Read koho II Ală Bơtau 9 Bible Online

II Ală Bơtau 9 - koho bible

II Ală Bơtau 9

¹Gen cau gơnoar hwơr Elise hòi dô nă cau tòm mpồl cau gơnoar hwơr dê, mơ đơs lah: “Kơt tĕ but mê, cèng gri mơñà do tòm tê mê dê, mơ lòt tus hơ Ramôt tòm Galaat.

²Tòm tŭ mê neh tus tềng hơ̆, jòi tĕ Jehu kòn klau Jôsaphat, sau Nimsi dê; mê mut mơ sồr khai lik bơh di mpồl, mơ lam khai mut tòm dô nơm ơdŭ.

³Gen mê ai gri mơñà tuh hơđang bồ khai mơ đơs lah: ‘Yàng Jehôwa đơs be do: Añ bong mơñà mê in lơh gơs bơtau hơđang Israel.’ Gen pò tĕ mpồng mơ dô, bañ lơh òbat nyà.”

⁴Behơ̆, cau gơnoar hwơr pơnu lòt tus hơ Ramôt tòm Galaat.

⁵Khai tus tòm tŭ ală kwang at bồ ling ơm bơyai broă, mơ khai yal lah: “Ơ kwang at bồ ling, añ gơs dô bơta kòñ đơs mơ ồng.” Jehu ho lah: “Đơs mơ ñcau tòm mpồl bol he taih?” Cau pơnu ho: “Mơ ồng, cau kwang at bồ mpồl ling.”

⁶Behơ̆, Jehu ñă mơ mut tòm dơlam hìu; cau pơnu tuh mơñà hơđang bồ khai, mơ đơs lah: “Jehôwa Yàng Tom Trồ Israel dê đơs be do: ‘Añ bong mơñà mê in lơh gơs bơtau hơđang Israel, la làng bol Yàng Jehôwa dê.

⁷Mê rơp tơnchơt hìu Ahap, cau tòm mê; mơ Añ rơp sal tê hơđang Jesebel bơh mhàm ală cau gơnoar hwơr dê, dĭ gơna Añ, bal mơ mhàm jơh ală dĭ gơna Yàng Jehôwa dê.

⁸Jơh hìu Ahap rơp kong tơnroh; Añ rơp tơnroh bơh di hìu Ahap jơh ală cau klau, bulah dĭ gơna hala cau khat gơboh, tòm Israel;

⁹Añ rơp lơh hìu Ahap tòm toh be hìu Jerôbôam, kòn klau Nebat, mơ tòm toh be hìu Baesa, kòn klau Ahijah dê.

¹⁰So rơp sa poac Jesabel tòm ù tiah Jejreel; rơp ò gơs cau lơi tơp khai.’” Chòp, cau pơnu pò mpồng mơ ntoat dô.

¹¹Tòm tŭ Jehu rê wơl hơ ală cau kwang cau tòm khai dê. Bol khai lùp lah: “Ală bơta lơngap lơngai sơl ơ? Ñchi bơh tài cau sơnrang do tus jòi bi taih?” Jehu ho mơ bol khai lah: “Bol mê git khai mơ mbe jơnau khai neh đơs.”

¹²Mơya bol khai ho lah: “Đơs blac! Yal tĕ bol hi in git.” Behơ̆, Jehu yal mơ bol hơ̆ lah: “Khai neh đơs mơ añ be do, lah: ‘Yàng Jehôwa neh đơs be do: Añ bong mơñà mê in lơh gơs bơtau hơđang Israel.’”

¹³Gen bol khai sơrbac sơrbang ai ồi ào he, lă hơđơm jơng khai hơđang ală kơnă ntùng; mơ bol khai uh kơlwòk, mơ driau dờng lah: “Jehu lơh gơs bơtau!”

¹⁴Behơ̆, Jehu kòn klau Jôsaphat, sau Nimsi, pơrlơ̆ dră mơ Jôram. Jôram mơ jơh mpồl ling Israel ơm kơp gàr Ramôt tòm Galaat nàng tòmdră mơ Hajael bơtau Aram;

¹⁵mơya bơtau Jôram neh rê wơl hơ Jejreel nàng sơm sồt mơ mpồl ling Aram neh lơh, tòm tŭ khai tòmlơh mơ Hajael bơtau Aram. Gen Jehu đơs lah: “Dilah bol mê niam nùs, bañ lòi dô nă cau lơi dô lik bơh ƀòn lòt yal jơnau tòm Jejreel.”

¹⁶Behơ̆, Jehu hào rơndeh, tus Jejreel, bơh Jôram kòp jê bic tềng hơ̆. Acasia, bơtau Juda, kung tus tềng hơ̆ nàng còp Jôram.

¹⁷Tòm Jejreel, cau ling kơp gàr ntào hơđang theng, gŏ mpồl ling Jehu tus, gen hòi lah: “Añ gŏ ală mpồl ling tus.” Jôram đơs lah: “Sồr tĕ dô nă cau ling hào ơseh lòt rò bol khai, mơ lùp lah: Bơtau đơs lah lơngap lơngai sơl?”

¹⁸Behơ̆, cau ling hào ơseh lòt rò Jehu, mơ đơs mơ khai lah: “Bơtau lùp: Lơngap lơngai sơl?” Jehu ho lah: “Ñchi mê kòñ lơh mơ bơta lơngap lơngai taih? Ruc tĕ đah ngkòi añ.” Cau ling kơp gàr yal lah: “Cau kong sồr neh lòt tus hơ mpồl ling hơ̆ rau, mơya ò rê wơl.”

