Read koho II Ală Bơtau 8 Bible Online

II Ală Bơtau 8 - koho bible

II Ală Bơtau 8

¹Tŭ hơ̆ Elise đơs mơ cau ùr, la mè kòn klau mơ khai neh hòi kis wơl lah: “Ñă tĕ, lòt bal mơ hìu nhă ai, ơm tiah lơi ai rgơi ơm, bơh Yàng Jehôwa neh hòi bơta jơgloh rung tus tòm lơgar tòm poh nam.”

²Behơ̆, cau ùr hơ̆ ñă lòt, mơ lơh jat jơnau cau Yàng Tom Trồ dê, khai neh lik lòt bal mơ jơh hìu nhă khai dê mơ ơm ing tòm lơgar Philistin tòm poh nam.

³Lồi poh nam, cau ùr hơ̆ rê wơl bơh lơgar Philistin, lòt tus dan bơtau ai wơl hìu mơ ù tiah khai dê.

⁴Tŭ hơ̆ bơtau ơm tòmbơhbơr mơ Gehaji, dĭ gơna cau Yàng Tom Trồ dê, lah: “Yal tĕ añ in jơh ală broă dờng mơ Elise neh lơh.”

⁵Tòm tŭ khai ơm yal bơtau in mbe lơi Elise neh hòi dô nă cau chơt kis wơl, cau ùr la mè kòn klau mơ Elise neh hòi kis wơl, tus dan mơ bơtau ai wơl hìu mơ ù tiah khai dê. Gehaji đơs lah: “Ơ bơtau cau tòm añ! Do la cau ùr hơ̆, mơ do la kòn klau khai mơ Elise neh hòi kis wơl.”

⁶Tòm tŭ bơtau lùp mò, mơ mò yal wơl bơtau in. Gen bơtau sồr dô nă kwang lòt jat cau ùr hơ̆, mơ đơs lah: “Tơm wơl tĕ khai in jơh ală bơta lơi gơrê bal mơ khai, bal mơ cồng nha bơh ƀlàng sre khai dê, bơh ngai khai lòt ngài sang lơgar jơl tus di ngai do.”

⁷Elise lòt tus hơ Damas. Tòm tŭ Benhadat bơtau cau Aram ơm kòp. Cau yal mơ bơtau lah: “Cau Yàng Tom Trồ pa tus tềng do.”

⁸Bơtau đơs mơ Hajael lah: “Cèng tĕ dô nơm phan ơn bal mơ mê, lòt rò cau Yàng Tom Trồ dê, kơnòm di khai hòi lùp Yàng Jehôwa lah: ‘Añ rơp geh bòi bơh kòp jê do sơl?’”

⁹Behơ̆, Hajael lòt rò cau Yàng Tom Trồ dê, cèng dô nơm phan ơn jơh ală bơta niam tòm Damas, pơdiang hơđang poan jơt nơm làkđa. Tòm tŭ khai tus mut mơ ntào di đap Elise, khai đơs lah: “Kòn klau ồng la Benhadat, bơtau Aram, neh sồr añ tus hơ ồng mơ lùp lah: ‘Añ rơp geh bòi bơh bơta kòp jê do sơl?’”

¹⁰Elise đơs mơ khai lah: “Lòt tĕ yal mơ khai lah: ‘Bơtau rơp geh bòi kòp.’ Bulah behơ̆, Yàng Jehôwa neh yal añ in git lah khai rơp chơt.”

¹¹Cau Yàng Tom Trồ sền trol di Hajael jŏ ngan tian gơs khai gơlik ƀàssìl, gen cau Yàng Tom Trồ ñìm.

¹²Hajael lùp lah: “Ñchi bơh tài cau tòm añ ñìm taih?” Elise ho lah: “Tài bơh añ git bơta iơh mơ mê rơp lơh di cau Israel. Mê rơp chu ală ƀòn dờng kơ̆ cê bol khai dê, tơnchơt ală cau pơnu mơ đào, jă tơnlề kòn dềt, mơ reh kơndul cau ùr bun bol khai dê.”

