Read koho I Yal Yau 11 Bible Online

I Yal Yau 11 - koho bible

I Yal Yau 11

¹Jơh Israel pơjum bal lòt tus hơ Dabit tòm Hebrôn mơ đơs lah: “Bol hi la poac mhàm ồng dê.

²Bơh lài, tòm tŭ Sol gơs bơtau, ồng la cau neh lam bồ mpồl ling Israel dê. Mơ Jehôwa Yàng Tom Trồ ồng dê neh đơs mơ ồng lah: ‘Mê rơp la cau ê gàr làng bol Israel Añ jê, mơ mê rơp gơlik gơs cau at bồ hơđang làng bol Israel Añ jê.’”

³Behơ̆, jơh ală cau kwang kra Israel dê neh tus hơ bơtau tòm Hebrôn, mơ Dabit bơtào dô bơta ho bal mơ bol khai tòm Hebrôn di đap Yàng Jehôwa. Mơ bol khai bong mơñà Dabit in gơs bơtau hơđang Israel, jat be jơnau Yàng Jehôwa neh kơnòm di Samuel.

⁴Dabit mơ jơh ală cau Israel lòt tus hơ Jerusalem, hơ̆ la Jebus, la tiah mơ cau Jebusit neh ơm tềng hơ̆.

⁵Làng bol Jebus đơs mơ Dabit lah: “Mê rơp ò geh mut tềng do.” Bulah behơ̆, Dabit tòmpìt ai ƀòn kơ̆ cê Siôn, la Ƀòn Dờng Dabit.

⁶Dabit neh đơs lah: “Cau lơi lam brồ lơh cau Jebusit gen rơp gơlik gơs cau kwang dờng at bồ mpồl ling.” Jôap kòn klau Jeruya lik lòt lài, behơ̆ khai dòp geh gơnoar at bồ.

⁷Dabit mut ơm tòm ƀòn kơ̆ cê, mơ tài behơ̆ gơ geh sơnđan la Ƀòn Dờng Dabit.

⁸Khai bơt bơtào ƀòn dờng gùt dar hơ̆, bơh Milô tus di dơrñang gùt dar, mơ Jôap bơt wơl pơnah gam wơl ƀòn dờng dê.

⁹Mơ Dabit sơlo ngai sơlo dờng màng gơs gơnoar pràn, tài bơh Yàng Jehôwa Gơnap Gơnoar Rlau Jơh ơm bal mơ khai.

¹⁰Do la ală cau at bồ ală cau ling jak tòmlơh Dabit dê, bol khai bal mơ jơh Israel jơh nùs jơh pràn dong kòl tòm bơta at bồ bơtau Dabit dê hơđang jơh lơgar, jat be Yàng Jehôwa neh ho mơ Israel.

¹¹Do la sră cih sơnđan ală cau ling jak pràn kơldang Dabit dê: Jasôbeam, kòn klau Hakmônit, la cau kwang at bồ ală cau kwang ling tòm “Mpồl Pe Nă”; khai ngui tà tòmdră mơ pe rhiang nă cau mơ tơnchơt bol hơ̆ tòm dô dơ̆ lĕ.

¹²Jat tơnơ̆ khai la dô nă tòm pe nă cau ling jak tòmlơh la Eleajar kòn klau Dôdô cau Ahohit.

¹³Khai neh ơm bal mơ Dabit tòm Pas Dammim tòm tŭ ală cau Philistin pơjum bal nàng tòmlơh. Tòm dô bă tiah gơs ƀlàng sre bềng kòi mi, mpồl ling ntoat dô bơh di cau Philistin.

¹⁴Mơya bol khai ntào kơ̆ digùl ƀlàng sre, cang kìng gơ mơ tơnchơt cau Philistin, mơ Yàng Jehôwa dong tă bol khai bơh bơta pha lin dờng.

¹⁵Pe nă tòm pe jơt nă cau at bồ neh mù tus hơ Dabit di tiah Pơnai lŭ tòm rgồng Adulam, tòm tŭ mpồl ling cau Philistin neh lơh sàl tòm thòng Rephaim.

¹⁶Gen Dabit ơm tòm ƀòn kơ̆ cê, mơ mpồl ling kơp gàr cau Philistin ơm tòm Betlehem.

¹⁷Dabit kơp kòñ gơs dà hùc mơ đơs lah: “Ơ hơh, kơp kòñ gơs cau lơi ai añ in hùc dà bơh tòm tơrlung rềp di mpồng dờng Betlehem!”

