Read koho II Ală Bơtau 7 Bible Online

II Ală Bơtau 7 - koho bible

II Ală Bơtau 7

¹Mơya Elise đơs lah: “Iat tĕ jơnau Yàng Jehôwa dê: Yàng Jehôwa đơs be do: Ngai hìng, di jơ do, dô lơ-i kơmbuh phe rơp tac dô sieklơ mơ bàr lơ-i kòi màc tac dô sieklơ, di mpồng ƀòn Samari.”

²Gen cau kwang sền gàr la cau mơ bơtau sơnđìng dê tê khai đơs mơ cau Yàng Tom Trồ lah: “Bulah Yàng Jehôwa lơh ală mpồng dềt hơđang trồ, bơta hơ̆ rơp gơlik gơs sơl ơ?” Mơya Elise đơs lah: “Mê rơp sền gŏ mơ mat mê, mơya mê ò geh sa gơ.”

³Tŭ hơ̆ gơs poan nă cau dun ơm di mpồng ƀòn, bol khai tòmbơyai bal lah: “Ñchi bơh tài bol he pal nggui tềng do jơl chơt taih?

⁴Dilah bol he mut tòm ƀòn dờng, gen bol he rơp chơt, tài bơh tềng hơ̆ gơs jơgloh rung, mơ dilah bol he kư̆ nggui tềng do, gen bol he kung rơp chơt sơl. Behơ̆, chan la bol he kong lòt tus tòm sàl mpồl ling cau Aram dê; dilah bol khai lòi he kis gen bol he rơp kis; dilah bol khai tơnchơt he, bulah mbe lơi gen bol he kung rơp chơt.”

⁵Behơ̆, bol khai ñă ntào tòm tŭ trồ mòr mang, lòt tus hơ sàl mpồl ling cau Aram dê; mơya tòm tŭ bol khai tus di gah sàl cau Aram dê, tềng hơ̆ ò gŏ dô nă cau lơi.

⁶Bơh Yàng Jehôwa neh lơh cau Aram in kơno ntas rơndeh, ơseh mơ ntas mpồl ling gal ngan; tian gơs cau Aram đơs bal mơ gơp lah: “Bơtau Israel neh ơpah bơtau cau Hetit mơ bơtau Ejiptơ nàng tòmlơh mơ bol he.”

⁷Gen bol khai ntoat dô tòm tŭ mòr mang, mơ sang lòi ală sàl, ơseh mơ alàng bol khai dê, mơ sàl gam be òs mìng ntoat dô nàng dong klàs bơta kis lơm.

⁸Tŭ ală cau dun ne tus di gah sàl, gen mut tòm dô nơm sàl, sa mơ ñô; cèng jơh màh, priă, mơ ồi ào mơ pồn gơ. Gen bol khai rê wơl, mut tòm dô nơm sàl ndai, cèng jơh ală phan mơna tòm hơ̆, mơ cèng pồn gơ sơl.

⁹Gen bol khai đơs bal mơ gơp lah: “Bơta bol he lơh do la tìs. Do la dô ngai gơs jơnau yal niam, dilah bol he ơm mŏ mŏ mơ gơn jơl tus diàng drim, gen bol he rơp gơkòl glài. Behơ̆, bol he lòt lă yal jơh tòm gơlang bơtau in.”

¹⁰Behơ̆ bol khai lòt, hòi ală cau ling ơm kơp gàr mpồng ƀòn, mơ yal bol khai in lah: “Bol hi neh lòt tus hơ sàl mpồl ling cau Aram dê, mơya ò gơs dô nă cau lơi, mơ kung ò kơno sap dô nă cau lơi tềng hơ̆; mìng gŏ ală ơseh mơ alàng gam kơt, mơ ală sàl gam be òs.”

¹¹Gen mpồl ling kơp gàr hòi cau lòt yal jơnau hơ̆ tòm gơlang bơtau.

¹²Bơtau guh tòm trồ mang, đơs mơ ală cau dĭ gơna he lah: “Añ rơp yal bol mê in bơta cau Aram rơp lơh nàng tòmdră mơ bol he. Bol khai git bol he jơgloh; gen tàng bol khai neh lik bơh sàl mpồl ling nàng kơp mòc tòm ƀlàng. Bol khai neh đơs bal mơ gơp lah: ‘Tòm tŭ cau Israel lik bơh ƀòn, bol he rơp kup kis bol khai, lồc behơ̆ bol he mut tòm ƀòn.’”

¹³Dô nă cau dĭ gơna bơtau đơs lah: “Lòi tĕ ală cau kup pram nơm ơseh gam wơl nàng sồr bol khai lòt sền sơwì, dilah lòi tềng do gen bulah be lơi bơta kis bol gơ kung rơp roh rui be bơta kis jơh ală làng bol Israel gal ngan do sơl.”

¹⁴Behơ̆, bol khai ai bàr nơm rơndeh ơseh, mơ bơtau sồr bol khai lòt jat mpồl ling Aram, mơ đơs lah: “Lòt tĕ jòi sền.”

¹⁵Bol khai lòt jat bol hơ̆ tus hơ Jordan, jơh rò gùng bềng ồi ào mơ ală phan ngui mơ cau ling Aram neh sang tòm tŭ ntoat dô sơrbac sơrbang. Ală cau geh sồr rê wơl mơ yal bơtau in git.

¹⁶Gen làng bol lik lòt, phà kơñau sàl mpồl ling cau Aram dê, tian gơs dô lơ-i kơmbuh phe tac dô sieklơ, mơ bàr lơ-i kòi màc kung tac dô sieklơ, tòm toh be jơnau Yàng Jehôwa neh đơs.

¹⁷Tŭ hơ̆ bơtau ơn cau kwang sền gàr mơ bơtau sơnđìng di tê khai dê kơp gàr mpồng; mơ làng bol jă trơm khai chơt tơn di mpồng ƀòn, be jơnau cau Yàng Tom Trồ dê neh đơs tòm tŭ bơtau tus jòi khai.

¹⁸Bơh tòm tŭ cau Yàng Tom Trồ neh đơs mơ bơtau lah: “Bàr lơ-i kòi màc rơp tac dô sieklơ, mơ dô lơ-i kơmbuh phe rơp tac dô sieklơ, tòm jơ do ngai hìng di mpồng ƀòn Samari dê,”

¹⁹gen cau kwang at bồ neh đơs mơ cau Yàng Tom Trồ lah: “Bulah Yàng Jehôwa lơh gơs ală mpồng dềt hơđang trồ, bơta hơ̆ rơp geh gơlik gơs ơ?” Gen Elise pơnjat lah: “Mat mê rơp gŏ bơta hơ̆, mơya mê ò geh sa gơ.”

²⁰Hơ̆ la bơta neh gơlik gơs di ngan khai in; làng bol neh jă khai chơt tơn di mpồng ƀòn.