Tòm tŭ cau kong sồr tus, gen bol mê kal mpồng wơl, mơ đơng kơ̆ mpồng tòmdră mơ khai. Hơ̆ ò di la ntas jơng cau tòm khai dê tus bơh ngkòi khai ò ơ?”

³³Tòm tŭ Elise gam ơm đơs mơ bol khai, gen bơtau mù tus hơ khai mơ đơs lah: “Bơta rung rài do la tus bơh Yàng Jehôwa. Ñchi bơh tài añ pal gơn kơnòm di Yàng Jehôwa tai taih?”