¹⁸Behơ̆ pe nă cau hơ̆ lòt gan sàl mpồl ling cau Philistin dê, bơ̆ dà bơh di tơrlung rềp di mpồng Betlehem mơ cèng brê Dabit in. Mơya Dabit ò bài hùc dà hơ̆, khai tuh dà hơ̆ di đap Yàng Jehôwa mơ đơs lah:

¹⁹“Dan Yàng sền gàr añ klàs bơh di bơta do! Añ rơp hùc mhàm ală cau do neh phi să bol khai dê ơ?” Tài bơh bol khai neh phi să bol khai dê nàng cèng brê dà hơ̆, Dabit ò bài hùc dà hơ̆. Hơ̆ la broă lơh dờng mơ krơi is pe nă cau pràn kơldang hơ̆ dê.

²⁰Abisai oh Jôap dê la cau at bồ pe nă cau hơ̆. Khai ngui tà tòmlơh mơ pe rhiang nă cau mơ tơnchơt bol khai, behơ̆ khai geh tiơng pơnro kung be pe nă cau ne.

²¹Khai geh tiơng pơnro oă rlau mơ pe jơt nă ne, mơ gơlik gơs cau at bồ bol khai, mơya khai ò dròm be “Mpồl Pe Nă” cau ne.

²²Benayah kòn klau Jehôyada la dô nă cau ling tòmlơh khin cha pràn kơldang tòm Kapseel, neh lơh ală broă dờng mơ krơi is. Khai tơnchơt bàr nă tòm ală cau Môap jak rlau jơh. Khai kung mù tòm dô nơm trồm jrô tòm dô ngai dùh piar mơ tơnchơt dô nơm klìu triă.

²³Mơ khai tơnchơt dô nă cau Ejiptơ jơnhoa pram tal. Bulah cau Ejiptơ gơs dô nơm tà dờng tòm tê khai dê kung be dô nơm jrong cau kơt brài nàng tàñ ồi, Benayah at mìng dô nơm gai lòt tus tòmlơh mơ khai. Benayah tă tà bơh di tê cau Ejiptơ mơ tơnchơt khai bơh tà să tòm khai dê.

²⁴Hơ̆ la broă lơh dờng mơ krơi is Benayah kòn klau Jehôyada neh lơh; kung geh tiơng pơnro be pe nă cau pràn kơldang ne.

²⁵Khai geh tiơng pơnro digùl mpồl pe jơt nă ne; mơya khai ò geh kòp tòm mpồl pe nă. Mơ Dabit ơn khai lơh gơs cau at bồ mpồl ling sền gàr bơtau.

²⁶Ală cau pràn kơldang la: Asael oh mi mơ Jôap, Elhanan kòn klau Dôdô bơh Betlehem,

²⁷Sammôt cau Harôt, Heles cau Pelônit,

²⁸Ira kòn klau Ikkes bơh Tekôa, Abiejer bơh Anatôt,

²⁹Sipbekai cau Hushathit, Ilai cau Ahôhit,

³⁰Maharai cau Netôphathit, Helet kòn klau Baana cau Netôphathit,

³¹Ithai kòn klau Ribai bơh Gibea tòm Benjamin, Benayah cau Pirathonit;

³²Hurai bơh ală thòng Gaas, Abiel cau Arbathit,

³³Asmabet cau Baharumit, Eliaba cau Saalbônit,

³⁴Ală kòn klau Hasem cau Gijônit, Jônathan kòn klau Sagi cau Hararit,

³⁵Ahiam kòn klau Sakar cau Hararit, Eliphal kòn klau Ur,

³⁶Hepher cau Mekerathit, Ahija cau Pelônit,

³⁷Hejrô cau Karmelit, Naarai kòn klau Esbai,

³⁸Jôel oh mi mơ Nathan, Miphar kòn klau Hagri,

³⁹Jelek cau Ammônit, Naharai cau Berôthit, cau àñ phan tòmlơh Jôap kòn klau Jeruya dê,

⁴⁰Ira cau Itrit, Garep cau Itrit,

⁴¹Uria cau Hetit, Jabat kòn klau Alai,

⁴²Adina kòn klau Sija cau Ruben, la cau at bồ cau Ruben, mơ mpồl pe jơt nă bal mơ khai,

⁴³Hanan kòn klau Maaka, Jôsaphat cau Mitnit,

⁴⁴Uja cau Asterathit, Sama mơ Jeiel ală kòn klau Hôtham cau Arôerit,

⁴⁵Jediael kòn klau Simri, Oh mi khai la Jôha cau Tijit,

⁴⁶Eliel cau Mahabit, Jeribai mơ Jôsabia ală kòn klau Elnaam,

⁴⁷Eliel, Ôbet mơ Jaasiel cau Mejôbait.