¹⁹Khai sồr tai dô nă cau ling hào ơseh dơ̆ bàr, tus mơ bol khai, mơ đơs: “Bơtau lùp: Lơngap lơngai sơl?” Jehu ho: “Ñchi mê kòñ lơh mơ bơta lơngap lơngai taih? Ruc tĕ đah ngkòi añ.”

²⁰Cau ling kơp gàr yal tai lah: “Cau kong sồr neh lòt tus hơ bol khai rau, mơya khai ò rê wơl. Bơta hào rơndeh cau lam rơndeh gơlơh tòm toh be Jehu, kòn klau Nimsi, bơh khai lam dô bă rhung rhang.”

²¹Gen Jôram đơs lah: “Rcang sir tĕ.” Mơ cau neh rcang rơndeh khai in; gen Jôram bơtau Israel mơ Acasia bơtau Juda, kòp nă hào rơndeh, lòt tus rò Jehu tìp khai tòm sre brê Nabôt, cau Jejreel dê.

²²Tòm tŭ Jôram pa gŏ Jehu gen đơs lah: “Ơ Jehu, lơngap lơngai sơl?” Mơya Jehu đơs lah: “Mbe rgơi gơs bơta lơngap lơngai, kàr lơi bơta rềs àr bơrnàn mơ bơta duh khoai rùp ràk Jesebel mè bơtau dê gam jŏ taih?”

²³Gen Jôram tơrwơl rơndeh, ntoat dô, đơs mơ Acasia lah: “Ơ Acasia, gơs bơta pơrlơ̆ dră!”

²⁴Jehu wàr àtak ai jơh pràn mơ pañ, kam par di să Jôram digùl bàr đah pơnì, bluh plai nùs, mơ khai gơpừ tơlup tòm rơndeh khai.

²⁵Gen, Jehu đơs mơ Biska, cau kwang ling khai lah: “Cèng tĕ khai sơrbì tòm ƀlàng sre Nabôt, cau Jejreel dê; kah wơl tĕ dô dơ̆ ne añ mơ mê hào ơseh jat bơh ngkòi Ahap bèp khai dê, gen Yàng Jehôwa neh đơs tòmdră mơ khai jơnau đơs hwơr do:

²⁶‘Bơh mhàm Nabôt mơ bơh mhàm kòn sau khai mơ Añ neh gŏ ngai òr; Yàng Jehôwa đơs behơ̆, Añ srat să lah Añ kung rơp tơm wơl mê in di ƀlàng sre do.’ Tài behơ̆ tàng, cèng tĕ khai sơrbì tòm ƀlàng sre do, tòm toh be jơnau Yàng Jehôwa neh đơs.”

²⁷Tòm tŭ Acasia bơtau Juda gŏ bơta hơ̆, gen ntoat dô song hơ Bethagan; mơya Jehu ting jat khai, mơ sồr lah: “Kung pañ tĕ khai sơl.” Gen bol khai pañ di khai hơđang rơndeh di kơh tus hơ Gur, rềp Gipleam. Gen, Acasia dô tus hơ Megidô mơ chơt tềng hơ̆.

²⁸Ală dĭ gơna khai ơn ƀồc khai hơđang dô nơm rơndeh pơdiang rê wơl hơ Jerusalem, mơ tơp tòm bơtô ƀồc, bal mơ ală ồng pàng khai dê, tòm ƀòn dờng Dabit.

²⁹Tòm nam dơ̆ jơt dùl rài Jôram kòn klau Ahap, gen Acasia sơntòm at bồ hơđang Juda.

³⁰Tòm tŭ Jehu lòt tus hơ Jejreel, gen Jesebel kơno bơta hơ̆; khai bong muh mat, bơka sŏ, mơ tơnggòr bơh di mpồng dềt.

³¹Tòm tŭ Jehu mut di mpồng ƀòn, gen Jesebel hòi lah: “Lơngap lơngai sơl, Ơ Jimri cau tơnchơt cau tòm?”

³²Jehu tơnggòr sền di mpồng dềt mơ đơs lah: “Ñcau ơm đah mơ añ, ñcau taih?” Gơs bàr pe nă cau kwang kơndời tơmềt sền di khai.

³³Khai đơs lah: “Sơrbì tĕ khai di tiah.” Behơ̆ bol hơ̆ sơrbì khai tòm tiah, mhàm khai gơđat hơđang dơrñang mơ di ơseh, mơ gơ jă hơđang khai tơn.

³⁴Gen Jehu mut sa mơ hùc, mơ đơs lah: “Lòt tĕ tơp cau ùr kòl srat rma ne; bơh khai la dô nă kòn ùr cau bơtau dê.”

³⁵Mơya tòm tŭ bol hơ̆ lòt nàng tơp khai, gen gŏ gam mìng dô nơm ntìng bồ, jơng mơ mpàng tê lơm.

³⁶Tòm tŭ bol hơ̆ rê wơl yal mơ Jehu, khai đơs lah: “Do la jơnau Yàng Jehôwa neh đơs bơh dĭ gơna Kơnràñ dê Elise cau Thisebe, ‘tòm ù tiah Jejreel so rơp sa poac Jesebel;

³⁷ƀồc khai rơp be è tòm ƀlàng tòm ù tiah Jejreel dê, behơ̆ ò gơs dô nă cau lơi rgơi đơs, do la Jesebel.’”