¹³Hajael đơs: “Dĭ gơna ồng dê la ñchi, la be dô nơm so; mbe khai rgơi lơh ală bơta dờng behơ̆ taih?” Elise ho lah: “Yàng Jehôwa neh yal añ in la mê rơp lơh gơs bơtau cau Aram dê.”

¹⁴Gen Hajael lik lòt bơh Elise, mơ rê wơl hơ cau tòm khai Benhadat; cau tòm lùp khai lah: “Ñchi Elise neh đơs mơ mê taih?” Khai ho lah: “Elise đơs mơ añ lah ngan bơtau rơp geh bòi.”

¹⁵Mơya, ngai tơnơ̆ Hajael ai dô nơm ồi tơ̆ tram tòm dà, jơm hơđang muh mat Benhadat, gen khai chơt tơn. Mơ Hajael lơh gơs bơtau ala khai.

¹⁶Nam dơ̆ pram rài Jôram kòn klau Ahap lơh bơtau Israel, gen Jôram, kòn klau Jôsaphat, bơtau Juda sơntòm at bồ.

¹⁷Khai neh pe jơt nam tòm tŭ khai lơh gơs bơtau, mơ khai at bồ phàm sơnam tòm Jerusalem.

¹⁸Khai lòt jat gùng ală cau bơtau Israel dê, tòm toh be hìu Ahap neh lơh; bơh kòn ùr Ahap la bau ùr khai dê. Behơ̆ khai lơh bơta iơh di đap Yàng Jehôwa.

¹⁹Mơya Yàng Jehôwa ò tơnroh Juda tài bơh Dabit, dĭ gơna Kơnràñ dê, bơh Kơnràñ neh ho prap lòi dô nơm ồs đèng Dabit in mơ jơi bơtiàn khai in sùm sùm.

²⁰Tòm rài Jôram, cau Edôm pơrlơ̆ dră mơ Juda, mơ bơtào gơs bơtau is bol khai in.

²¹Tŭ hơ̆, Jôram lòt tus hơ Jair, cèng bal jơh ală rơndeh tòmlơh khai dê. Khai lik lòt tòm trồ mang brồ lơh cau Edôm, mơ ală kwang at bồ rơndeh tòmlơh bol khai dê gam gơrwàng gùt dar khai. Mơya mpồl ling bơtau dê ntoat dô mơ rê hìu bol khai dê.

²²Behơ̆ cau Edôm bơtào bơta pơrlơ̆ dră di bơta at bồ cau Juda jơl tus di ngai do. Kung tòm tŭ hơ̆, Lipna kung pơrlơ̆ dră.

²³Ală bơta ndai Jôram dê, ală broă khai lơh, neh geh cih tòm sră cih yal broă kòp nam ală cau bơtau Juda dê.

²⁴Jôram bic lơhă bal mơ ồng pàng khai dê, geh tơp bal mơ bol khai tòm ƀòn Dabit. Acasia, kòn klau khai, pơrdòn khai at bồ.

²⁵Nam dơ̆ jơt bàr rài Jôram kòn klau Ahap, bơtau Israel, gen Acasia kòn klau Jôram, bơtau Juda sơntòm guh at bồ.

²⁶Acasia neh bàr jơt bàr sơnam tòm tŭ khai sơntòm at bồ mơ at bồ dô sơnam tòm Jerusalem. Mè khai sơnđan la Athali, sau ùr Ômri, bơtau Israel dê.

²⁷Khai kung lòt jat gùng hìu Ahap dê, lơh bơta iơh di đap Yàng Jehôwa, tòm toh be hìu Ahap neh lơh. Bơh khai la bơrtơu Ahap dê.

²⁸Khai lòt bal mơ Jôram, kòn klau Ahap, tus Ramôt tòm Galaat nàng tòmlơh mơ Hajael, bơtau cau Aram. Tềng hơ̆ cau Aram lơh bơtau Jôram in kong sồt kơnjơ̆.

²⁹Bơtau Jôram rê wơl tòm Jejreel nàng sơm ală tềl sồt mơ cau Aram neh lơh khai tòm Ramôt, tòm tŭ tòmlơh mơ Hajael bơtau Aram. Acasia kòn klau Jôram bơtau Juda, lòt còp Jôram kòn klau Ahap tòm Jejreel tài bơh khai neh kong jê sồt kơnjơ̆.